ޔުނައިޓެޑުން އެވަޓަން ބަލިކޮށްފި

އިނގިރޭސި ޕްރިމިއާ ލީގުގައި އެވަޓަންއާ ދެކޮޅަށް ކުޅުނު މެޗުން މެންޗެސްޓަރ ޔުނައިޓެޑު މޮޅުވެއްޖެ އެވެ.

ޔުނައިޓެޑުގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި ޔުނައިޓެޑުން ދެ ލަނޑު ޖެހިއިރު، ދެ ވަނަ ހާފުގައި އެ ޓީމުން ވަނީ ދެ ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 34 ވަނަ މިނެޓުގައި ޔުނައިޓެޑަށް ލީޑު ނަގައިދިނީ މާކަސް ރަޝްފޯޑު އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ބްރޫނޯ ފެނާންޑޭޒް އެވެ. އޭގެ ފަހުން ފުރަތަމަ ހާފުގެ 41 ވަނަ މިނެޓުގައި ޔުނައިޓެޑުގެ ދެ ވަނަ ލަނޑު ޖެހީ ޖޯޝުއާ ޒާކްޒޭ އެވެ. އެ ލަނޑު ޖަހަން ޒާކްޒޭ އަށް ވެސް ފުރުސަތު ތަނަވަސްކޮށްދިނީ ފެނާންޑޭޒް އެވެ.

މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި ރަޝްފޯޑު ވަނީ ޔުނައިޓެޑުގެ ތިން ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ އަމަދު ޑިއާލޯ އެވެ. މެޗުގައި ޔުނައިޓެޑުގެ ހަތަރު ވަނަ ލަނޑު، 64 ވަނަ މިނެޓުގައި ޑިއާލޯ ތަނަވަސްކޮށްދިން ފުރުސަތެއްގައި ޖެހީ ޒާކްޒޭ އެވެ.

މޮޅާއެކު ޔުނައިޓެޑު އޮތީ ލީގު ތާވަލްގެ ނުވަ ވަނައިގަ އެވެ. އެއީ މިހާތަނަށް އެ ޓީމު ކުޅުނު 13 މެޗުން 19 ޕޮއިންޓާ އެކު އެވެ. ފަސް މެޗުން ޔުނައިޓެޑު މޮޅުވެފައިވާއިރު، ހަތަރު މެޗުން އެއްވަރުވެ އަދި އަނެއް ހަތަރު މެޗުން ވަނީ ބަލިވެފަ އެވެ. މި ސީޒަންގައި ޔުނައިޓެޑުގެ ނަތީޖާ އިންތިހާ އަށް ދަށްވުމުގެ ސަބަބުން، އެ ޓީމުގެ ކޯޗަކަށް ކުރިން ހުރި އެރިކް ޓެން ހާގް ވަކިކޮށް، އެ މަގާމަށް ވަނީ ރުބެން އަމޯރިމް ހަމަޖައްސައިފަ އެވެ.