ތިނަދޫއިން ސިޓީގެ ދަރަޖަ ބާތިލުކުރަން މައްސަލަ ހުށަހެޅި ރާގިބު މަގާމުން ވަކިކޮށްފި
މިމައްސަލަ ހައިކޯޓަށް ހުށަހަޅާފައިވަނީ މިދިޔަ ބުރާސްފަތި ދުވަހު
އެންވަޔަރަމަންޓު މިނިސްޓްރީގެ ޑެޕިއުޓީ މިނިސްޓަރު މުހައްމަދު ރާގިބު އަހުމަދު
ގދ. ތިނަދޫގެ އާބާދީގައި 10،000 ހަމަނުވާތީ އެ ރަށުގެ ސިޓީގެ ދަރަޖަ ބާތިލުކުރަން އެދި ހައި ކޯޓަށް ދުސްތޫރީ މައްސަލަ ހުށަހެޅި އެންވަޔަރަމަންޓު މިނިސްޓްރީގެ ޑެޕިއުޓީ މިނިސްޓަރު މުހައްމަދު ރާގިބު އަހުމަދު މަގާމުން ވަކިކޮށްފި އެވެ.
މައުލޫމާތު ލިބޭ ގޮތުގައި މިމައްސަލަ ހައި ކޯޓަށް ހުށަހަޅާފައިވަނީ މިދިޔަ ބުރާސްފަތި ދުވަހެވެ.
ހޯމަ ދުވަހު މިމައްސަލައާ ގުޅިގެން ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވީ ތިނަދޫއަށް ސިޓީއެއްގެ ދަރަޖަ ދިނުން އުވާލުމަށް ދައުލަތާ ދެކޮޅަށް ކޯޓަށް ދިއުމާއި ގުޅިގެން މިނިސްޓްރީ އޮފް ކްލައިމެޓް ޗޭންޖް، އެންވަޔަރަމަންޓު އެންޑް އެނަރޖީގެ ޑެޕިއުޓީ މިނިސްޓަރު މުހައްމަދު ރާގިބު އަހުމަދު އެ މަގާމުން ރައީސް ޑރ.މުހައްމަދު މުއިއްޒު ވަކިކުރައްވާފައިވާ ކަމަށެވެ.
ރާގިބު މަގާމުން ވަކިކުރެއްވިއިރު، އޭނާ ވަކީލެއްގެ ގޮތުގައި ވެސް ދައުލަތާއި ދެކޮޅަށް މަސައްކަތް ކުރާ މައްސަލަތަކެއް ފެންމަތިވެފައިވެއެވެ.
މީގެ އިތުރުން ތިނަދޫއަށް ސިޓީއެއް ދަރަޖަ ލިބިގެން ދިއުމަކީ އެރަށުގެ ގިނަ ރައްޔިތުން އެދޭ ކަމެއް ކަމަށް އެރަށުގެ ކައުންސިލުން މީގެ ކުރިން ބުނެފައިވެއެވެ.
ކުރީ ސަރުކާރުގައި ތިނަދޫއަށް ސިޓީ ކައުންސިލެއްގެ ދަރަޖަ ދިން ނަމަވެސް އޭރު ގާނޫނު އޮތްގޮތުން އެކަންނުވާތީ ފަހުން ޤާނޫނަށް ވަނީ ބަދަލު ގެނެސްފައެވެ. އަދި ތިނަދޫ އަށް ސިޓީއެއްގެ ދަރަޖަ ލިބިގެންމިދިޔައީ އެ ގާނޫނަށް ގެނައި އިސްލާހު ތަސްދީގުވުމާއެކު 26 މާރޗް 2024 ގައެވެ.
