އައްޑޫ ހިތަދޫ ފެނަކަ ބްރާންޗުގައި މަސައްކަތް ކުރާ 20 އަށް ވުރެ ގިނަ މުވައްޒަފުންގެ ރިސްކު އެލަވަންސް ކަނޑާލައިފި
މީގެ ކުރިން ދެމުން އައި 6500 ރުފިޔާގެ އެލަވަންސް މި މަހުގެ 15ން ފެށިގެން ވަނީ ކަނޑާލާފަ
ކުންފުނީގެ ހިންގުމުގެ ހަރަދުން 160 މިލިއަން ރުފިޔާ ކުޑަކުރެވިފައިވާ ކަމަށް ފެނަކައިން ބުނެފި
އައްޑޫ ސިޓީ ހިތަދޫ، ފެނަކަ ބްރާންޗުގެ ފެނާއި ނަރުދަމާގެ މަސައްކަތް ކުރަމުން އަންނަ 20ށް ވުރެ ގިނަ މުވައްޒަފުންގެ ރިސްކް އެލަވަންސް ކަނޑާލައިފިއެވެ.
ރާއްޖެޓީވީގެ "ފަށާއިރު" ޕްރޮގްރާމަށް ފޯނުން މައުލޫމާތު ދެމުން އައްޑޫ ހިތަދޫ ފެނަކަ ބްރާންޗުގައި މަސައްކަތް ކުރަމުން އަންނަ ލޭބަރ އަހުމަދު ނަސީމް ބުނީ މީގެ ކުރިން ދެމުން އައި 6500 ރުފިޔާގެ އެލަވަންސް މި މަހުގެ 15 އިން ފެށިގެން ކަނޑާލައިފައިވާކަން ފެނަކައިން އަންގާފައިވާ ކަމަށެވެ.
ނަސީމް ބުނީ ހިތަދޫ ފެނަކަ ބްރާންޗުގައި ފެނާއިނަރުދަމާގެ މަސައްކަތް ކުރާ 20 އަށްވުރެ ގިނަ މުވައްޒަފުން އުޅޭ ކަމަށާއި އެ ހުރިހާ މުވައްޒަފުންނަށް ވެސް މި އެލަވަންސް ކަނޑާލި ކަން މިހާރު އަންގާފައިވާ ކަމަށެވެ. އެލަވަންސް ކަނޑާލުމުން އެކަމުގެ ކަންބޮޑުވުން ފާޅުކޮށް ނަސީމް ބުނީ މުޅި ދިރިއުޅުމުގެ އެންމެހާ ކަންކަން ހަމަޖައްސަމުން އައީ އެ އެލަވަންސުން ލިބެމުން އައި ލާރި ހިމަނައިގެން ކަމަށެވެ. އެގޮތުން ނަގާފައިވާ ލޯނާއި، ކުދިންގެ ޓިއުޝަން ފީއާއި ގޭގެ އެހެނިހެން ޚަރަދުތައް ވެސް ހަމަޖައްސަމުން އައީ އޭގެން ކަމަށް ވެސް އޭނާ ބުންޏެވެ. ނަސީމް ބުނީ އެ އެލަވަންސް ކަނޑާލުމުން ދެން ދިރިއުޅުމުގެ ކަންކަން ދެކޮޅު ނުޖެއްސޭނޭކަމަށެވެ.
އޭނާ އިތުރަށް ބުނީ ފެނާއި ނަރުދަމާގެ މަސައްކަތަކީ ވަރަށް ބުރަ އަދި އެހާމެ ރިސްކު ބޮޑު މަސައްކަތެއް ކަމަށާއި ބައެއް ފަހަރު މުޅި ގައިގައި ނަޖިސް އުނގުޅައިގެން ބޮޑެތި ފުން ޖަންގްޝަން ވަޅުގަނޑުތަކަށް ވެސް އެރެހެން ޖެހޭ ކަމަށެވެ. އަދި އެހެން އުޅުމުގެ ތެރޭގައި އެއްފަހަރު ވަޅުވެސް ލެވުނު ކަން އޭނާ ފާހަގަކުރިއެވެ.
ފެނަކަ މުވައްޒަފު ނަސީމް، ފާޅުކުރި މި ކަންބޮޑުވުންތަކާއި ގުޅިގެން އެކަން އިތުރަށް ސާފުކޮށްލުމަށް ފެނަކަ ހިތަދޫ ބްރާންޗްގެ މެނޭޖަރ މުހައްމަދު އަލްޠާފަށް ގުޅާލުމުން، އޭނާ ވިދާޅުވީ އެ އެލަވަންސް އަކީ މަހުން މަހަށް ދޭ އެލަވަންސް އެއް ނޫންކަމަށެވެ. އަދި އެއީ ރަސްމީ ގަޑިތަކުގެ އިތުރުން ދިމާވާ ބައެއް ހާލަތްތަކުގައި ކުރާ ޚާއްޞަ މަސައްކަތްތަކަށް ދިނުމަށް ކަނޑައަޅާފައިވާ އެލަވަންސެއް ކަމަށެވެ.
އަލްތާފް ވިދާޅުވީ އާންމުކޮށް އެ އެލަވަންސް ކަނޑައަޅާފައި އޮންނަނީ، ރަސްމީ ގަޑީގެ އިތުރުން، ކަރަންޓާއި ފެނުގެ މައްސަލަ އަދި ނަރުދަމާގެ މައްސަލައެއް ދިމާވެއްޖެ ނަމަ އެ ކުރާ މަސައްކަތަކަށް ދެމުން އަންނަ އެލަވަންސެއް ކަމަށެވެ. އެގޮތުން އެހެން މަސައްކަތަށް ނުކުންނަ ކޮންމެ ދުވަހަކަށް 250 ރުފިޔާފެ ރޭޓުން އެ އެލަވަންސް ދެމުން އަންނަކަމަށް އޭނާ ވިދާޅުވިއެވެ.
އައްޑޫ ސިޓީ ހިތަދޫ ފެނަކަ ބްރާންޗުގައި ފެނާއިނަރުދަމާގެ މަސައްކަތް ކުރަމުން އަންނަ ގިނަ އަދަދެއްގެ މުވައްޒަފުންތަކަށް ދެމުން އަންނަ ޚާއްޞަ އެލަވަންސެއް ކަނޑާލި ކަމަށް ބުނާއިރު، 2022 ވަނަ އަހަރު، އެ ރަށުގައި ނަރުދަމާ އެޅުމަށް ކޮންނަމުން ދިޔަ ވަޅެއްގައި ދެ މީހަކު ތާށިވެ، ފަރުވާދީފައިވެއެވެ. އޭގެ ތެރެއިން އެކަކަށް ސީރިއަސް އަނިޔާތަކެއް ވެ އައިސީޔޫގައި ވެސް ފަރުވާދީފައިވެއެވެ.
