ހޯމަ ދުވަހުގެ ހެނދުނުން ފެށިގެން، އިސްރާއީލުގެ ބާރުތަކުން ޣައްޒާގެ 5 ސަރަޙައްދަކަށް ބޮން އަޅައިފި
އިސްރާއީލުން ދެމުންދާ އަނިޔާވެރި ހަމަލާތަކުގެ ސަބަބުން މިހާތަނަށް މަދުވެގެން 46,584 ފަލަސްޠީނު މީހުން ޝަހީދުވެފައިވޭ.
2025 ޖެނުއަރީ 11 - ޣައްޒާގެ ދީރުލް ބާލާހުގައި ޓެންޓުތަކަށް އިސްރާއީލުން ދިން ހަމަލާއަށް ފަހު ކުޑަކުދިން ހިމެނޭ ގޮތަށް ފުރާނަ ގެއްލުނު މީހުންގެ ހަށިގަނޑުތައް އަލް އަގްސާ ޝަހީދުންގެ ހޮސްޕިޓަލަށް ގެންނަނ
ހޯމަ ދުވަހުގެ މެންދުރުފަހު، އިސްރާއީލުގެ ހަނގުރާމަމަތީ މަތިންދާބޯޓުތަކުން ޣައްޒާ ސިޓީ އަށް ވައިގެ މަގުން ދިން ހަމަލާތަކުގެ ސަބަބުން 4 ފަލަސްޠީނު މީހުން ޝަހީދުވެ، އަދި އެތައް ބަޔަކު ޒަޚަމްވެއްޖެއެވެ.
ސަރަޙައްދުގެ މެޑިކަލް މަސްދަރުތަކުން މަޢުލޫމާތު ދިން ގޮތުގައި، ޝައިޚް ރަޟްވާން ސަރަޙައްދުގައި އެއްވެ ތިބި އާންމުންގެ ބަޔަކަށް އިސްރާއީލުގެ ބާރުތަކުން ދިން ހަމަލާއެއްގައި 2 އާންމު ރައްޔިތުން ޝަހީދުވެ، އިތުރު ބަޔަކަށް އަނިޔާވިއެވެ.
މީގެ އިތުރުން، ޣައްޒާ ސިޓީގެ އަލް-ޔަރްމޫކް ސަރަޙައްދާ ކައިރިން އާންމުންގެ ބަޔަކު އެއްވެ ތިބި ތަނަކަށް ދިން އިތުރު ވައިގެ ހަމަލާއެއް ގައި އިތުރު 2 މީހުން ޝަހީދުވެ، އިތުރު ބަޔަކު ޒަޚަމްވި ކަމަށް ރިޕޯޓް ކޮށްފައިވެއެވެ.
ހޯމަ ދުވަހުގެ ހެނދުނުން ފެށިގެން، އިސްރާއީލުގެ އިސްތިއުމާރީ ބާރުތަކުން ޣައްޒާ ސްޓްރިޕްގެ ތަފާތު 5 ސަރަޙައްދަކަށް ވައިގެ ހަމަލާތައް ދީފައިވާކަމަށާއި، މިކަމުގެ ސަބަބުން މީހުން މަރުވުމުގެ އިތުރުން ބޮޑެތި ގެއްލުންތަކެއް ލިބުނު ކަމަށް ސަރަޙައްދުގެ މަސްދަރުތަކުން މަޢުލޫމާތު ހާމަކޮށްފައިވެއެވެ.
މީގެ އިތުރުން، އިސްރާއީލުގެ އާޓިލަރީން ޣައްޒާ ސްޓްރިޕްގެ ދެކުނުގައިވާ ރަފަހްގެ އުތުރު ސަރަޙައްދުތަކުގައި ހުރި ގެތަކަށް ބަޑިޖަހާފައިވެއެވެ.
ޣައްޒާ ސްޓްރިޕްގެ އުތުރުގައިވާ ބައިތު ހާނޫންގައި ހުރި ގިނަ އަދަދެއްގެ ގެތަކެއް އިސްރާއީލުގެ ބާރުތަކުން ހުޅުޖަހާ ރޯކޮށްފައިވާކަމަށް ރިޕޯޓުތައް ބުނެއެވެ.
2023 ވަނަ އަހަރުގެ އޮކްޓޯބަރު 7 ން ފެށިގެން ޣައްޒާއަށް އިސްރާއީލުން ދެމުންދާ އަނިޔާވެރި ހަމަލާތަކުގެ ސަބަބުން މިހާތަނަށް މަދުވެގެން 46,584 ފަލަސްޠީނު މީހުން ޝަހީދުވެފައިވާ ކަމަށް ރެކޯޑް ކުރެވިފައިވެއެވެ. އޭގެ އިތުރުން، 109,731 އަށްވުރެ ގިނަ މީހުން އިސްރާއީލުގެ ހަމަލާތަކުގައި ޒަޚަމްވެފައިވެއެވެ.
