ރައީސް ޞާލިހުގެ ސަރުކާރުގައި ހޯރަފުށީގައި ގާއިމްކުރި ހާފްވޭ ހައުސް ރައީސް މުއިއްޒު ހުޅުވައިދެއްވައިފި

ކުރީހެ ރައީސް އިބްރާހިމް މުހައްމަދު ޞާލިހުގެ ސަރުކާރުގައި ހޯރަފުށީގައި ގާއިމުކޮށް ފުރިހަމަ ކޮށްފައިވާ ހާފްވޭ ހައުސް ރައީސް ޑރ. މުހައްމަދު މުއިއްޒު ބުރާސްފަތި ދުވަހު ހެނދުނު ހުޅުވައިދެއްވައިފިއެވެ.

ހއ. ހޯރަފުށީ ހާފްވޭ ހައުސް އިމާރާތް ކުރުމުގެ މަޝްރޫޢުއަކީ 15.6 މިލިއަން ރުފިޔާއަށް ރައީސް ޞާލިހުގެ ސަރުކާރުން އެމްޓީސީސީއާ ހަވާލުކުރި މަޝްރޫޢުއެކެވެ.

މި މަޝްރޫޢުގެ ދަށުން، ގްރައުންޑް މަސައްކަތްތަކާއި، ކޮންކްރީޓް މަސައްކަތްތަކާއި، މޭޝަނަރީ އަދި ޕްލާސްޓަރިންގ މަސައްކަތްތަކާއި، ފުރާޅު އަދި ސީލިންގ މަސައްކަތްތަކާއި، ދޮރާއި ކުޑަދޮރު ހަރުކުރުމާއި، ފިނިޝިންގ މަސައްކަތްތަކާއި، މެކޭނިކަލް، އިލެކްޓްރިކަލް އަދި ޕްލަމްބިންގް މަސައްކަތްތަކާއި، އަލިފާން ނިއްވާ ސިސްޓަމް ހަރުކުރުމުގެ މަސައްކަތް ނިންމާލާފައިވަނީ 25 ޖެނުއަރީ 2024 ގައެވެ.

ސަރުކާރުން މި މަސައްކަތް އެމްޓީސީސީ އާ ހަވާލު ކުރީ 2022 ވަނަ އަހަރުގެ އޮކްޓޯބަރު މަހުގެ ތެރޭގައެވެ.

ކުރީ ސަރުކާރުން އިމާރާތް ފުރިހަމަ ކޮށް އެތަން ހުޅުވަން ތައްޔާރުކޮށް މުވައްޒަފުންލާފައި ވަނިކޮށް 6 ޖޫން 2024 ގައި ހާފްވޭ ހައުސް އުވާލުމަށްފަހު އެތަނުގައި މަސައްކަތް ކުރަމުންދިޔަ މުވައްޒަފުން މި ސަރުކާރުން ވަޒީފާއިން ވަކިކުރިއެވެ. މުވައްޒަފުން ވަޒިފާއިން ވަކިކޮށް ފޮނުވި ސިޓީގައި އެއިރު ބުނެފައިވަނީ ހޯރަފުށީގެ ހާފްވޭ ހައުސް އުވާލީ އެ ހިދުމަތް ދޭނެ ކުދިން ނެތުމުން ކަމަށެވެ. މީގެއިތުރުން، ހާފްވޭހައުސް އިމާރާތް ޖުވެނައިލް ރެޒިޑެންޝިއަލް ސެންޓަރަކަށް ބަދަލުކުރުމަށް ނިންމާފައިވާ ކަމަށް އެ ސިޓީގައި ބަޔާންކޮށްފައިވެއެވެ.

ނަމަވެސް ރައީސް ޑރ. މުހައްމަދު މުއިއްޒު ހއ. އަތޮޅަށް ކުރައްވަމުން ގެންދަވާ ދަތުރުފުޅުގައި ހާފްވޭ ހައުސް ރަސްމީކޮށް ވަނީ ހުޅުވާފައެވެ. މިއީ ކުޑަކުދިންގެ އަދުލުގެ ޤާނޫނުގެ ދަށުން ކުށުގެ ވެއްޓަށް ހުށަހެޅޭ ކުޑަކުދިން އަނބުރާ މުޖުތަމައަށް ނެރުމުގެ ކުރިން ފަރުވާ ދިނުމަށް ބައިތިއްބުމަށް ހަދާ ތަނެކެވެ. ހާފްވޭ ހައުސްގައި އެކި ކުށްތަކުގައި ގެންނަ ކުދިންނަށް ފަރުވާއާއި އެހީތެރިކަން ފޯރުކޮށްދީ، އެ ކުދިން އަނބުރާ މުޖުތަމަޢުއަށް ނެރުމުގައި ބޭނުންވާ އެހީތެރިކަމާ ރިހެބިލިޓޭޝަން ފަރުވާ ފޯރުކޮށްދޭނެއެވެ.

މި ފެސިލިޓީ ތަރައްގީކޮށްފައިވަނީ ހޯރަފުށީގައި 10،000 އަކަފޫޓުގެ ބިމެއްގައެވެ. އިމާރާތުގެ ބިންގާ އަޅުއްވައިދެއްވީ އޭރުގެ ހޯމް މިނިސްޓަރ ޢިމްރާން ޢަބްދުﷲ 29 ޖުލައި 2022 ގައި ބޭއްވުނު ބިންގާ އެޅުމުގެ ރަސްމިއްޔާތުގައެވެ.