ގިނިސް ވޯލްޑް ރެކޯޑްސް އިން ބުނާ ދުނިޔޭގެ އެންމެ ދުވަސްވީ މީހާ – ޖަޕާނުގެ އަންހެނެއް ކަމަށްވާ ޓޮމިކޯ އިޓޫކާ އުމުރުން 116 އަހަރުގައި މަރުވެއްޖެ އެވެ. 

އޭނާ މަރުވީ ޑިސެމްބަރު 29 ވަނަ ދުވަހު ޖަޕާނުގެ މެދުތެރޭ ސަރަހައްދަކަށް ނިސްބަތްވާ ހިޔޯގޯ ޕްރިފެކްޗަރގެ އާޝިޔާ ސިޓީ ގައި ހުންނަ ނާސިންގ ހޯމް އެއްގައެވެ.

ދޮންކޭލާއި ކަލްޕިސް ކިޔާ ޔޯގަޓުގެ ރަހަ ހުންނަ ޖަޕާނުގެ ބުއިމެއް ވަރަށް ބޮޑަށް ކަމުދިޔަ އިޓޫކާ އުފަންވީ 23 މެއި 1908 ގައެވެ.

ޖެރޮންޓޮލޮޖީ ރިސަރޗް ގްރޫޕުން ބުނާގޮތުގައި 117 އަހަރުގެ މާރިއާ ބްރަންޔަސް މަރުވުމާ ގުޅިގެން އިޓޫކާ ދުނިޔޭގައި ހުރި އުމުރުން އެންމެ ދުވަސް ވީ މީހާގެ ގޮތުގައި ކަނޑައެޅުނެވެ. 

އޭނާއަކީ ދުނިޔޭގެ އެންމެ ދުވަސްވީ މީހުންގެ ލިސްޓުގެ އެންމެ ކުރީގައި އޮތް މީހާކަކަމަށް އޭނާގެ ގާތު ބުނުމުން، އިޓޫކާ ހަމައެކަނި ބުނި އެއްޗެއް ކަމަށް ވަނީ "ޝުކުރިއްޔާ" އެވެ. 

އިޓޫކާ މިދިޔަ އަހަރު އުފަންދުވަސް ފާހަގަކުރުމަށް އެ ސަރަހައްދުގެ މޭޔަރުގެ ފަރާތުން މާބޮނޑިއަކާއި، ކޭކަކާއި ކާޑެއް ފޮނުއްވިއެވެ.

އޮސާކާގައި އުފަންވި އިޓޫކާ އަކީ ހައި ސްކޫލުގައި ވޮލީބޯޅަ ކުޅުނު މީހެކެވެ. އަދި އޭނާ އަކީ ފިޓު މީހެއްގެ ގޮތުގައި މަޝްހޫރު ފަރާތެކެވެ. އޭނާ ވަނީ 3,067 މީޓަރު (10,062 ފޫޓު) އުސްމިނުގެ މައުންޓް އޮންޓޭކަށް ދެފަހަރު އަރާފައެވެ.

އިޓޫކާ ކައިވެނި ކުރީ އުމުރުން 20 އަހަރުގައެވެ. އަދި އޭނާ އަށް ދެ ފިރިހެން ކުދިންނާއި ދެ އަންހެން ކުދިން ލިބުނެވެ.

ދެވަނަ ބޮޑު ހަނގުރާމައިގެ ތެރޭގައި އިޓޫކާ ގެ ފިރިމީހާގެ ފޭރާން ފެކްޓަރީގެ އޮފީސް އޭނާ ހިންގިއެވެ. އޭނާގެ ފިރިމީހާ 1979 ގައި މަރުވުމަށްފަހު އިތުރު ކައިވެންޏެއް ނުކުރެއެވެ. އިޓޫކާ މަރުވި އިރު ދުނިޔޭގައި ތިބީ ފިރިހެން ދަރިއަކާއި އަންހެން ދަރިއަކާއި ފަސް މާމަ ދަރިންނެވެ.

ޖެރޮންޓޮލޮޖީ ރިސަރޗް ގްރޫޕުން ބުނާގޮތުގައި މިހާރު ދުނިޔޭގެ ހުރި އުމުރުން އެންމެ ދުވަސްވީ މީހާއަކީ 116 އަހަރުގެ ބްރެޒިލްގެ ރައްޔިތެއް ކަމަށްވާ ކަނަބަރޮ ލޫކަސް އެވެ. އޭނާ އުފަންވީ އިޓޫކާ އުފަންވި ތާރީޚުގެ 16 ދުވަސް ފަހުންނެވެ.