އަންރުވާ އާ ގުޅުން ކަނޑާލިކަން އިޒްރޭލުން ރަސްމީކޮށް އދ އަށް އަންގައިފި

ފަލަސްތީނުގެ ރެފިއުޖީންނަށް އެހީވާ އދގެ އޭޖެންސީ (އަންރުވާ) އާ ގުޅުން ކަނޑާލިކަން އިޒްރޭލުން އދ އަށް ރަސްމީކޮށް އަންގައިފިއެވެ.

މިކަން ހާމަ ކުރީ އިޒްރޭލުގެ ފޮރިން މިނިސްޓްރީން ހޯމަ ދުވަހުއެވެ.

ހޯމަ ދުވަހު ނެރުނު ބަޔާނުގައި އިޒްރޭލުގެ ފޮރިން މިނިސްޓްރީން ބުނެފައިވަނީ، އަންރުވާ އާއެކު އިޒްރޭލުން ބާއްވާ ގުޅުމުގެ އަސާސް ކަމުގައިވާ 1967 ގެ އެއްބަސްވުން އުވާލާފައިވާ ކަމަށެވެ.

އިޒްރޭލު ޕާލިމަންޓުން ވަނީ އަންރުވާގެ މަސައްކަތްތަކަށް ހުރަސް އެޅުމަށް ފާއިތުވި ހަފްތާގައި ސުވާލު އުފެދޭ ދެ ބިލެއް ފާސްކޮށްފައެވެ. އެއީ އިޒްރޭލުގެ ސަރަޙައްދުގައި އަންރުވާ ހަރަކާތްތެރިވުން މަނާކުރުމާއި، އިޒްރޭލުން ހިފާފައިވަ ހިސާބުތަކާއި އިރުމަތީ ޖެރޫސަލަމް އަދި ޣައްޒާގައި ހުރި އަންރުވާގެ މަރުކަޒުތައް ބަންދުކުރުމަށެވެ.

އދގެ މި އޭޖެންސީން ތަޢުލީމާއި، ޞިއްޙީ ޚިދުމަތްތަކާއި އަދި އެހެނިހެން އަސާސީ ޚިދުމަތްތައް ފޯރުކޮށް ދެނީ 1948 ގެ ހަނގުރާމައިގައި ފަލަސްތީނުން ރެފިއުޖީންނަށް ވެފައިވާ މީހުންނާއި އެމީހުންގެ ދަރިންނަށެވެ. މިހާރު މި އަދަދު ގާތްގަނޑަކަށް 6 މިލިއަނަށް އަރައެވެ. ޣައްޒާގެ 2.3 މިލިއަން އާބާދީގެ ގިނަ ބައެއް އެކުލެވިގެންވަނީ ރެފިއުޖީ ޢާއިލާތަކުންނެވެ.

އަންރުވާ އަކީ ހުއްޓުމެއްނެތި އިޒްރޭލުގެ ފާޑުކިޔުމާއި ބަހުގެ ހަމަލާތައް އަމާޒުވަމުން އައިސްފައިވާ ޖަމާއަތެކެވެ. އިޒްރޭލުން ތުހުމަތު ކުރަނީ އަންރުވާ އިން އިޒްރޭލާ ދެކޮޅު ސިޔާސަތެއް ގެންގުޅޭ ކަމަށެވެ.

ފާއިތުވި އަހަރުގެ އޮކްޓޯބަރު މަހުން ފެށިގެން ހިނގަމުންދާ ޣައްޒާގެ ހަނގުރާމައިގައި، އިޒްރޭލުން ތުހުމަތު ކުރަނީ އަންރުވާ އަށް ހަމާސްގެ ނުފޫޒު ވަރަށް ބޮޑަށް ފޯރާފައިވާ ކަމަށާއި، އަންރުވާގެ ބައެއް މުވައްޒަފުން އޮކްޓޯބަރު 7 ގައި އިޒްރޭލަށް ދިން ހަމަލާގައި ބައިވެރިވި ކަމަށެވެ. އދ އިން ވަނީ މި ތުހުމަތުތައް ދޮގު ކޮށްފައެވެ.

އިޒްރޭލުން އަންރުވާ މަނާކުރުމަށް ގާނޫނެއް ފާސް ކުރުމާ ގުޅިގެން އދ އާއި ގިނަ ގައުމުތަކަކުން ވަނީ ވަރަށް ބޮޑަށް ކަންބޮޑުވެފައެވެ. މިހާރުވެސް ފަލަސްތީނުގެ ރެފިއުޖީންގެ ހާލަތު އެހާ ބޮޑަށް ދަށަށް ގޮސްފައިވަނިކޮށް އަންރުވާ ގެ މަސައްކަތްތަކަށް އިތުރު ގޮންޖެހުންތައް ކުރިމަތިވާނަމަ ފަލަސްތީނުގެ އިންސާނީ ހާލަތު ވަރަށް ބޮޑަށް ގޯސްވާނެ ކަމަށް ވަނީ ބެލެވިފިއެވެ.

ހޯމަ ދުވަހު އަންރުވާއިން ބުނެފައިވަނީ، އެ ޖަމްޢިއްޔާގެ މަސައްކަތްތައް އިޒްރޭލުން މަނާކުރުމުން ހަނގުރާމައިގެ ވޭނުގައިވާ ޣައްޒާގެ ރައްޔިތުންނަށް ފޯރުކޮށްދެމުންދާ އިންސާނީ އެހީގެ މަސައްކަތްތައް "ފަނާވެގެން" ހިނގައިދާނެ ކަމަށެވެ.

"މި ޤާނޫނު ތަންފީޒުކޮށްފިނަމަ، ޣައްޒާގައި ކުރެވޭ ބައިނަލްއަޤްވާމީ އިންސާނީ އެހީގެ މަސައްކަތްތައް ފަނާވެގެން ހިނގައިދާނެ - އެއީ އަންރުވާ އަކީ މި މަސައްކަތުގެ ނާރެސް ކަމަށްވާތީ،" އަންރުވާގެ ތަރުޖަމާނު ޖޮނަތަން ފައުލަރ އޭއެފްޕީ ނިއުސް އޭޖެންސީއަށް ބުނެފައިވެއެވެ.