24 ގަޑިއިރު ތެރޭ 8 ގަތުލުއާންމު އިސްރާއީލުން ޣައްޒާ ގައި ހިންގައިފި
އިސްރާއީލުން ޣައްޒާއަށް ދެމުންދާ އަނިޔާވެރި ހަމަލާތަކުގައި ޝަހީދުވި މީހުންގެ އަދަދު 45،658 ށް އަރާފައިވާއިރު، އޭގެ ތެރެއިން ގިނައީ ކުޑަކުދިންނާއި އަންހެނުންނެވެ.
ޖެނުއަރީ 03، 2025 - އިސްރާއީލު ސިފައިން ޣައްޒާ ސިޓީގެ ޒައިތޫން ސަރަހައްދަށް ދިން ހަމަލާއަކާ ގުޅިގެން ކުޑަކުދިން ހިމެނޭ ގޮތަށް އަނިޔާވި މީހުން ފަރުވާ ހޯދުމަށް އަލް އަހުލީ އަރަބި ހޮސްޕިޓަލަށް ގެންނަނީ
އިސްރާއީލުގެ އިސްތިއުމާރީ ސިފައިން ފާއިތުވި 24 ގަޑިއިރުގެ ތެރޭގައި ޣައްޒާގައި އާއިލާތަކާ ދެކޮޅަށް 8 ގަތުލުއާންމު ހިންގައިފި ކަމަށް ވަފާ ނިއުސް އޭޖެންސީން ބުނެފިއެވެ.
އިސްރާއީލުގެ މި އަނިޔާވެރި ހަމަލާތަކުގެ ސަބަބުން ކުޑަކުދިންނާއި އަންހެނުން ހިމެނޭ ގޮތައް އާންމުންގެ އެތައް ބަޔަކު ޝަހީދުވެ، މަދުވެގެން 145 މީހުން ޒަހަމްވެފައިވާ ކަމަށް ސިއްހީ މަސްދަރުތަކުން ބުނެ އެވެ.
ޣައްޒާގެ ހެލްތު މިނިސްޓްރީން ބުނީ ހުކުރު ދުވަހު އެކަނި 73 މީހުން ޝަހީދުކޮށްލާފައި ވާއިރު، ބުރާސްފަތި ދުވަހު، ކުރިން ރައްކައުތެރި ސަރަހައްދެއްގެ ގޮތުގައި އިސްރާއީލުން ކަނޑައަޅާފައިވާ މެދުތެރޭ ޣައްޒާގެ ސަރަހައްދެއް ކަމަށްވާ އަލް މަވާސީ ހިމެނޭ ގޮތަށް އިސްރާއީލުން ދިން ހަމަލާތަކުގައި 77 މީހުން ޝަހީދުވި ކަމަށެވެ. މި އަދަދުތަކަކީ ހަމަ އެކަނި ހޮސްޕިޓަލްތަކަށް ގެންދެވުނު މީހުން ކަމަށް ވަފާ ނިއުސް އިން ބުނެފައިވެއެވެ.
2023 ވަނަ އަހަރުގެ އޮކްޓޯބަރު މަހުގެ ހަތް ވަނަ ދުވަހުން ފެށިގެން އިސްރާއީލުން ޣައްޒާއަށް ދެމުންދާ އަނިޔާވެރި ހަމަލާތަކުގައި ޝަހީދުވި މީހުންގެ އަދަދު 45،658 ށް އަރާފައިވާއިރު، އޭގެ ތެރެއިން ގިނައީ ކުޑަކުދިންނާއި އަންހެނުންނެވެ. އަނެއް ކޮޅުން އިސްރާއީލުން ދިން ހަމަލާތަކުގައި ފަލަސްތީނުން ޒަޚަމްވި މީހުންގެ އަދަދު 108،583 ށް ވަނީ އަރާފައެވެ.
