2 މިލިއަން ރުފިޔާގެ ހެރޮއިންއާއެކު އަތުލައިގަތް އިންޑިއާ ދެމަފިރިންގެ ބަންދަށް 15 ދުވަސް ޖަހައިފި

2 މިލިއަން ރުފިޔާގެ ހެރޮއިންއާއެކު އަތުލައިގަތް އިންޑިއާ ދެމަރިފިންގެ ބަންދަށް 15 ދުވަސް ޖަހައިފިއެވެ.

ވައިގެ މަގުން ރާއްޖެއައި އިންޑިއާގެ ދެ މީހެއްގެ ލަގެޖުން މަސްތުވާތަކެތި ކަސްޓަމްސްއިން އަތުލައިގަނެފައިވަނީ މި މަހުގެ 15 ވަނަ ދުވަހުއެވެ. މެލޭޝިއާއިން ރާއްޖެއައި އިންޑިއާގެ ދެފަސިންޖަރުންގެ ލަގެޖްގައި މަސްތުވާތަކެތި ރައްކާކޮށްގެން ގެނެސްފައިވާ ކަމަށް ޝައްކުކުރެވިގެން، މިދެފަސިންޖަރުންގެ ލަގެޖް ބަލައިފާސްކުރުމުގެ ތެރޭގައި ކަމަށެވެ. އެއީ އުމުުރުން 41 އަހަރުގެ މުހައްމަދު ޝޯއިބް، އަދި އުމުުރުން 38 އަހަރުގެ އައިޝާއެވެ.

އެގޮތުން ބަލާފާސްކުރުމުގެ ތެރޭގައި މި ދެފަސިންޖަރުގެ ލަގެޖުން މަސްތުވާތަކެތި ކަމަށް ޝައްކު ކުރެވޭ ތަކެތި ފެނުމުން، އެ ތަކެތި ފުރަތަމަ މަރުހަލާގައި ތަހުލީލުކުރި އިރު، މަސްތުވާތަކެތީގެ ބާވަތެއް ކަމަށްވާ ހެރޮއިން އަށް ވަނީ ޕޮޒިޓިވް ވެފައިވާ ކަމަށް ކަސްޓަމްސްއިން ބުނެއެވެ.

މީގެ އިތުރުން ކަސްޓަމްސްއިން ބުނީ މިތަކެތީގެ ބަރުދަނުގައި ޕެކިންއާއި އެކު ޖުމްލަ 2.05 ކިލޯ ހުރިއިރު، މިތަކެތީގެ މަގުމަތީ އަގަކީ 2,050,000.00 (ދެ މިލިއަން ފަންސާސް ހާސް) ދިވެހި ރުފިޔާކަމަށް ލަފާކުރެވޭ ކަމަށެވެ.

މި ދެމީހުންގެ ބަންދާއިމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކޮށް ބަންދާމެދު ގޮތެއް ނިންމާފައިވަނީ ތަރުޖަމާނެއްގެ ހާޒިރުގައެވެ. އެގޮތުން ޝޯއިބް އާއި އޭނާގެ އަންހެނުންގެ ހަރަކާތްތައް ހުރިގޮތުން އައިޝާގެ ނަމުގައި އިން ލަގެޖްގެ ފުލުގައި ކޮންސީލްމަންޓެއް ހުރިކަމަށް ފާހަގަކުރެވިގެން އެއީ މަސްތުވާތަކެތިކަމަށް ބެލެވިގެން ކޮންޓްރޯލް ޑެލިވަރީ އޮޕަރޭޝަނެއް ކުރިއަށް ގެންދިޔައެވެ.

އެގޮތުން ލަގެޖްގެ ތެރެއިން 1 ރަބަރުގަނޑު ފެނިފައިވާ އިރު އޭގެ ބަރުދަނުގައި 2.05 ކިލޯ ހުއްޓެވެ. އަދި މި ދެމީހުންގެ މައްޗަށް ވެސް ޖިނާއީ އިޖްރާއަތުގެ ގާނޫނުގެ 22 ވަނަ މާއްދާގައި ބަޔާންކޮށްފައިވާ ޖިނާއީ ބޮޑެތި ކުށްތަކުގެ ތެރޭގައި ހިމެނޭ ކުށްތަކުގެ ތުހުމަތު މި ދެމީހުންގެ މައްޗަށް ވަނީ ކުރެވިފައެވެ.

މި ދެމީހުން ބުނެފައިވަނީ އެއީ މީހަކު ހަވާލުކުރި އެއްޗެއް ކަމަށާއި، ލަގެޖް ޗެކްކުރި އިރުވެސް އެ އެއްޗެއް ނެތްކަމަށާއި، އޭގައި އެއްޗެއް ފޮރުވާފައި ހުރިކަމެއް ނޭނގޭ ކަމަށެވެ. މީގެ އިތުރުން ދައުލަތުގެ ވަކީލެއް ބޭނުންވާކަމަށް ބުނެފައިވާތީ، ފޯމު ފުރިފައިވާ ކަމަށާއި، އާދިއްތަ ދުވަހު އޭޖީ އޮފީހަށް ފޯމް ހުށަހެޅޭނެކަމަށް އައިއޯ ބުނެފައިވެއެވެ. އަދި ވަކީލެއް ހަމަޖެހުމުން، މި މުއްދަތުގެ ތެރޭގައި ފަނޑިޔާރެއްގެ ކުރިމައްޗަށް ހާޒިރުކުރުމަށް ވަނީ އަންގާފައެވެ.