ރަޝިއާ ގައި ހުންނެވި ބައްޝާރު އަލް-އަސަދު އަވަހާރަ ކޮށްލަން ވިހަލައިފި: ރިޕޯޓް

ސޫރިއާ ގެ ވެރިކަމުން ވައްޓާލެވުނު ކުރީގެ ރައީސް ބައްޝާރު އަލް-އަސަދު އަވަހާރަ ކޮށްލަން ވިހަ ލައިފި ކަމަށް މީޑިއާ ރިޕޯޓެއް ބުނެފިއެވެ.

ހަތިޔާރު އެޅި ގްރޫޕްތަކުން ވެރިކަމުން ވައްޓާލި ކުރީގެ ވެރިޔާ ދިރިއުޅުއްވަމުން ގެންދަވަނީ ރަޝިއާގެ ރައީސް ޕުޓިންގެ މެހުމާންދާރީ ގައި ރަޝިއާ ގެ ވެރިރަށް މޮސްކޯގައެވެ.

ރަޝިއާގެ ކުރީގެ ޖާސޫސެއް ހިންގާ ކަމަށް ބުނާ ޖެނެރަލް އެސްވީއާރު ނަމަކަށް ކިޔާ ސޯޝަލް މީޑިއާ އެކައުންޓެއްގައި ޑިސެމްބަރު 31 ގައި ޝާއިއު ކުރި މައުލޫމާތައް ހަވާލާދީ މީޑިއާ ރިޕޯޓު ބުނެފައިވާ ގޮތުގައި ހުސްވި ހަފްތާގެ އާދީއްތަ ދުވަހުގެ މެންދުރުފަހު، އަލް-އަސަދުގެ ސެކިއުރިޓީ ގާޑުންނަށް އޭނާގެ ހާލު ގޯސްވެފައިވާ ކަމާއި ނޭވާލުމަށް ދަތިވާ ކަމަށް ވިދާޅުވެ ސިއްހީ އެހީ ހޯދުމަށް ގުޅުމަށް އެދިވަޑައިގަތެވެ. އެއާއެކު ކުޑައިރުކޮޅެއްގެ ތެރޭގައި، އޭނާ ވަރަށް ބޮޑަށް ކެއްސަން ފަށައި، ނޭވާހާސްވާން ފެށި ކަމަށް ބުނެފައިވެއެވެ.

އަސަދަށް ދެވުނު ފަރުވާ އާ އެކު ކުޑަކޮށް ލުއިވި ނަމަވެސް، އޭނާގެ ނޭވާލުން އަދިވެސް އާންމު ހާލަތަކަށް ނުދާ ކަމަށާއި އަދި ބޮލުގައި ރިހުމާއި ބަނޑުގައި ރިހުން އިތުރުވި ކަމަށް ވެސް ބުނެފައިވެއެވެ.

ސިއްހީ އެހީތެރިން އައި އިރު ކުރީގެ ސީރިއާގެ އީސްގެ ހާލަތު ދިޔައީ ގޯސްވަމުން ކަމަށާއި އޭނާގެ ހާލަތު ވަގުތުން ރޫސީ ލީޑަރޝިޕްގެ މަންދޫބުންނަށް އެންގުނު ކަމަށް ވެސް ބުނެފައިވެއެވެ.

"އަވަހާރަކޮށްލަން މަސައްކަތެއް ކުރެވުނު ކަމަށް ޤަބޫލުކުރެވޭ ހުރިހާ ސަބަބެއް އެބަހުރި،" އެ އެކައުންޓުން ބުނެފައިވެއެވެ.

އަސަދަށް ފަރުވާ ދެވުނީ އޭނާގެ އެޕާޓްމަންޓުގައި ކަމަށާއި، ހޯމަ ދުވަހާ ހަމައަށް އޭނާގެ ޙާލު އާންމު ގޮތެއްގައި ރަނގަޅު ކަމަށް ބުނެފައިވެއެވެ. އޭނާ ހެއްދެވި ޓެސްޓުތަކުން ހަށިގަނޑުގައި ވިހަ ހުރިކަން ރިޕޯޓުތަކުން އެނގޭ ކަމަށް ވެސް ވަނީ ހާމަ ކޮށްފައެވެ.

މިކަމާ ގުޅޭގޮތުން ސީރިއާ އިން އަދި މޮސްކޯ އިން ރަސްމީކޮށް އެއްވެސް އެއްޗެއް ބުނެފައެއް ނުވެއެވެ.

މައްސަލައިގެ ތަޙުޤީޤު ކުރިއަށް ދާއިރު، މިހާތަނަށް ބައްޝާރު އަލް-އަސަދު ވިހައަށް ހުށަހެޅުނީ ކިހިނެއްކަން ދެނެގަނެވިފައެއް ނުވާކަމަށް ރިޕޯޓުގައި ވެއެވެ.

ކުރީގެ ރައީސް ބައްޝާރު އަލް-އަސަދު ރަޝިއާ އަށް ސިއްރިއްޔާތުގައި ވަޑައިގަތީ ޑިސެމްބަރު 8 ގައެވެ. އެއީ، ހަޔާތު ތަޙްރީރު އައް-ޝާމް (އެޗްޓީއެސް) އިސްވެ އޮވެގެން ބަޣާވާތްތެރިންގެ އިއްތިހާދަކުން ކުއްލި ގޮތަކަށް ދޭން ފެށި ހަމަލާތަކަށް 11 ދުވަސްވީ ފަހުން ދިމިޝްގް ހިފައި، އަސަދު ވައްޓާލައިފިކަން އިޢުލާނުކުރި ދުވަހެވެ.