މާލެއިން ގިނަ އަދަދެއްގެ މަސްތުވާތަކެއްޗާއި އެއްކޮށް ބިދޭސީންތަކެއް ހައްޔަރު ކޮށްފި
16 އޯގަސްޓު 2017 | ބުދަ 16:24ފުލުހުން ހައްޔަރުކޮށްފައިވަނީ އުމުރުން 25 އަހަރާއި އުމުރުން 30 އަހަރުގެ ދެ ބިދޭސީން
ފުލުހުން އަތުލައިގަނެފައިވާ އެއްޗެހި
ކޯޓް އަމުރެއްގެ ދަށުން ބުދަ ދުވަހު މާލޭގެ ހެންވޭރު ގެއަކާއި ފިހާރައެއް ބަލައި ފާސްކޮށް ގިނަ އަދަދެއްގެ މަސްތުވާތަކެއްޗާއި އެކު ދެ ބިދޭސީއަކު ފުލުހުންގެ ބެލުމުގެ ދަށަށް ގެންގޮސްފިއެވެ.
ފުލުހުންގެ މީޑިއާ އޮފިޝަލް ވިދާޅުވީ ފުލުހުންގެ ބެލުމުގެ ދަށަށް ގެންގޮސްފައި ވަނީ އުމުރުން 25 އަހަރާއި އުމުރުން 30 އަހަރުގެ ދެ ބިދޭސީން ކަމަށެވެ. އަދި ގެ ބަލައި ފާސްކުރިއިރު މަސްތުވާތަކެތި ކަމަށް ޝައްކު ކުރެވޭ ފިލްމު ހުސްކުރި 1 ދަޅު ފެނިފައިވާ ކަމަށް ފުލުހުންގެ މީޑިއާ އޮފިސަލް ވިދާޅުވިއެވެ.
ފިހާރަ ބަލައި ފާސްކުރިއިރު ފިހާރަ ތެރެއިން ފިލްމު ހުސްކުރި 29 ދަޅާއި ބޮޑު ރަބަރު ޕެކެޓެއް ފެނިފައިވާ ކަމަށް ފުލުހުންގެ މީޑިއާ އޮފިޝަލް ވިދާޅުވިއެވެ.
ފުލުހުން އިތުރަށް ބުނީ ފެނިފައިވާ ތަކެތީގެ ވަގުތީ ބަރުދަނަކީ 1 ކިލޯ 462 ގްރާމް ކަމަށެވެ.
އޮގަސްޓް މަހުގެ 15 ވަނަ ދުވަހު ރާއްޖެއައި ބަންގްލަދޭޝް ފިރިހެނެއްގެ އަތުންވެސް ފުލުހުން ވަނީ މަސްތުވާތަކެތި އަތުލައިގެންފައެވެ.
