2025 ވަނަ އަހަރުގެ ބަޖެޓަކީ މެމްބަރުންގެ އަތުން ސަރުކާރު ޖަވާބުދާރީކުރުމުގެ ފުރުސަތު ދޫކޮށްލާނެ ފުރަތަމަ ފަހަރު - މީކާއިލް
ބަޖެޓް މަޖިލީހަށް ފޮނުވާ ބޭނުމަކީ އަހަރަކު އެއް ފަހަރު ސަރުކާރުގެ ޕާރފޯމެންސް ރައްޔިތުންގެ މަންދޫބުން މެދުވެރިކޮށް އަޅާކިޔުމުގެ ފުރުސަތު ދިނުން ކަމަށް މީކާއިލް ވިދާޅުވި
ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް
2025 ވަނަ އަހަރުގެ ބަޖެޓަކީ މެމްބަރުންގެ އަތުން ސަރުކާރު ޖަވާބުދާރީކުރުމުގެ ފުރުސަތު ދޫކޮށްލާނެ ފުރަތަމަ ފަހަރު ކަމަށް ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ވިދާޅުވެއްޖެއެވެ.
މީކާއިލް އެފަދައިން ވިދާޅުވީ ހޯމަ ދުވަހު ބަޖެޓް ބަހުސްގައި ވާހަކަދައްކަވަމުންނެވެ.
މީކާއިލް ވިދާޅުވީ ބަޖެޓް މަޖިލީހަށް ފޮނުވާ ބޭނުމާއި މެދު ވިސްނާލަން ޖެހޭ ކަމަށާ އޭގެ އެއް ބޭނުމަކީ އަހަރަކު އެއް ފަހަރު ސަރުކާރުގެ ޕާރފޯމެންސް ރައްޔިތުންގެ މަންދޫބުން މެދުވެރިކޮށް އަޅާކިޔުމުގެ ފުރުސަތު ދިނުން ކަމަށެވެ. އަދި ރައްޔިތުންގެ ފައިސާ ހޭދަކުރާ ގޮތް ރައްޔިތުންނަށް އެންގުމަކީ ބަޖެޓްގެ އެއް ބޭނުން ކަމަށް އޭނާ ވަނީ ފާހަގަކުރައްވާފައެވެ. ރައްޔިތުންގެ ތިޖޫރީ އަށް މަޖިލިސް ފާރަވެރިވާ މިންވަރު އަހަރެއްގެ ތެރޭގައި އެނިގެން ދިއުމަކީ އެ ބަޖެޓް ހުށަހެޅުމުގެ އިތުރު ބޭނުމެއް ކަމަށް ވެސް އޭނާ ވިދާޅުވިއެވެ. އެހެންނަމަވެސް 2025 ވަނަ އަހަރުގެ ބަޖެޓް ހުށަަހަޅާ އިރު އުސޫލީ މައްސަލަތަކެއް ފާހަގަކުރެވޭ ކަމަށް މީކާއިލް ވަނީ ވިދާޅުވެފައެވެ. ރައްޔިތުންގެ މަޖިލީހުގެ ހަޔާތުގައި، މަޖިލީހާއި، ސަރުކާރާއި، މުއައްސަސާތަކަށް އެނގި ތިބެ ޤާނޫނާއި ޚިލާފު ބަޖެޓެއް ހުށަހަޅާ މިއީ ފުރަތަމަ ފަހަރު ކަމަށް މީކާއިލް ވަނީ ފާހަގަކުރައްވާފައެވެ. މީކާއިލް އިތުރަށް ވިދާޅުވީ 2025 ވަނަ އަހަރުގެ ބަޖެޓުގައި އުސޫލީ މައްސަލަތަކެއް އެބަހުރި ކަމަށާއި އެހެން ޤައުމެއްގައި ނަމަ ފިނޭންސް މިނިސްޓަރ އިސްތިއުފާ ދޭން ޖެހޭނެ ކަމަށެވެ.
ޕީއެންސީގެ ސަރުކާރަށް އަހަރެއް ވެގެންދާ އިރު މިހާ އޮށްޓަރެއް ނެތް ދިއުޅި އެއްނުވާ ސަރުކާރެއް ނުފެންނަ ކަަމަށް މީކާއިލް ވިދާޅުވިއެވެ. މިދިޔަ އަހަރަށް ވުރެ 7 ބިލިއަން ބޮޑު ބަޖެޓެއް ހުށަހެޅި އިރު ޚަރަދު ކުޑަކުރަން ކުރި އެއްވެސް ކަމެއް ބަޖެޓުން ނުފެނުމަކީ ކަންބޮޑުވުމެއް ކަމަށް އޭނާ ވިދާޅުވިއެވެ. އެހެންކަމުން ބަޖެޓުގެ ޚަރަދު އިންތިހާ އަށް އިތުރުވެފައިވާ ކަމަށާއި ގޮނޑި ހޫނު ކުރާ ސިޔާސީ މީހުންނަށް ކުރާ ޚަރަދު އިތުރުވެފައިވާ ކަމަށް އޭނާ ވިދާޅުވިއެވެ. އަދި ރައްޔިތުންނަށް ވާ ފައިދާ މި ބަޖެޓުން ފެންނަ މިންވަރު ކުޑަ ކަމަށާއި ރައްޔިތުންގެ ޖީބަށް ސަރުކާރުން އަތް ބާނާ މަންޒަރު ފެންނަ ކަމަށް މީކާއިލް ވަނީ ވިދާޅުވެފައެވެ. މީގެ އިތުރުން ސަރުކާރުގެ އެއްވެސް ރޭވުންތެރިކަމެއް ނެތް ކަމަށް ފާހަގަކުރައްވާ މީކާއިލް ވަނީ އެކަމަށް ފާޑު ވިދާޅުވެފައެވެ. ހަމައެހެންމެ މިއީ ޕީއެސްއައިޕީ އަށް ކުރާ ޚަރަދު އެންމެ ބޮޑު ބަޖެޓްކަމަށް ބުނެ ސަރުކާރުން ދައްކާ ވާހަކަ އަކީ ހަގީގަތާއި ޚިފާލު ވާހަކަތަކެއް ކަމަށް މީކާއިލް ވަނީ ވިދާޅުވެފައެވެ.
ރައްޔިތުންގެ މަޖިލީހަށް 56.6 ބިލިއަން ރުފިޔާގެ 2025 ވަނަ އަހަރުގެ ދައުލަތުގެ ބަޖެޓް ހުށަހެޅުއްވީ ފިނޭންސް މިނިސްޓަރު މޫސާ ޒަމީރެވެ. އަންނަ އަހަރުގެ ބަޖެޓަކީ 56,647,600,859 (ފަންސާސް ހަ ބިލިޔަން، ހަސަތޭކަ ސާޅީސް ހަތް މިލިޔަން، ހަ ލައްކަ، އަށްސަތޭކަ ފަންސާސް ނުވަ) ރުފިޔާއެވެ.
ބަޖެޓް ހުށަހަޅުއްވަމުން ފިނޭންސް މިނިސްޓަރު ޒަމީރު ވިދާޅުވީ ހަރަދުގެ ގޮތުގައި ހިނގާނީ 49.2 ބިލިޔަން ރުފިޔާއެވެ. އޭގެތެރޭގައި ހިމެނެނީ ރިކަރަންޓް ހަރަދުގެ ގޮތުގައި 35.9 ބިލިޔަން ރުފިޔާއާއި ކެޕިޓަލް ހަރަދުގެ ގޮތުގައި 13.3 ބިލިޔަން ރުފިޔާއެވެ.
