އެމީހަކަށް ޖެހުނު ގޮތަކުން ފައިސާ އެއް ކުރުމުގެ ރޫހެއް މުޅި ސަރުކާރު ހިންގަން ތިބި ފަރާތްތަކުގެ ތެރޭގައި އެބައޮތް: މައުރޫފް
އިސްވެރިން ބޭނުންގޮތަކަށް ފައިސާ ނަގަމުންދާއިރު ރައީސްއަށް އެކަމެއް ނުހުއްޓުވޭ
ކެންދޫ ދާއިރާގެ މެންބަރު މައުރޫފް ޒާކިރު
އެމީހަކަށް ޖެހުނު ގޮތަކުން ފައިސާ އެއް ކުރުމުގެ ރޫހެއް މުޅި ސަރުކާރު ހިންގަން ތިބި ފަރާތްތަކުގެ ތެރޭގައި އެބައޮތް ކަމަށް ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން މައުރޫފް ވިދާޅުވީ ކޮންމެ ދިމާލެއްގައި ވެސް މިއިން ދުވަހަކު ދިވެހިރާއްޖޭގެ އަށަނުގަންނަ ވަރަކަށް މި ސަރުކާރުގައި ވައްކަމާއި ފަސާދަ އަށަގަނެ، ކޮރަޕްޝަން އިންތިހާއަށް ގޮސްފައިވާ ކަމަށެވެ. އަދި އެމީހަކަށް ޖެހުނު ގޮތަކުން ފައިސާ އެއް ކުރުމުގެ ރޫހެއް މުޅި ސަރުކާރު ހިންގަން ތިބި ފަރާތްތަކުގެ ތެރޭގައި އުފެދިފައިވާތަން ފެންނަމުންދާ ކަމަށެވެ.
މައުރޫފް ވިދާޅުވީ ރައީސުލްޖުމްހޫރިއްޔާ ވެސް އެކަމުން ސަލާމަތްނުވެގެން އުޅޭ މަންޒަރު ފެންނަ ކަމަށާއި، ޙަޤީޤަތުގައި މިހެން މި ދިމާވާން ޖެހެނީ ރައީސުލްޖުމްހޫރިއްޔާގެ ނާގާބިލުކަމުން ކަމަށެވެ.
މައުރޫފް ވިދާޅުވީ މިއީ ދިވެހި ރައްޔިތުން ކަންބޮޑުވާންޖެހޭ ކަމެއް ކަމަށެވެ. އަދި ދިވެހި ރައްޔިތުންނަށް މި ކަންކަން އެނގޭތީ، މިކަމާ ކަންބޮޑުވެ ސީރިއަސް ވެގެން ރައްޔިތުން މަގުމައްޗަށް ނުކުންނަ ކަމަށެވެ. މައުރޫފް ވިދާޅުވީ ރައްޔިތުން ނުކުމެ މި ސަރުކާރު ހަމަމަގަށް އަޅުވަންޖެހެނީ ދިވެހި ރައްޔިތުންގެ ދަރިންގެ ދަރިންގެ މުސްތަޤްބަލަށްޓަކައި ކަމަށެވެ.
މައުރޫފް ވިދާޅުވީ ކޮންމެހެން ވެސް ދައުލަތުގެ ޚަރަދުތައް ފޫބައްދަންވެގެން ބޮޑެތި އިންޓްރެސްޓް ރޭޓުގައި ލޯނު ނަންގަމުންދާ ކަމަށާއި، އެ ލޯނުތައް ނަގަނީ މީގެ ފަސް އަހަރު ފަހުން އަދާކުރަންޖެހޭ ގޮތަށް ކަމަށެވެ. އޭގެ މާނައަކީ، ރައީސުލްޖުމްހޫރިއްޔާއަށް ވިސްނިވަޑައިގަންނަވަނީ އެމަނިކުފާނަށް އެ ލޯނުތަކެއް ދެއްކޭނެ ގޮތެއް ހޯދޭކަށެއް ނެތް ކަމަށާއި، ފަސް އަހަރު ވެރިކަން ކޮށްފައި، ދިވެހި ދައުލަތް ކާލައިގެން ދާއިރުގައި އެހެން ބައެއްގެ ބޮލަށް އެކަން ދޫކޮށްލާފައި ދާވިސްނުމެއް ހުރިކަމަށް މައުރޫފް ވިދާޅުވިއެވެ.
