ސިންވާރު ޝަހީދުކޮށްލުމުން ޖިހާދުގެ ރޫހު ވާނީ އިތުރަށް ވަރުގަދަ: އީރާން

ހަމާސްގެ ލީޑަރު ޔަހްޔާ ސިންވާރު ޝަހީދުކޮށްލުމުން ސަރަހައްދުގައި ޖިހާދުގެ ރޫހު ވާނީ އިތުރަށް ވަރުގަދަ ކަމަށް އީރާނުން ބުނެފިއެވެ.

އދ. އަށް ކަނޑައަޅާފައިވާ އީރާނުގެ މިޝަން އިން މިހެން ބުނީ ސިންވާރު ޝަހީދު ކޮށްލި ކަމަށް އިޒްރޭލުން ހާމަކުރިތާ މަދު ގަޑީއިރެއްގެ ތެރޭގައެވެ.

ބުރާސްފަތި ދުވަހު އީރާނުގެ މިޝަން އިން "ޖިހާދުގެ ރޫހު ވަރުގަދަވެގެންދާނެ, ޒުވާނުންނާއި ކުޑަކުދިންނަށް އޭނާ މިސާލަކަށްވެ، ފަލަސްތީނު މިނިވަންކުރުމަށް އޭނާގެ މަގުގައި ކުރިއަށްދާނެ ބަޔަކަށް އެމީހުން ވެގެންދާނެ،" ކަމަށް އެކްސްގައި ކުރި ޕޯސްޓެއްގައި ބުނެފައިވެއެވެ.

"ހިސޯރު ކުރުމާއި އަނިޔާވެރިކަން އޮތްހާ ހިނދަކު، ޖިހާދުގެ ރޫހު ދެމިއޮންނާނެ, އެހެނީ ޝަހީދުވި މީހާ އަކީ ދިރިހުރި މީހެއް، އޭނާ އެހެން މީހުންނަށް ވެގެންދާނީ ހިތްވަރު ލިބިގަތުމުގެ މަސްދަރަކަށް،" އީރާނުގެ މިޝަން އިން ކުރި ޕޯސްޓުގައި އިތުރަށް ބުނެފައިވެއެވެ.

އިޒްރޭލު ސިފައިން ހަމާސްގެ ވެރިޔާ ޔަހްޔާ ސިންވާރު ޝަހީދު ކޮށްލިކަން ހާމަކަށްފައިވަނީ ބުރާސްފަތި ދުވަހުއެވެ. އިޒްރޭލުން ބުނީ ސިންވާރު "ނައްތާލީ" ބުދަ ދުވަހު އެހެން ދެ ހަނގުރާމަވެރިޔަކާ އެކު އިޒްރޭލު ސިފައިންގެ ހަމަލާއެއްގައި ބުދަ ދުވަހު ކަމުގައެވެ.

ހަމާސް އިން މިކަމާ ގުޅޭ ގޮތުން އަދި އެއްވެސް އެއްޗެއް ނުބުނެއެވެ.