ރައީސް މުއިއްޒު ހއ. އަށް ކުރައްވާ ދަތުރުފުޅުގެ ވަފުދުގައި 59 ބޭކަލުން

ރައީސް މުހައްމަދު މުއިއްޒު ތިލަދުއްމަތީ އުތުރުބުރީގެ ބައެއް ރަށްތަކަށް ކުރައްވާ ދަތުރުފުޅުގެ ވަފުދުގައި 59 ބޭކަލުން ހިމެނެއެވެ.

ޖެނުއަރީ މަހުގެ 28 ވާ އަންގާރަ ދުވަހުން 30 ވާ ބުރާސްފަތި ދުވަހުގެ ނިޔަލަށް ކުރައްވާ މި ދަތުރުފުޅުގައި ހއ. ގެ 10 ރަށަކަށް ވަޑައިގަތުމަށް ވަނީ ހަމަޖެހިފައެވެ.

މުއިއްޒުގެ ދަތުރުފުޅުގައި ވަޑައިގަތުމަށް ހަމަ ޖެހިފައިވަނީ މުރައިދޫ، ފިއްލަދޫ، އުތީމު، ދިއްދޫ، ތަކަންދޫ، މާރަންދޫ، އިހަވަންދޫ، ހޯރަފުށި، މޮޅަދޫ އަދި އުލިގަމަށެވެ.

މުއިއްޒުގެ މި ދަތުރުފުޅުގައި އެ ރަށްރަށުގެ ކައުންސިލް އާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީ އާއި ރަށުގެ މުއައްސަސާ ތަކުގެ އިސްވެރިންނާ ބައްދަލު ކުރުމަށް ހަމަ ޖެހިފައިވާ ކަމަށް މައުލޫމާތު ލިބިފައިވެއެވެ.

މުއިއްޒުގެ ދަތުރުފުޅުގައި 9 ކެބިނެޓް މިނިސްޓަރުން ހިމެނުމުގެ އިތުރުން ރައީސް އޮފީހުގެ މިނިސްޓަރުންނާއި ބައެއް ކުންފުނިތަކުގެ އެމްޑީން ނާއި އެ ދާއިރާތަކުގެ މަޖިލިސް މެމްބަރުން ވެސް ހިމެނެއެވެ.

މުއިއްޒުގެ ދަތުރުފުޅު ފެއްޓެވުމުގެ ކުރިން އެޑްވާންސް ޓީމުގެ ގޮތުގައި ސަޕޯޓް ސްޓާފުންގެ ޓީމެއް އެ ސަރަހައްދަށް ދަތުރު ކުރުމަށް ވަނީ ހަމަޖެހިފައެވެ.

ސަޕޯޓް ސްޓާފުންގެ ގޮތުގައި 21 މީހުން ގެ ޓީމެއް ގެންދަވާއިރު އޭގެ ތެރޭގައި ސެކިއުރިޓީ އޮފިޝަލުންގެ އިތުން ފޮޓޯ ނަގާ މީހުންނާއި ވީޑިއޯ ނަގާ މީހުންނާއި އިދާރީ މީހުން ހިމެނެއެވެ.

އޭގެ އިތުރުން އެޑްވާންސް ޓީމުގައި ޕަބްލިކް ސާވިސް މީޑީއާގެ 7 މީހުން ދަތުރުފުޅުގެ މަންޒަރުތައް ވަގުތުން ގެނެސްދިނުމަށް ކުރިން އެ ސަރަހައްދަށް ވަނީ ފޮނުވާފައެވެ.

މީގެ އިތުރުން މީޑިއާ ގެ ގޮތުގައި 10 މީހުން މި ދަތުރުފުޅުގައި އަރިހުގައި ގެންދަވައެވެ. އޭގެ ތެރޭގައި ސޯޝަލް މީޑިއާ މީހުންގެ ގޮތުގައި 4 މީހުން ހިމެނެއެވެ. ފަރުދުން، ވަގުތު، ސަންގު، ޒުވާން ޖީލު، އަދި މިހާރު ނޫހުގެ މަންދޫބުންވެސް އަރިހުގައި ގެންދަވައެވެ.

ރައީސް މުއިއްޒުގެ މި ދަތުރުފުޅާ ގުޅިގެން ސަރުކާރުން ރަށްރަށުގައި ތަރައްގީގެ އެއްވެސް މަސައްކަތެއް އެކަށީގެންވާ ގޮތެއްގައި ކުރިއަށް ނުގެންދާތީ ސުލްހަވެރި ކަމާއެކު އިހްތިޖާޖު ކުރުމަށް ކުރަމުން ގެންދާ މަސައްކަތްތަކަށް ފުލުހުން މެދުވެރިކޮށް ހުރަސް އަޅަމުން ގެންދާ ކަންބޮޑުވުން ވަނީ އުފެދިފައެވެ.

ސަރުކާރުން ބޮޑެތި ޚަރަދުތައް ކޮށްގެން ބޮޑެތި ވަފުދު ތައް ގޮވައިގެން ރަށްރަށަށް ރައީސް މުއިއްޒު ވަޑައިގަންނަވާ އިރު ސަރުކާރުގެ ފުރަތަމަ އަހަރު ރާއްޖޭގެ ރަށްރަށުގައި ފަށާފައި ހުރި ތަރައްގީގެ މަސައްކަތްތައް ކުރިއަށް ނުގެންދެވުނީ ކުރީ ސަރުކާރުން ބަޖެޓް ހަދާފައި އޮތް ގޮތުން ކަމަށް ރައްޔިތުންގެ ބައްދަލުވުން ތަކުގައި މުއިއްޒު ގެންދަވަނީ ތަކުރާރުކޮށް ވިދާޅުވަމުންނެވެ.