އެމެރިކާ އިން އަންސާރު ﷲ ޖަމާއަތަކީ ޓެރަރިސްޓް ޖަމާޢަތެއްގެ ގޮތުގައި ފަހުން ކަނޑައެޅި ކަނޑައެޅުން ވެސް ފެއިލްވާނެ ކަމަށް އެ ޖަމާއަތުގެ ތަރުޖަމާނުގެ ނައިބު ނަސްރުއްދީން ޢާމިރު، ބުރާސްފަތި ދުވަހު ވިދާޅުވެއްޖެ އެވެ. އޭނާ ވިދާޅުވީ އެކަން ނާކާމިޔާބު ވާނީ ކަނޑުމަތީގައި އެ ޖަމާޢަތާ ކުރިމަތިލުމަށް އެމެރިކާއިން ކުރި މަސައްކަތްތައް ބަލިކަށިވެގެން ދިޔަ ފަދައިން ކަމަށެވެ. 

"އެމެރިކާގެ އެކުވެރިންގެ ލިސްޓުގައި ހިމެނުމަކީ ޓެރަރިސްޓް ޖަމާޢަތެއްގެ ގޮތުގައި ކަނޑައެޅުމަށްވުރެ މާ ބޮޑު ނުރައްކަލެއް އަދި މާ ބޮޑަށް ކަންބޮޑުވާންޖެހޭ ކަމެކެވެ،" އޭނާ ވިދާޅުވިއެވެ. 

ޢާމިރު އިތުރަށް ވިދާޅުވީ އެމެރިކާއިން ޢަމަލުތައް ބައްޓަން ކުރަނީ ޔަމަނުގެ ރައްޔިތުންނާ ދެކޮޅަށް ކަމަށެވެ. އަދި އެކަން އެގޮތައް ކުރަނީ އެ ޖަމާއަތުން ޣައްޒާ އަށް ދޭ އެހީތެރިކަމުގެ ސަބަބުން ކަމުގައެވެ. އަދި މި ކަނޑައެޅުމަކީ ޔަމަނީން ނަށް ލިބުނު ވަރަށް ބޮޑު ޝަރަފެއް ކަމަށާއި އެ ކަމަކީ އެމެރިކާ އަށް ލިބެމުންދާ ދެމިގެންދާ ނިކަމެތިކަމުގެ ތެރޭގައި ހިމެނޭ ކަމެއް ކަމަށް އޭނާ ވިދާޅުވިއެވެ. 

އެ ޖަމާއަތުން ކުރިން ވެސް ސާފުކޮށްދީފައި ގޮތުގައި އެމެރިކާގައި އެ ޖަމާއަތުގެ އެއްވެސް އިންވެސްޓްމަންޓެއް، ބޭންކު އެކައުންޓެއް ނުވަތަ ވިޔަފާރިއެއް ނެތް ކަމަށާއި އެ އެ ޖަމާއަތުގެ މެންބަރުން އެމެރިކާ އަށް ދަތުރު ނުކުރާ ކަމަށެވެ. 

ފަލަސްޠީނުގެ މުޖާހިދީން ޙަރަކާތުން ބުރާސްފަތި ދުވަހު ނެރުނު ބަޔާނެއްގައި ބުނެފައިވަނީ ހޫތީން ނަކީ ޓެރަރިސްޓް ޖަމާއަތެއް ކަމަށް އެމެރިކާގެ އައު ސަރުކާރުން ކަނޑައެޅި ކަނޑައެޅުމަކީ ހަމައެކަނި ޔަމަނުގެ ރައްޔިތުންނާ ދެކޮޅަށް ކުރެވޭ ޢަމަލެއް ނޫން ކަމަށެވެ. އަދި އެއީ އިންސާނިއްޔަތުކަމުގެ އަގު ދަށްކުރާ ކަމެއް ކަމަށާއި، އިސްރާއީލަށް ފަހިވާ ގޮތަށް ކުރި ކަމެއް ކަމަށާއި، ޣައްޒާގައި ފަލަސްޠީނުގެ ރައްޔިތުންނާ ދެކޮޅަށް އިސްރާއީލުން ހިންގާ ޖަރީމާތަކަށް އިތުރު ހިތްވަރެއް ދިނުމަށް ކުރި ކަމެއް ކަމަށެވެ. 

މި ބަޔާނުގައި ބުނެފައިވަނީ އެމެރިކާގެ މި ނިންމުމުގެ ސަބަބުން "ޣައްޒާ ގައި ޞަހްޔޫނީ މުޖުރިމުން ހިންގަމުންދާ ނަސްލު ނައްތާލުމުގެ އަމަލުތަކުގެ މައިގަނޑު ބައިވެރިއެއްގެ ގޮތުގައި އެމެރިކާ ހިމެނޭކަން ކަށަވަރުވެއެވެ." 

