އެމެރިކާއިން 2023 އޮކްޓޯބަރުން ފެށިގެން އިސްރާއީލަށް 22 ބިލިއަން ޑޮލަރަށްވުރެ ގިނަ އަދަދެއްގެ އަސްކަރީ އެހީ ދީފި: ރިޕޯޓު

ފާއިތުވި އޮކްޓޯބަރު މަހުން ފެށިގެން އެމެރިކާ އިން އިސްރާއީލު ސަރުކާރަށް 22 ބިލިއަން ޑޮލަރަށްވުރެ ގިނަ އަދަދެއްގެ އަސްކަރީ އެހީ ފޯރުކޮށްދީފިއެވެ.

މި އެހީ އިސްރާއީލަށް ދީފައިވަނީ އިސްރާއީލުން ޣައްޒާގައި ނަސްލު ނައްތާލުމުގެ ހަނގުރާމަ ފެށި ހިސާބުން ކަން ފާހަގަ ކުރެވެއެވެ. 

ސްޓޮކްހޯމް އިންޓަނޭޝަނަލް ޕީސް ރިސާރޗް އިންސްޓިޓިއުޓް (ސިޕްރީ) އިން ސިއްސައިގެން ދާފަދަ މި ބޮޑު އަދަދު ހާމަކޮށްފައިވަނީ އަންގާރަ ދުވަހު ނެރުނު ރިޕޯޓެއްގައެވެ.

މި ރިޕޯޓުގައި ބުނެފައިވަނީ އެމެރިކާއިން މި ހަތިޔާރުތައް ފޯރުކޮށްދީފައިވަނީ ޣައްޒާ، ލުބުނާން އަދި ސޫރިޔާ ގައި ހަނގުރާމަ ކުރުމަށް ކަމަށެވެ. 

2023 ވަނަ އަހަރު، ވޮޝިންގްޓަނުން ތެލް އަވީވަށް ދިން އަސްކަރީ އެހީ އޭގެ ކުރިއާ އަޅާބަލާއިރު 78 އިންސައްތަ އިތުރުވެފައިވެއެވެ.

މީގެ ކުރިން ފާއިތުވި ހަތަރު އަހަރުގެ މުއްދަތުގައި އެމެރިކާއިން އިސްރާއީލުގެ އަސްކަރިއްޔާ އިން ބޭނުން ކުރާ ހަތިޔާރުތަކުގެ 69 އިންސައްތަ ފޯރުކޮށްދީފައިވެއެވެ. 

އިސްރާއީލުން ޣައްޒާ ގައި ފެށި ހަނގުރާމަ އާއި ލުބުނާން އަށް ދިން މަރުގެ ހަމަލާތައް އިތުރުވި 23 ދުވަހުގެ ތެރޭގައި، އެމެރިކާއިން އިސްރާއީލަށް 2.4 ބިލިއަން ޑޮލަރުގެ 10،000 ޓަނަށްވުރެ ގިނަ އަދަދެއްގެ ހަތިޔާރު ފޯރުކޮށްދީފައިވެއެވެ. 

2024 ގެ އޯގަސްޓު މަހާ ހަމައަށް މި އަދަދު 50،000 ޓަނަށް އިތުރުވެފައިވެއެވެ. މި ހަތިޔާރުތައް އިސްރާއީލަށް ގެންގޮސްފައިވަނީ އެތައް ސަތޭކަ މަތިންދާބޯޓު ދަތުރުތަކުގަ އާއި ކަނޑު އުޅަނދުތައް ބޭނުންކޮށްގެންނެވެ. 

މި ހަތިޔާރުތަކުގެ ތެރޭގައި ހިމެނެނީ އިސްރާއީލުގެ އަޔަން ޑޯމް ސިސްޓަމަށް ބޭނުންވާ މިސައިލްތަކާއި، ޕްރެސިޝަން-ގައިޑެޑް ބޮންތަކާއި، ސީއެޗް-53 ހެވީ ލިފްޓް ހެލިކޮޕްޓަރުތަކާއި، އޭއެޗް-64 އެޕާޗޭ ހެލިކޮޕްޓަރުތަކާއި، 155 އެމްއެމް އާޓިލަރީ ޝެލްތަކާއި، ބަންކަރު ހަލާކުކުރާ ހަތިޔާރުތަކާއި އަދި ހަތިޔާރު އަޅާފައިވާ އުޅަނދުތަކެވެ.

ޣައްޒާ ހަނގުރާމައިގައި 45،500 އަށްވުރެ ގިނަ ފަލަސްޠީނު ރައްޔިތުން މަރުވެފައިވާއިރު، އޭގެ ތެރެއިން ގިނައީ އަންހެނުންނާއި ކުޑަކުދިންނެވެ. އެއީ ޣައްޒާގެ އާބާދީގެ 6 އިންސައްތައެވެ. އަދި ލުބުނާނަށް ދިން ހަމަލާތަކުގައި 3،960 ށް ވުރެ ގިނަ މީހުން މަރުވެފައި ވާއިރުވެސް އެމެރިކާއިން ހަތިޔާރު ފޯރުކޮށްދިނުން މެދުނުކެނޑި ކުރިއަށް ގެންގޮސްފައިވެއެވެ. 

އެމެރިކާއިން އިސްރާއީލަށް އަސްކަރީ އެހީ ފޯރުކޮށްދޭން ފަށާފައިވަނީ 1948 ގައި ހިނގި ހަނގުރާމައިގައި ސަރަހައްދުގެ ބޮޑު ބައެއް އިސްރާއީލުން ހިސޯރު ކުރުމުގެ ދެ އަހަރު ކުރިންނެވެ. މި ހަނގުރާމައަކީ ހުޅަނގުގެ ވަރަށް ބޮޑު އެހީތެރިކަމާއެކު ކުރިއަށް ގެންދިޔަ ހަނގުރާމައެކެވެ. 

ޖުމްލަކޮށް ބަލާއިރު، ވޮޝިންގްޓަނުން އިސްރާއީލަށް 310 ބިލިއަން ޑޮލަރުގެ އަސްކަރީ އަދި އިޤްތިޞާދީ އެހީ ފޯރުކޮށްދީފައިވެއެވެ. މި މަޢުލޫމާތު ހާމަ ކޮށްފައިވަނީ އެމެރިކާގެ ތިންކް ޓޭންކެއް ކަމަށްވާ ކައުންސިލް އޮން ފޮރިން ރިލޭޝަންސް އިންނެވެ. 

2023 ގެ ކުރިން، ހަމައެކަނި އަސްކަރީ އެހީގެ ގޮތުގައި އަހަރަކު 3.8 ބިލިއަން ޑޮލަރު އެމެރިކާ އިން ފޯރުކޮށްދީފައިވެއެވެ. 

ފާއިތުވި އަހަރުގެ ނިޔަލަށް، އެމެރިކާއިން އިސްރާއީލު ސަރުކާރަށް ހަތިޔާރު ވިއްކުމުގެ މުޢާމަލާތްތަކަށް 100 ށް ވުރެ ގިނަ ހުއްދަ ދީފައިވެއެވެ.