ސައުދީ އަރަބިއްޔާގެ ގައުމީ ސަލާމުގެ މިޔުޒިކް އަލުން ހަދަން މަޝްހޫރު ޔަހޫދީ މިއުޒިކް ކޮމްސޯރ ޒިމަރ އާ ހަވާލު ކުރަނީ

އޮސްކާ އެވޯޑް ކާމިޔާބުކޮށްފައިވާ މަޝްހޫރު މިއުޒިކް ކޮމްޕޯސަރ ހަންސް ޒިމަރ އަށް ސައުދީ އަރަބިއްޔާގެ ޤައުމީ ސަލާމުގެ މިޔުޒިކު އަލުން ތައްޔާރުކޮށްދިނުމަށް އެދި ހުށަހަޅައިފި އެވެ. 

1994 ވަނަ އަހަރުގެ "ދަ ލަޔަން ކިންގް"، "ޑޫން" އަދި "ޑާކް ނައިޓް" ފަދަ މަޝްހޫރު ފިލްމު ތަކުގެ މިޔުޒިކް ތައްޔާރު ކުރި ޒިމަރ ވަނީ މި މަޝްރޫޢުގެ "ލަނޑުދަނޑިތަކަށް" ޖުމްލަ ކޮށް އެއްބަސްވެފައި ކަމަށް ސައުދީ އަރަބިއްޔާގެ ޖެނެރަލް އެންޓަރޓެއިންމަންޓް އޮތޯރިޓީގެ ޗެއަރމަން ތުރުކީ އަލް ޝިޚް ވަނީ ހާމަ ކޮށްފައެވެ.

މަޝްވަރާ ތަކަށް ފަހު، ސައޫދީ އޮފިޝަލް ވަނީ އެކްސް (ޓްވިޓަރ) ގައި މަޝްހޫރު ކޮމްޕޯސަރާއެކު ނަގާފައިވާ ފޮޓޯއެއް ޕޯސްޓްކޮށް، "މިހާރުގެ އެންމެ މޮޅު މިއުޒިކް ކުޅޭ މީހުންގެ ތެރެއިން އެކަކު ކަމުގައިވާ ހަންސް ޒިމަރ އާ މިއަދު ބައްދަލުކުރިން؛" ކަމަށް ލިޔެފައެވެ.

އޭނާ ބުނި ގޮތުގައި ދެފަރާތުން ވަނީ އަވަހަށް "އަލިކަން ފެންނާނެ" އެތައް މަޝްރޫޢުތަކަކާ ބެހޭ ގޮތުން މަޝްވަރާކޮށްފައެވެ.

މަޝްވަރާކުރެވުނު މަޝްރޫޢުތަކުގެ ތެރޭގައި ސައޫދީ ޤައުމީ ސަލާމުގެ މިޔުޒިކް ތަފާތު އިންސްޓްރޫމަންޓްތައް ބޭނުންކޮށްގެން އަލުން ހެދުމާއި، "އަރޭބިއާ" ގެ ނަމުގައި މިއުޒިކް ޕީސް އެއް އުފެއްދުން ހިމެނެއެވެ. އަލް ޝިޚް އިތުރަށް ބުނެފައިވަނީ ދެފަރާތުން ވަނީ ރިޔާދުގައި "ބޮޑު" ކޮންސަޓެއް ބޭއްވުމާ ބެހޭގޮތުންނާއި، "ޔަރްމޫކް ހަނގުރާމަ" އިގެ ފިލްމުގެ ސައުންޑްޓްރެކް އުފެއްދުމާ ބެހޭގޮތުން މަޝްވަރާ ކޮށްފައެވެ.

"އަޅުގަނޑުމެން މި ހުރިހާ މަޝްރޫޢު ތަކަކަށް ޖުމްލަކޮށް އެއްބަސްވެފައި ވަނީ، އަދި އަޅުގަނޑު އުންމީދު ކުރަނީ އަޅުގަނޑުމެންނަށް މިކަންކަމާމެދު ފައިނަލް އެއްބަސްވުމަކަށް އާދެވޭނެ ކަމަށް،" ޝިޚް ބުނެފައިވެއެވެ. 

ސަޢޫދީ ޤައުމީ ސަލާމް، "ޢާޝް އަލް-މަލިކް" (ރަސްގެފާނު ދިގު ޢުމުރެއްގައި ލަހައްޓަވާށި) ލިޔުނީ، ޢަބްދުލްޢަޒީޒް ރަސްގެފާނު ގެ އެދިވަޑައިގަތުމުގެ މަތިން، 1947 ވަނަ އަހަރު މިޞްރުގެ ކޮމްޕޯސަރ ޢަބްދުއްރަޙްމާން އަލް-ޚަޠީބް އެވެ. 

1999 ވަނަ އަހަރު ބަރލިން ފިލްމު ފެސްޓިވަލްގައި ވާހަކަ ދައްކަމުން ޒިމަރ ހާމަކޮށްފައިވާ ގޮތުގައި އޭނާއަކީ ޔަހޫދީއެއް ކަމަށާއި، އަދި އޭނާގެ މަންމަ ދެވަނަ ބޮޑު ހަނގުރާމައިން ސަލާމަތްވީ 1939 ވަނަ އަހަރު ޖަރުމަނު ވިލާތުން ފިލައިގެން އިނގިރޭސި ވިލާތަށް އައުމުގެ ސަބަބުން ކަމަށެވެ.

ޒިމަރ ވަނީ މެދުއިރުމަތީގައި އެތައް ފަހަރަކު ޕަރފޯމްކޮށްފައެވެ. އެންމެ ފަހުން އޭނާ ޔޫއޭއީ އަށް ޒިޔާރަތްކޮށް ކޮންސަޓެއް ދިނީ މޭ 2024 ގައެވެ.