ރަސްގެތީމުގެ ތަރައްޤީއަށް ވި ވައުދުތަކުގެ ހަޤީޤީ ކުލަ މިއަހަރުގެ ތެރޭގައި ޖެހިގެން ދާނެ: ރައީސް

މިއަހަރަކީ މާޅޮސްމަޑުލު އުތުރުބުރީ ރަސްގެތީމުގެ ތަރައްޤީއަށް ވެ ވަޑައިގެން ވައުދުތަކުގެ ހަގީގީ ކުލަ ޖައްސާނެ އަހަރުކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އަތޮޅުތެރެއަށް ފަށްޓަވާފައިވާ ދަތުރުފުޅުގެތެރެއިން ރަސްގެތީމަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

Advertisement

ރައީސް ވިދާޅުވީ އެމަނިކުފާނު ރަށްރަށަށް ރައްޔިތުންގެ ގާތަށް ވަޑައިގަންނަވަނީ އެރަށްރަށުގެ ތަރައްޤީއަށް ހުރި ކަންކަން ބާރު ސްޕީޑުގައި ކުރިއަށް ގެންދަވާނެކަމުގެ ޔަޤީންކަން ދެއްވުމަށްކަމަށެވެ.

މިދިޔަ އަހަރަކީ ރާއްޖެއަށް އިޤްތިޞާދީ ބޮޑެތި ގޮންޖެހުންތަކެއް ކުރިމަތިވި އަހަރެއްކަން ފާހަގަކުރައްވަމުން ރައީސް ވިދާޅުވީ އެހާލަތުން އަރައިގަތުމަށް ކުރި މަސައްކަތްތަކަށް ކުރިއެރުން ލިބިފައިވާކަމަށެވެ. އަދި އެމަނިކުފާނުގެ ކެމްޕޭންގައި ރަސްގެތީމަށް ގިނަ ވަޢުދުތަކެއް ވެވަޑައިގެންފައިވާތީ އެކަންކަން ފުރިހަމަކުރެއްވުމުގެ ގިނަ މަސައްކަތްތަކެއް މިއަހަރު ކުރިއަށްގެންދަވާނެކަމަށް ރައީސް ވިދާޅުވިއެވެ. އަދި މިއަހަރު ގިނަ މަޝްރޫޢުތައް ނިންމަވާނެކަމުގެ ޔަޤީންކަންވެސް ރައީސްދެއްވިއެވެ.

ރައީސް ވިދާޅުވީ އެމަނިކުފާނު ވަޢުދު ވެވަޑައިގެންވާ ފަދައިން ރަސްގެތީމުގެ ބަނދަރުގެ މަސައްކަތް މިއަހަރު ކުރިއަށްދާނެކަމަށާއި، އެރަށު ސްކޫލަށް ކްލާސްރޫމާއި މަލްޓި ޕާރޕަސް ހޯލު އިތުރުކުރުންވެސް ކުރިއަށްދާނެކަމަށެވެ. އަދި ކުޅިވަރުގެ ދާއިރާއިން ފުޓްސަލް ދަނޑާއި އެނޫންވެސް ވަސީލަތްތައް ޤާއިމްކޮށްދެއްވާނެކަމަށާއި، ކުނި މެނޭޖުކުރުމުގެ މަސައްކަތާއި، ފެނާއި ނަރުދަމާގެ މަސައްކަތުގެ މައްސަލަތައް ޙައްލުކޮށް ރަސްގެތީމުގެ މައި މަގުތައް ތަރައްޤީކުރުމުގެ މަސައްކަތްވެސް ކުރައްވާނެކަމަށް ރައީސް ވިދާޅުވިއެވެ..

މީގެއިތުރުން މުޅި ރާއްޖެއަށް އޮތް ކަރަންޓުގެ މައްސަލަ ޙައްލުކޮށް، ސިއްޙީ މައްސަލަތައް ޙައްލުކުރުމަކީވެސް އެމަނިކުފާނު ވެވަޑައިގެންނެވި ވަޢުދެއްކަން ފާހަގަކުރައްވާ ރައީސް ވަނީ އެކަންކަމަށް އިސްކަންދެއްވައިގެން މަޝްރޫޢުތައް ހިންގަވާނެކަމަށް ވިދާޅުވެފައެވެ.

ރައީސް ވިދާޅުވީ މިއަހަރަކީ ރަސްގެތީމުގެ ތަރައްޤީގައި ހަގީގީ ކުލަ ޖައްސަވާނެ އަހަރުކަމަށެވެ. ގިނަ މަޝްރޫޢު މިއަހަރު ނިންމަވައި، އުންމީދަކީ މިއަހަރު އިތުރު ދަތުރުފުޅެއްގައި ރަސްގެތީމަށް ވަޑައިގަތުންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.