އިސްރާއީލުން ޣައްޒާގައި 70 މީހުން ޝަހީދު ކޮށްލައިފި
އޮކްޓޯބަރު 7، 2023 އިން ފެށިގެން އިސްރާއީލުން ޣައްޒާއަށް ދެމުންދާ އަނިޔާވެރި ހަމަލާތަކުގައި ޝަހީދުވި މީހުންގެ އަދަދު މަދުވެގެން 45،658 ށް ވަނީ އަރާފައެވެ.
ޖެނުއަރީ 4، 2025 ގައި ޣައްޒާގެ ޣައްޒާ ސިޓީގައި އިސްރާއީލުން އަލް ސަރާޔާ ސަރަހައްދާއި އެ ސަރަހައްދުގެ ވަށައިގެންވާ ސަރަހައްދުތަކަށް ދިން ހަމަލާތަކާ ގުޅިގެން ބޯ ދުން އަރަނީ
ހޮނިހިރު ދުވަހު ޣައްޒާ ސްޓްރިޕް ގެ އެކި ސަރަހައްދުތަކަށް ތިން ތަފާތު 30 ހަމަލާގައި އިސްރާއީލީ ބާރުތަކުން މަދުވެގެން 70 ފަލަސްތީނު މީހުން ޝަހީދު ކޮށްލައިފި ކަމަށް ޞިއްޙީ އަދި މީހުން ސަލާމަތް ކުރުމުގައި މަސައްކަތްކުރާ އޮފިޝަލުން ބުނެއެވެ.
ޝަހީދުވި މީހުންގެ ތެރޭގައި ގިނަ އަދަދެއްގެ ކުޑަކުދިން ހިމެނެއެވެ. އިސްރާއީލުގެ ބާރުތަކުން ވަނީ ޚާން ޔޫނިސް އަށް ވެސް ހަމަލާދީ މަދުވެގެން އެކަކު ޝަހީދު ކޮށްލާފައެވެ. ޣައްޒާ ސިޓީ އަށް ވެސް އިސްރާއީލުން ވަނީ ހަމަލާ ދީފައެވެ. އެ ސިޓީގައި އެތައް ބަޔަކު ޒަޚަމްވެފައިވާ ކަމަށް ރިޕޯޓުތައް ބުނެއެވެ.
އިސްރާއީލު ސިފައިންގެ ބެލުމުގެ ދަށުން، ހުޅަނގު އައްސޭރިއަށް ގަވައިދާ ޚިލާފަށް ވެރިވެގަނެގެން އުޅޭ އިސްރާއީލުގެ ރައްޔިތުން ފަލަސްތީނު ދަނޑުވެރިންނަށް ހަމަލާދީ، އިމާރާތަކުގައި އަލިފާން ރޯކޮށްފައިވާ ކަމަށް ވަފާ ނިއުސް އޭޖެންސީން ބުނެފައިވެއެވެ.
އަނެއްކޮޅުން ޓާގެޓް ކޮށްގެން ޣައްޒާގެ ސިއްހީ ވަސީލަތްތަކައް އިސްރާއީލުން ދެމުންދާ ހަމަލާތަކުގައި އިންޑޮނީޝިއާ ހޮސްޕިޓަލް ވަނީ ޚިދުމަތް ނުދެވޭ ހާލަތަށް ގޮސްފައި ކަމަށް ޣައްޒާގެ އޮފިޝަލުން ވަނީ ހާމަކޮށްފައެވެ. އަދި މިހާރު އެ ހޮސްޕިޓަލުން ބަލިމީހުންނަށް ނުވަތަ ޒަޚަމްވެފައިވާ މީހުންނަށް އެއްވެސް ޚިދުމަތެއް ނުދެއެވެ.
ޣައްޒާގައި ހަމާސް އިން ބަންދުކޮށްފައިވާ އިސްރާއީލުގެ ރަހީނުން އަނބުރާ ގެނައުމަށްޓަކައި ޤަޠަރުގައި ހަމާސްއާ އެކު ނުރަސްމީ މަޝްވަރާތައް އަލުން ފެށިފައިވާކަމަށް އިސްރާއީލުގެ ދިފާޢީ ވަޒީރު އިސްރާއީލް ކަޓްޒް ވަނީ ވިދާޅުވެފައެވެ.
އޮކްޓޯބަރު 7، 2023 އިން ފެށިގެން އިސްރާއީލުން ޣައްޒާއަށް ދެމުންދާ އަނިޔާވެރި ހަމަލާތަކުގައި ޝަހީދުވި މީހުންގެ އަދަދު މަދުވެގެން 45،658 ށް ވަނީ އަރާފައެވެ. އިސްރާއީލުގެ ހަމަލާތަކުގައި ޒަޚަމްވި މީހުންގެ އަދަދު 108،583 ށް ވަނީ މައްޗަށް ގޮސްފައެވެ.
