ބުދަ ދުވަހު އިޒްރޭލު ސިފައިން ދިން ހަމަލާއެއްގައި ޝަހީދުކޮށްލި ހަމާސްގެ ލީޑަރު ޔަހްޔާ ސިންވާރުގެ އެންމެ ފަހު ވަގުތުކޮޅު ކަމަށް ބުނާ ވީޑިއޯއެއް އިޒްރޭލުގެ އަސްކަރިއްޔާ އިން އާންމުކޮށްފައެވެ.
މި ފުޓޭޖަކީ ސިންވާރު އިށީނދެ އިންނަ ޢިމާރާތެއްގެ ތެރެއަށް ވަދެފައިވާ ޑްރޯނަކުން ނަގާފައިވާ ފުޓޭޖެކެވެ.
ސިންވާރު އެންމެ ފަހުން ފެންނަ ވީޑިއޯ ކަމަށް ބުނާ ވީޑިއޯ ނެގުމުގެ ކުރިންވެސް އެ އިމާރާތައް ވަރަށް ވަރުގަދަ ހަމަލާއެއް ދީފައިވާކަން ފާހަގަ ކުރެވެއެވެ. މުޅި އިމާރާތް ފެންނަނީ ފުނޑުފުނޑުވެފައި ވަނިކޮށްނެވެ.
ސިންވާރު ކަމަށް ބުނާ ފަރާތް ވީޑިއޯ އިން ފެންނަ ގޮތުގައި ގެއެއްގެ ސިޓިންގ ރޫމްކަމަށް ބެލެވޭ ތަނެއްގައި ގޮނޑިއެއްގައި އިށީނދެ އިންނަ މަންޒަރު ފެނެއެވެ.
ބައެއް ރިޕޯޓްތަކުގައި ބުނެފައިވާ ގޮތުން ގޮނޑީގައި ސިންވާރު އިށީނދެ އިން އިރުވެސް އޭނާ އަށް ވަނީ ޒަޚަމްތަކެއް ލިބިފައެވެ.
މި ފުޓޭޖު ހާމަކޮށްފައިވަނީ ސިންވާރު ޝަހީދު ކޮށްލި ކަމުގެ މައުލޫމާތު ހާމަކުރަން އިޒްރޭލުގެ އަސްކަރިއްޔާއިން ބޭއްވި ނޫސްވެރިންގެ ބައްދަލުވުމެއްގެ އިޒްރޭލުގެ އަސްކަރިއްޔާގެ ތަރުޖަމާނު ޑެނިއެލް ހަގާރީއެވެ.
ޑްރޯންގެ މަންޒަރުތަކުން ފެންނަ ގޮތުގައި ސިންވާރުގެ އަތުގައި އޮންނަ އެއްޗެއް އެންމެ ފަހު ވަގުތުވެސް ޑްރޯން އާ ދިމާލަށް އެއްލައެވެ. އެއެއްޗަކީ ކޮން އެއްޗެއް ކަމެއް ސާފެއް ނުވެއެވެ.
ޑެނިއަލް ހަގާރީ ކުރިން ބުނެފައިވަނީ، ޙަމާސްގެ ލީޑަރު ބިމުގެ އަޑީގައިވާ ބޮޑު ޓަނަލް ނިޒާމުން ނުކުމެ، ބިންމަތީގައި އުޅެމުން ދިޔައީ ޣައްޒާގެ އުތުރުގެ އިތުރަށް ރައްކާތެރި އެހެން ސަރަހައްދަކަށް ދިއުމަށް ކަމަށް ޤަބޫލުކުރާ ކަމަށެވެ.
ޔަހްޔާ ސިންވާރަށް ދިން ހަމަލާ އާ ބެހޭ ގޮތުން ޓީވީން ދެއްކި ބްރީފިންގެއްގައި، ހަގާރީ ބުނެފައިވަނީ ސިންވާރުގެ ޑީއެންއޭ ހޯދީ ކުރިން އިޒްރޭލުގެ 6 ރަހީނުން މަރާލެވުނު ޓަނަލަކާ ގާތްގަނޑަކަށް ފަސް މީޓަރު ދުރުން ކަމަށެވެ.
ސިންވާރާއި ހަމާސްގެ އެހެން ބައެއް ހަނގުރާމަވެރިން ހަމާލާ ދެވުނު ސަރަޙައްދުގައި "ދުވަސްކޮޅަކު" ތިބިކަމަށް އޭނާ ބުނެފައިވެއެވެ
