ސަރުކާރުގެ ކުންފުނިތަކުން ލޯނު ނެގުމުގެ ހުއްދަ ފިނޭންސުން ހޯދަން ޖެހޭ ގޮތައް ހަދައިފި
ކުންފުނިތަކުން މުސާރައިގެ އޮނިގަނޑަށް ގެންނަ ބަދަލުތަކާއި، އިދާރީ އިސްލާހުތަކާއި، އިންވެސްޓްމަންޓް ސްޓްރެޓެޖީތަކަށް ކުރިން ޕީސީބީ އިން ހުއްދަ ނަގަން ޖެހޭ ގޮތައް އޮންނަ އޮތުން ބަދަލުކޮށް ފިނޭންސް މިނިސްޓްރީން ހުއްދަ ނަގަން ޖެހޭ ގޮތައް ވެސް ވަނީ ބަދަލު ކޮށްފައި
ފިނޭންސް މިނިސްޓަރު މޫސާ ޒަމީރު ރައްޔިތުންގެ މަޖިލީހުގައި
ސަރުކާރުގެ ވިޔަފާރި ކުންފުނިތަކުން ލޯނު ނެގުމަށް މިނިސްޓްރީ އޮފް ފިނޭންސުން ހުއްދަ ހޯދަން ޖެހޭ ގޮތައް ހަމަ ޖައްސައިފިއެވެ.
ސަރުކާރުގެ ވިޔަފާރި ކުންފުނިތަކުން ފިނޭންސްގެ ހުއްދަ ހޯދައިގެން ނޫނީ ލޯނު ނުނެގޭ ގޮތައް ހަމަޖެއްސީ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން (ޕީސީބީ) ނެރުނު ސަރކިއުލަރއަކުންނެވެ.
މި ސަރކިއުލަރގައި ފާހަގަކޮށްފައިވާ ގޮތުގައި ސިޔާސަތަށް ގެނެވުނު މި ބަދަލު ފާސްކޮށްފައިވަނީ 25 ޑިސެމްބަރުގައި ބޭއްވުނު ބޯޑު ބައްދަލުވުމެއްގައެވެ.
މި އުސޫލުގެ ދަށުން، ލޯނަކަށް އެދުމުގެ ކުރިން، ލޯނަށް އެދޭ ކުންފުނީގެ ބޯޑުން ޓެކްނިކަލް އެސެސްމަންޓެއް ހަދަންޖެހެއެވެ. މި އެސެސްމަންޓްގައި ލޯނު ބޭނުންވާ ސަބަބު ބަޔާންކުރުމާއި، އެކި ފައިނޭންސިންގ އޮޕްޝަންތައް ބެލުމާއި، އެކި ފަރާތްތަކުން ލޯނު ނެގުމުގެ ފުރުސަތުތައް ދިރާސާ ކުރަން ވާނެ ކަމަށް ބުނެފައިވެއެވެ. މީގެ އިތުރުން، ހުށަހަޅާ ލޯނުގެ ސަބަބުން ކުރިން ނަގާފައިވާ ލޯނުތައް އަނބުރާ ދެއްކުމަށް އަސަރުކުރާނެތޯ ނުވަތަ މިހާރު އަދާކުރަމުންދާ މާލީ ޒިންމާތައް އަދާކުރުމަށް ދަތިތަކެއް ކުރިމަތިވާނެތޯ ވަޒަން ކުރަން ޖެހޭނެ ކަމަށް ވެސް ބުނެފައިވެއެވެ.
ޕީސީބީ އިން ބަޔާންކޮށްފައިވާ ގޮތުން، ސަރުކާރުގެ ވިޔަފާރި ކުންފުނިތަކުން ލޯނު ނެގުމުގައި ސަރުކާރާ ގުޅުންހުރި ފަރާތްތަކުން ލޯނު ނެގުމަށް އިސްކަންދޭންވާނެއެވެ.
މީގެ އިތުރުން، ލޯނުގެ ސަބަބުން ދައުލަތުގެ ބަޖެޓަށް ކުންފުނިން ބަރޯސާވާ މިންވަރަށް އަންނާނެ ބަދަލުތަކުގެ ތަފްސީލު ލޯނަށް އެދި ހުށަހަޅާ އިރު ފޮނުވަން ޖެހޭނެ ކަމަށްވެސް ވަނީ ބުނެފައެވެ.
ލޯނަށް އެދި މިނިސްޓްރީ އޮފް ފިނޭންސްއަށް ހުށަހެޅުމުގެ ކުރިން، ލޯނަށް އެދޭ ކުންފުނީގެ ބޯޑުން ފާސްކުރަން ޖެހޭނެ ކަމަށް ވެސް ބުނެފައިވެއެވެ.
މީގެ އިތުރުން ސަރުކާރުގެ ކުންފުނިތަކުން މުސާރައިގެ އޮނިގަނޑަށް ގެންނަ ބަދަލުތަކާއި، އިދާރީ އިސްލާހުތަކާއި، އިންވެސްޓްމަންޓް ސްޓްރެޓެޖީތަކަށް ކުރިން ޕީސީބީ އިން ހުއްދަ ނަގަން ޖެހޭ ގޮތައް އޮންނަ އޮތުން ބަދަލުކޮށް ފިނޭންސް މިނިސްޓްރީން ހުއްދަ ނަގަން ޖެހޭ ގޮތައް ވެސް މިހާރު ވަނީ ބަދަލު ކޮށްފައެވެ.
ޕީސީބީން މި ބަދަލު ތައް ގެނައި ކަމަށް އިއުލާނު ކުރި އިރު ޕީސީބީ އަކީ ވެސް އަދި ފިނޭންސް މިނިސްޓްރީ އަކީ ވެސް އަދި ސަރުކާރުގެ ކުންފުނި ތަކަކީ ވެސް ސީދާ ރައީސުލް ޖުމްހޫރިއްޔާ އައްޔަން ކުރާ ވެރިންގެ މައްޗަށް ހިނގަމުންދާ ތަންތަން ކަން ފާހަގަ ކުރެވެއެވެ.
