ސިނގިރެޓް އޮޕަރޭޝަން: 103 ފޮށިގަނޑު އަތުލައިގަތް، ބައެއް ފޮށީގައި ދުންފަތް ހުރި
މިފަދަ މައްސަލަ އެއް ފެންމަތިވެފައި މި ވަނީ ސަރުކާރުން އިސްވެ އޮވެ ދުންފަތުގެ ބާވަތްތަކުން ނަގާ ޓެކްސް ބޮޑުކޮށްފައި ވަނިކޮށް
ވަގަށް ސިނގިރެޓް ޕެކްކުރާ ސާމާނުތައް ގެންގުޅުނު މައްސަލަ އެއް ފަޅާ އެރުން
މާލޭގެ ގެއެއްގައި ވަގަށް ސިނގިރެޓް ޕެކްކުރާ ސާމާނުތައް ގެންގުޅުނު މައްސަލަ އެއް ފަޅާ އަރައި ފުލުހުން ހިންގި ސިނގިރެޓް އޮޕަރޭޝަނުގައި 103 ފޮށިގަނޑު އަތުލައިގަތް ކަމަށް ފުލުހުން ބުނެފިއެވެ.
އެނގިފައިވާ ގޮތުން މި ތަކެތި ފެނިފައި ވަނީ ހެންވޭރުގެ ގެއަކުންނެވެ. ރާއްޖެ އެމްވީ އަށް މައުލޫމާތު ލިބިފައިވާ ގޮތުން މި ތަކެތި ބުރާސްފަތި ދުވަހުގެ ރޭގެ ވަގުތެއްގައި ފުލުހުންގެ ބެލުމުގެ ދަށަށް ވަނީ ގެންގޮސްފައެވެ.
ފުލުހުން ބުނީ މި އޮޕަރޭޝަނުގައި 103 ކާޑްބޯޑް ފޮށިގަނޑު އަތުލައިގަނެފައިވާ ކަމަށެވެ. އަދި މީގެ ތެރޭގައި ދުންފަތް ހުރި ފޮށިވެސް ހިމެނޭ ކަމަށެވެ. ނަމަވެސް އެއީ ކިހާ އަދަދެއްގެ ދުންްފަތެއް ކަމެއް، އެއާއި ގުޅުން ހުރި ފަރާތެއް އަދި އިތުރު ތަފްސީލެއް ހާމަކޮށްފައިނުވެއެވެ. ތަކުރާރުކޮށް އެހުމުންވެސް ފުލުހުން އެކަމަށް ޖަވާބެއް ނުދިނެވެ.
މި މައްސަލައިގެ އަޑީގައި ތިބީ ސަރުކާރު ހިންގާ ޕާޓީ އަށް ނިސްބަތްވާ މަޖިލިސް ދެ މެމްބަރަކާއި މާލެ ސިޓީ ކައުންސިލްގެ އިސްމަޤާމެއްގައި ހުރި ހަމަ އެޕާޓީ އަށް ނިސްބަތްވާ ބޭފުޅެއް ކަމަށް ވަނީ އަޑުފެތުރިފައެވެ. އެހެންނަމަވެސް ފުލުހުންނަށް މިކަމާއި ގުޅޭ ގޮތުން މައުލޫމާތު ހޯދުމަށް ގުޅުމުން ފޯނަށް ޖަވާބު ނުދެއްވާތީ މި މައްސަލައިގައި ސަރުކާރަށް ނިސްބަތްވާ އިސް ބައެއްގެ އަތެއްވާ ކަމަށް ދެކެވޭ ވާހަކައިގެ ހަގީގަތް ވަނީ ކަށަވަރުވާގޮތް ނުވެފައެވެ.
މިފަދަ މައްސަލަ އެއް ފެންމަތިވެފައި މި ވަނީ ސަރުކާރުން އިސްވެ އޮވެ ދުންފަތުގެ ބާވަތްތަކުން ނަގާ ޓެކްސް ބޮޑު ކުރުމާއި، ވޭޕް މަނާކުރުމާއި އެކު ދުންފަތުގެ ވަގު މާކެޓަށް ދޮރުހުޅުވިފައިވާ ކަމުގެ އަޑުތައް ގަދަވެފައިވާ ދުވަސްކޮޅެއްގައެވެ.
