ޑޮލަރު މާރުކުރަން ލާޒިމު ކުރާ ބިލު މަޖިލީހުން ފާސްކޮށްފި

ޓޫރިސްޓް ފެސިލިޓީތަކުން ޑޮލަރު މާރުކުރަންޖެހޭ ގޮތަށް ސަރުކާރުގެ ފަރާތުން ހުށަހެޅި ބިލު ރައްޔިތުންގެ މަޖިލީހުން ބުރާސްފަތި ދުވަހު ފާސްކޮށްފިއެވެ.

ބިލު ފާސްކުރަން ފެންނަ ކަމަށް 46 މެމްބަރުން ވޯޓު ދީފައިވެއެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވާލި މި ބިލު މަޖިލީހަށް ހުށަހެޅީ ހޯމަ ދުވަހު އެވެ.

އިނގުރައިދޫ ދާއިރާގެ މެންބަރު އިބްރާހީމް ފަލާހް ހުށަހެޅުއްވި މި ބިލުގެ ބަހުސް މަރުހަލާ ކުރިއަށް ދިޔައީ އަންގާރަ ދުވަހުގެ ޖަލްސާގައެވެ.

އަންގާރަ ދުވަހު ބިލު ބަލައިގަނެ، މާލިއްޔަތު ކޮމިޓީ އަށް ފޮނުވި ބިލު ކޮމިޓީން ބުދަ ދުވަހު ވަނީ ފާސް ކޮށްފައެވެ.

ރާއްޖޭގެ އިގްތިސާދުގެ އެންމެ މުހިންމު ސިނާއަތުގެ ގޮތުގައި އޮތް ފަތުރުވެރި ކަމަށް ބޮޑެތި އަސަރު ކުރާނެ ކަމަށް ބެލޭ މި ބިލުގެ މަސައްކަތް ކޮމިޓީގައި ކުރިއަށް ގެންދިޔައީ ސިއްރުންންވެ.

ސިއްރުކޮށްގެން ކުރިއަށް ގެންދިޔަ ކޮމިޓީގެ މަސައްކަތާ ބެހޭ މައުލޫމާތު ހިތަދޫ މެދު ދާއިރާގެ މެންބަރު އަޙްމަދު އަޒާން މަރްޒޫޤު ވަނީ ސަރުކާރުގެ މީޑިއާ ޕީއެސްއެމް އާ ހިއްސާ ކޮށްފައި ކަމަށް ޕީއެސްއެމް އިން ވަނީ ހާމަ ކޮށްފައެވެ.

ޚިޔާލު ތަފާތުވުން ބޮޑު މި ބިލުގައިވާ ގޮތުން ރާއްޖޭގެ ރިސޯޓުތަކަށް އަންނަ ކޮންމެ ފަތުރުވެރިއަކަށް 500 އެމެރިކާ ޑޮލަރުގެ ރޭޓުން، ނުވަތަ އެ މަހެއްގެ ތެރޭގައި އެ ފަރާތަށް ލިބޭ ބޭރު ފައިސާގެ އާމްދަނީގެ 20 އިން ސައްތަ ބޭންކިން ނިޒާމުގެތެރެއިން މާރުކުރަންޖެހޭނެއެވެ. އަދި ރާއްޖޭގައި ހިންގާ ގެސްޓު ހައުސްތަކާއި، ފަތުރުވެރިކަމުގެ ސިނާޢަތުގައި ޙަރަކާތްތެރިވާ އުޅަނދުތަކާއި އެނޫންވެސް ތަންތަނަށް އަންނަ ފަތުރުވެރިއަކަށް 25 ޑޮލަރު ނުވަތަ އެތަނަކަށް މީލާދީ މަހެއްގައި ލިބޭ ބޭރު ފައިސާގެ އާމްދަނީގެ 20 އިންސައްތަ މާރުކުރަންޖެހޭނެއެވެ.

ސަރުކާރުގެ މީޑިއާ ޕީއެސްއެމް އިން ހިތަދޫ މެދު ދާއިރާގެ މެންބަރު އާ ހަވާލާދީ ބުނެފައިވަނީ މާލިއްޔަތު ކޮމިޓީން ވަނީ ބިލަށް ދެ ބަދަލު ގެނެސްފައި ކަމަށާއި، އެއީ ޑޮލަރު މާރުކުރުމުން އިސްތިސްނާވާ އުމުރު 10 އަހަރުން 12 އަހަރަށް މަތިކުރުމާއި ރިސޯޓަކަށް މާލީ ދައްޗެއްވާނަމަ ރިސޯޓަށް ލިބޭ ބޭރު ފައިސާގެ އާމްދަނީގެ 20 ޕަސެންޓަށްވުރެ މަދުން މާރުކުރަން އިޚުތިޔާރު ދިނުން ކަމަށެވެ. އަދި އެ ލުއި ދެވޭނީ އެކަން އެމްއެމްއޭއިން ކޭސް ރިވިއުކުރުމަށްފަހުގައި ކަމުގައެވެ.

ބޭރު ފައިސާ އާ ބެހޭ ގަވައިދު އެމްއެމްއޭ އިން ފުރަތަމަ އިއުލާނު ކުރިއިރު އޭގައިވަނީ އެއްވެސް އިސްތިސްނާ އެއް ނެތި ކޮންމެ ރިސޯޓަކަށް އަންނަ ކޮންމެ ފަތުރުވެރިއަކަށް 500 ޑޮލަރު މާރު ކުރަން ޖެހޭ ގޮތަށެވެ. އެކަމާ ގުޅިގެން އިންޑަސްޓްރީގެ ބޮޑެތި ކަންބޮޑުވުންތަކެއް ފާޅު ކުރަން ފެށުމާއެކު ރައީސް މުހައްމަދު މުއިއްޒު ވިދާޅުވީ، ގަވައިދު ބަދަލު ނުކުރައްވާނެ ކަމަށާއި، ގަވައިދަށް ޖެހޭނީ އަމަލު ކުރަން ކަމުގައެވެ.

ސަރުކާރުން ހުށަހެޅި ބޭރު ފައިސާ އާ ބެހޭ ބިލު ވަރަށް އަވަސް އަރުވާލައިގެން ސަރުކާރުގެ ކޮންޓްރޯލުގެ ދަށުން ހިނގަމުން އަންނަ ރައްޔިތުންގެ މަޖިލީހުން މަސައްކަތް ކުރަމުން ދާއިރު، ފުޅާ ދާއިރާ އެއްގައި ބިލަށް ޚިޔާލު ހުށަހެޅުމުގެ ފުރުސަތުވެސް ދީފައި ނުވާކަން ފާހަގަ ކުރެވެއެވެ.