އެމެރިކާ އާއި ދެކުނު ކޮރެއާ އިން އަހަރަކު އެއްފަހަރުު ބާއްވާ އަސްކަރީ ތަމްރީންތައް ފަށައިފި

އެމެރިކާ އާއި ދެކުނު ކޮރެއާ އިން އަހަރަކު އެއްފަހަރު ކުރިއަށް ގެންދާ އަސްކަރީ ތަމްރީންތައް ފަށައިފިއެވެ.

އުތުުރު ކޮރެއާ އިން ހިތްހަމަ ނުޖެހުން ފާޅުކޮށް ބުނެފައި ވަނީ "އަލިފާނަށް ތެޔޮއެޅުން" ފަދަ ކަމެއް އެމެރިކާ އާއި ދެކުނު ކޮރެއާ އިން ކުރަމުން ދާ ކަމަށެވެ.

އެމެރިކާ އިން ބުނަމުން ދަނީ ދެކުނު ކޮރެއާ އާއި އެމެރިކާ އިން ކުރިއަށް ގެންދާ އަސްކަރީ ތަމްރީން ތަކަކީ ދިފާއަށްޓަކައި ކުރަމުންދާ ކަމެއް ކަމަށެވެ. އެހެންނަމަވެސް އުތުރު ކޮރެއާ އިން އަބަދުވެސް ބުނަމުން ދަނީ މިއީ އެގައުމު ހިސޯރު ކުރުމަށް ކުރަމުންދާ ކަމެއް ކަމަށެވެ.

ރިޕޯޓުތައް ބުނާގޮތުން އެމެރިކާ އާއި ދެކުނު ކޮރެއާ އިން ކުރިއަށް ގެންދާ އަސްކަރީ ތަމްރީން ތަކުގައި މިފަހަރު 17000 އެމެރިކާ ސިފައިން ބައިވެރިވާއިރު 50000 ދެކުނު ކޮރެއާ ސިފައިން ބައިވެރިވެއެވެ.

އުތުރު ކޮރެއާ އިން ދަނީ އެމެރިކާގެ ސަރަހައްދެއް ކަމަށްވާ ގުއާމް އަށް ހަމަލާ ދޭނެ ކަމަށް ބުނެެ އިންޒާރުވެސް ދެމުންނެވެ. އަދި ނިއުކްލިއާ ހަތިޔާރު ފައްކާކުރުމުގެ ޕްރޮގްރާމް ހިންގާ މިސައިލް ޓެސްޓްތައް ވެސް ކުރަމުންނެވެ. ޕެސިފިކްގައި އޮންނަ އެމެރިކާގެ ސަރަހައްދެއް ކަމަށްވާ ގުއާމް ކަނޑަށް މިސައިލް ހަމަލާ ދިނުމާ ބެހޭ ޕްލޭން އުތުރު ކޮރެއާގެ ލީޑަރު ކިމް ޖޮން-އުން ރިވިއުކޮށްފައިވާ ކަމަށާއި އެހެން ނަަމަވެސް ސީދާ ވަކި ގޮތެއް ނިންމުމުގެ ކުރިން އެމެރިކާގެ އަމަލުތަކަަށް ބަލާނެ ކަމަށް އުތުރު ކޮރެއާ އިން ބުނިތާ އަދި މާގިނަ ދުވަހެއް ނުވެއެވެ.

ބައިނަލްއަގްވާމީ ދުނިޔެއިން ތަކުރާރުކޮށް އުުތުރު ކޮރެއާ އަށް އަންގަމުން ދަނީ ނިއުކްލިއާ ހަތިޔާރު ފައްކާކުރުމުގެ ޕްރޮގްރާމް ހުއްޓާލުމަށާއި އަދި މިސައިލް ޓެސްޓްތައް ކުރުން ހުއްޓާލުމަށެވެ. އެހެންނަމަވެސް އުތުރު ކޮރެއާ އިން ބައިނަލްއަގްވާމީ ދުނިޔޭގެ ގޮވުންތަކަށް ދަނީ ބީރުކަންފަތެއް ދެމުންނެވެ. އދ. އިން ދާދިފަހުން ވަނީ އުތުރު ކޮރެއާއާ ދެކޮޅަށް ދަތިކުރުމުގެ ފިޔަވަޅުތައް ވެސް އަޅާފައެވެ.