މިދިޔަ ސަރުކާރުން ބަޖެޓު ހަދާފައި އޮތީ ގަސްދުގައި އެއްވެސް ކަމެއް ނުކުރެވޭގޮތަށް: ރައީސް މުއިއްޒު

ނިމިގެން ދިޔަ އެމްޑީޕީ ސަރުކާރުން ފާސްކޮށްފައި އޮތް ޖަޓަކީ ގަސްދުގައި އެއްވެސް ކަމެއް ނުކުރެވޭގޮތަށް ފާސްކޮށްފައި އޮތް ބަޖެޓެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަނެއްކާވެސް ވިދާޅުވެއްޖެއެވެ.

ހުވަދޫ އަތޮޅަށް ކުރައްވާ ދަތުރުގައި ގދ. ހޯނޑެއްދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ރައީސް މުއިއްޒު ވިދާލުވީ މި ސަރުކާރުން އެންމެ އިސްކަމެއް ދެއްވާނެ، އަދި އެންމެ މުހިންމު ކަމެއްދެއްވާނީ ބޯހިޔާވަހިކަމުގެ މަޝްރޫޢުތައް ހިންގުމަށް ކަމަށެވެ. އަދި މި ސަރުކާރު އައިއިރު ކުރިން އޮތް އެމްޑީޕީ ސަރުކާރުން ރަށްރަށުގައި ހިންގަން ރާވާފައި ހުރި މަޝްރޫއުތަކުގެ ތެރެއިން ބައެއް މަޝްރޫއުތައް ނުނިމި އަދި އަނެއްބައި މަޝްރޫއުތައް ނުފެށިފައި ވާކަމަށެވެ.

Advertisement

ރައީސް މުއިއްޒު ވިދާޅުވީ މިއީ ތަކުރާރުކޮށް ދެކެވިފައިހުރި ވާހަކަތައް ކަމަށާއި މިކަމުގައި އެންމެ ބޮޑު މައްސަލައަކަށްވީ މިދިޔަ އަހަރު ފާސްކުރި ބަޖެޓުގެ މައްސަލަކަމަށެވެ.

ރައީސް މުއިއްޒު ވިދާޅުވީ ނިމިގެން ދިޔަ އަހަރުގެ ބަޖެޓަކީ މި ސަރުކާރުން ފާސްކުރި ބަޖެޓެއް ނޫންކަމަށާއި ކުރީ ސަރުކާރުން ނިމިގެން ދަމުން ގަސްދުގައި އެއްވެސް ކަމެއް ނުކުރެވޭގޮތަށް ބަޖެޓު ހައްދަވާދެއްވާފައި ވަޑައިގަތީ ކަމަށެވެ. އަދި އެކަން އެގޮތަށް ކުރުމުގެ ސަބަބުން އެއްވެސްކަމެއް މި ސަރުކާރުން ބޭނުންވާ ގޮތަށް ކުރިއަށް ނުގެންދެވި ވާކަމަށް ވެސް ރައީސް ވިދާޅުވިއެވެ.

ރައީސް ވިދާޅުވީ މިދެންނެވި ދަތިކަމުގެ ތެރެއިން ވެސް ގައުމު ދަރަނިވެރިވެ ނުދީ އިގްތިޞާދުކޮޅަށް ޖަހައި، އެއްވެސް ވަރަކަށް ފައިސާ ޗާޕް ނުކޮށް ދަރަނިތައް ދައްކަމުން އަންނަކަމަށެވެ. އެގޮތުން މި ހަފްތާގެ ތެރޭގައި ވެސް ސަރުކާރުން، އެކިފަރާތްތަކުން ކޮށްފައި ހުރި މަސައްކަތް ތަކަށް 500 މިލިއަން ރުފިޔާ އެކި ކުންފުނިތަކަށް ދޫކުރަމުން އަންނަކަމަށާއި އެއީ ހަމަ އެކަނި ސަރުކާރުން އެކިފަރާތް ތައްލައްވައި ކުރުވާފައި ހުރި ކަންތަތައް ކަމަށް ވެސް ރައީސް ވިދާޅުވިއެވެ.

ރައީސް ވިދާޅުވީ ސަރުކާރުން އެ ފައިސާ ދޫކުރާނީ ކުދި އަދި މެދު ފަންތީގެ ކުންފުނިތައް ލައްވައި ކުރުވާފައި ހުރި މަސައްކަތްތަކަށް ކަމަށާއި މިދިޔަ ދުވަސްތަކުގައި އެ ދަރަނި ދިޔައީ ދައްކަމުން ކަމަށެވެ.

"ލޯކަލް އެކި ދަރަނިތައް ވެސް ދައްކަމުން މިއައީ. މި ހަފްތާ، މި ހިނގާ ހަފްތާ ތެރޭގައި ވެސް ހަމަ މިގޮތުން ސަރުކާރުން ފިނޭންސް މިނިސްޓްރީން އެކި ފަރާތްތަކަށް، ސަރުކާރުން ކޮށްފައި ހުރި މަސައްކަތްތަކަށް 500 އަށްވުރެ ގިނަ މިލިއަން ރުފިޔާ ހަމަ ދިވެހި އެކިއެކި ކުންފުނިތަކަށް އެބަ ދޫކުރަން،" ރައީސް ވިދާޅުވި އެވެ.

ރައީސް މުއިއްޒު ވިދާޅުވީ ކުރީގެ ސަރުކާރުން، ސަރުކާރުގެ އެކި ކުންފުނިތައް މެދުވެރިކޮށް ރަށްރަށުގައި ހުންނަ ކުދި ކުންފުނިތައް ލައްވައި ކުރުވާފައި ހުރި މަސައްކަތުގެ ބޮޑު ބައެއް ރޯދަ މަހުގެ ކުރިން ދައްކައި ނިންމޭތޯ މަސައްކަތް ކުރަމުންދާ ކަމަށެވެ.

މިދިޔަ ޑިސެމްބަރު 7، ގައި ފިނޭންސް މިނިސްޓަރު މޫސާ ޒަަމީރު ވިދާޅުވީ މި ސަރުކާރު ވެރިކަމާ ހަވާލުވިއިރު، 124 ބިލިއަން ރުފިޔާގެ ދަރަންޏެއް ދައުލަތުގެ އޮތް ކަމަށެވެ. އޭގެތެރެއިން ދެބައިކޮށްފައި އެއްބަޔަކީ މިދިޔަ ސަރުކާރުގެ ދަރަނި ކަމަށާއި އަނެއް ބަޔަކީ އޭގެ ކުރީގެ ސަރުކާރުތަކުގެ ދަރަނި ކަމަށެވެ.

މިދިޔަ އަހަރު އާމްދަނީގެ ގޮތުގައި 33.6 ބިލިއަން ރުފިޔާ ލިބިފައިވެ އެވެ. އޭގެ ބޮޑު ބައެއް ހިއްސާކުރަނީ ޓެކްސް އާމްދަނީގެ ގޮތުގައި ލިބުނު 25.5 ބިލިއަން ރުފިޔާ އެވެ. އޭގެ އިތުރުން ޓެކްސް ނޫން އާމްދަނީގެ ގޮތުގައި 7.5 ބިލިއަން ރުފިޔާ އަދި ހިލޭ އެހީގެ ގޮތުގައި 658 މިލިއަން ރުފިޔާ ލިބިފައިވެ އެވެ.