ފަލަސްތީނުގެ މުޖާހިދީން ޙަރަކާތުން ބުނެފައިވާ ގޮތުގައި ފަލަސްތީން މީހުންނަށް އެހީތެރިވުމުގައި ޔަމަނުގެ ބާރުތަކުން އަދާ ކުރަނީ މުހިންމު ދައުރެއް ކަމަށެވެ. އަދި ޔަމަނުން ކުރަމުން ދަނީ ޝަރަފުވެރި މަސައްކަތެއް ކަމަށާއި، ޣައްޒާގައި ފަލަސްތީން ރައްޔިތުންނާ ދެކޮޅަށް އިސްރާއީލުން ހިންގަމުންދާ ގަތުލުއާންމާ ދެކޮޅަށް ކުރެވޭ މަސައްކަތުގައި މުހިންމު މަސައްކަތެއް ކަމަށް ސިފަކޮށްފައިވެއެވެ. 

"ޔަމަނުގެ އަންސާރުﷲ އާ ދެކޮޅަށް އެމެރިކާއިން ނިންމި މި އައު ނިންމުމަކީ ޝަރަފުގެ ނިޝާނެކެވެ. އަދި އެ ބައިމީހުން ތިބީ ރަނގަޅު މަގުގައިކަން ސާބިތުކޮށްދޭ ކަމެކެވެ،" މި ބަޔާނުގައި އިތުރަށް ބުނެފައިވެއެވެ. 

އެމެރިކާގެ ރައީސް ޑޮނަލްޑް ޓްރަމްޕް ވަނީ ބުދަ ދުވަހު ރަސްމީކޮށް އަންސާރުﷲ އަކީ ބައިނަލްއަޤްވާމީ ޓެރަރިސްޓް ޖަމާޢަތެއްގެ ގޮތުގައި ކަނޑައަޅުއްވާފައެވެ. މިކަން މި ގޮތައް ކަނޑައަޅާ ވައިޓް ހައުސްއިން ބުދަ ދުވަހު ނެރުނު ބަޔާނެއްގައި ބުނެފައިވެއެވެ. މިއީ އެ ޖަމާއަތަކީ ޓެރަރިސްޓް ޖަމާއަތެއްގެ ގޮތުގައި ޓްރަމްޕްގެ ފުރަތަމަ ދައުރުގައި ނިންމި ނިންމުން ބައިޑެންގެ ސަރުކާރުން ބަދަލުކޮށްފައި ވަނިކޮށް ދެވަނަ ފަހަރަށް އެ ޖަމާއަތް ޓެރަރިސްޓުންގެ ލިސްޓުގައި އެމެރިކާ އިން މިވަނީ ހިމަނާފައެވެ.

މިއީ ޔަމަނުގެ ރައްޔިތުން ޣައްޒާއަށް ދެމުންދާ އެހީތެރިކަން ހުއްޓުވުމަށް ޓަކައި، ސަރަޙައްދުގައި ތިބި އެމެރިކާގެ އާއި ބައިވެރިވާ ބާރުތައް ޔަމަނާ ދެކޮޅަށް ބޭނުން ކޮށްފާނެ ކަމުގެ އިންޒާރެކެވެ. 

ތަޖުރިބާކާރުން ބުނަނީ، މި ގޮތަށް ކަނޑައެޅުމަކީ ޔަމަނުގެ ސިފައިން އިސްރާއީލުން ހިސޯރުކޮށްފައިވާ ސަރަޙައްދުތަކަށް ދެމުންދާ ހަމަލާތަކާއި، 2023 ވަނަ އަހަރުގެ ނޮވެމްބަރު މަހުން ފެށިގެން އެމެރިކާގެ ކަނޑުގެ އުޅަނދުފަހަރަށާއި އިސްރާއީލާ ގުޅުންހުރި އުޅަނދުފަހަރަށް ޔަމަނުން ދެމުންދާ ހަމަލާތަކަށް ދިން ރައްދެއް ކަމުގައެވެ. މި ހަމަލާތައް ދެމުން އަންނަނީ އިސްރާއީލުން ޣައްޒާގައި ހިންގަމުން ދިޔަ އަނިޔާވެރި ހަނގުރާމަ އާ ދެކޮޅު ހަދާ ފަލަސްޠީނުގެ ރައްޔިތުންނަށް ހިތްވަރުދީ ބައިވެރިވުމުގެ ގޮތުން ކަމަށް އެ ޖަމާއަތުން ބުނެފައިވެއެވެ.