ހަނގުރާމައިގެ ކުށްތަކަށް އިޒްރޭލަށް ފިޔަވަޅު އެޅުމަށް އީޔޫގެ ޚާރިޖީ ގުޅުންތަކުގެ ވެރިޔާ ހުށަހަޅުއްވައިފި

ޣައްޒާ އާއި ލުބުނާނުގައި އިޒްރޭލުން ކުރަމުންދާ ހަނގުރާމައިގައި ހިންގާފައިވާ ޖަރީމާތަކަށް އިޒްރޭލަށް ފިޔަވަޅު އެޅުމަށް ޔޫރަޕިއަން ޔޫނިއަން (އީޔޫ) ގެ ޚާރިޖީ ސިޔާސަތާ ބެހޭ އިސްވެރިޔާ ޖޮސެޕް ބޮރެލް ހުށަހަޅުއްވައިފިއެވެ.

ޔޫރަޕުގެ އެންމެ އިސް ޑިޕްލޮމެޓް، އިޒްރޭލާ ދޭތެރޭ ޔޫރަޕިއަން ޔޫނިއަނުން ގެންގުޅޭ އުސޫލު ތަކަށް ވަނީ ފާޑުވިދާޅުވެފައެވެ. އޭނާ ވިދާޅުވީ އިޒްރޭލުން ޖަރީމާތައް ހިންގަމުންދާ އިރު މިހާތަނަށް ވިލާތުގެ އިއްތިހާދުން މާނަ ހުރި އެއްވެސް ފިޔަވަޅެއް އިޒްރޭލާ ދެކޮޅަށް އަޅާފައި ނުވާކަމަށެވެ.

ޣައްޒާ އާއި ލުބުނާނުގައި ބައިނަލްއަޤްވާމީ ޤާނޫނުތަކާ އިޒްރޭލުން ތަކުރާރުކޮށް ޚިލާފުވަމުންދާ ކަމަށް ވިދާޅުވެ، އިޒްރޭލުން މުދާ އެތެރެކުރުން މަނާކުރުމުން ފެށިގެން އިޒްރޭލު ސަރުކާރާއެކު ސިޔާސީ މަޝްވަރާތައް ހުއްޓާލުމާ ފަދަ މުހިންމު ގިނަ ފިޔަވަޅުތަކެއް ބޮރެލް ވަނީ ހުށަހަޅުއްވާފައެވެ.

ޔޫރަޕިއަން ޔޫނިއަންގެ ބޭރު ސިޔާސަތުގެ އިސްވެރިޔާ ވިދާޅުވީ، ޔޫނިއަނުގެ އުސޫލު ބަދަލުވާން ޖެހޭ ކަމަށާއި، ވަކި ފަރާތެއް އިސްތިސްނާ ނުކޮށް މުޢާމަލާތް ކުރުމަކީ ޔޫރަޕުގެ އިތުބާރު ދެމެހެއްޓުމަށް މުހިންމު ކަމެއް ކަމުގައެވެ.

ޞިއްޙީ ޚިދުމަތްތެރިންނާއި ޞިއްޙީ ވަސީލަތްތަކަށް އިޒްރޭލުން ގަސްދުގައި ހަމަލާދެމުންދާ މައްސަލަ ބޮރެލް ވަނީ ފާހަގަ ކުރައްވާފައެވެ. އޭނާ ވިދާޅުވީ، ސިއްހީ ވަސީލަތްތަކަށް ހަމަލާދިނުމަކީ ބައިނަލްއަޤްވާމީ އިންސާނިއްޔަތާ ބެހޭ ޤާނޫނުތަކާ ނުރައްކާތެރި ގޮތެއްގައި ޚިލާފުވުމެވެ. ހަނގުރާމައިގެ ސަރަޙައްދުތަކުގައި ޞިއްޙީ މަސައްކަތްތެރިންނަށް ނުރައްކާ ކުރުމަކީ އެއްވެސް ހާލެއްގައި ދޫދެވޭނެ ކަމެއް ނޫން ކަމަށް ބޮރެލް ވިދާޅުވިއެވެ.

ޔޫރަޕިއަން ޔޫނިއަންގެ ބޭރު ކަންތައްތަކާބެހޭ ކައުންސިލުން ބޮރެލްގެ ހުށަހެޅުއްވުން ތަކާމެދު މިއަންނަ ހަފްތާގައި މަޝްވަރާކުރުމަށް ވަނީ ހަމަޖެހިފައެވެ.

މީގެ އިތުރުން ބޮރެލް ވިދާޅުވީ، ލުބުނާނުގެ "ބާލްބެކް ކައިރީގައި އިޒްރޭލުން ދިން ހަމަލާއެއްގައި 12 ޕެރަމެޑިކުން މަރުވެފައިވާތީ ޔޫރަޕިއަން ޔޫނިއަނުން ވަރަށް ހަރުކަށި އިބާރާތުން ކުށްވެރިކުރާ." ކަމަށެވެ.

"ޞިއްޙީ ޚިދުމަތްތަކަށް މިގޮތަށް އަމާޒުކުރުމަކީ ސީރިއާ އާއި ޔުކްރެއިން ނުވަތަ ސޫދާނުގައި ހިނގަމުންދާ އެހެން ހަނގުރާމަ ތަކުގައިވެސް ފެންނަމުންދާ ނުރައްކާތެރި އާދައެކެވެ. މިއީ ފަރުވާކުޑަކަމުން ނުވަތަ ގަސްތުގައި ކުރާ ކަމެއް ކަމުގައިވިޔަސް، މިއީ އަސާސީ އިންސާނީ ހައްގުތަކަށް އަރައިގަތުމެވެ." ބޮރެލް ވިދާޅުވިއެވެ.