ސްޓްރޯކެއް ޖެހުނު މީހަކު ހޮސްޕިޓަލްގެ އިހުމާލުން ވެއްޓި، ސިކުނޑިއަށް ލޭ އެޅުނުކަމުގެ ތުހުމަތު އާއިލާއިންކޮށްފި

ގދ.މަޑަވެލިން ސްޓްރޯކެއް ޖެހިގެން ޑރ.އަބްދުއްސަމަދު މެމޯރިއަލް ހޮސްޕިޓަލް އަށް ގެންދިޔަ ބަލި މީހަކު ހޮސްޕިޓަލްގެ އިހުމާލުން ވެއްޓި އޭނާ އަށް ބޮޑެތި އަނިޔާތަކެއް ވެއްޖެއެވެ.

މަޑަވެލިން ސްޓްރޯކެއް ޖެހިގެން ޑރ.އަބްދުއްސަމަދު މެމޯރިއަލް ހޮސްޕިޓަލް އަށް ގެންދިޔަ އައިމިނަތު އިސްމާއިލް ވެއްޓިފައި ވަނީ އޭނާ ހޮސްޕިޓަލަށް ގެންދިއުމަށް ލޯންޗުން ތިނަދު އަށް ގެންގޮސް، ލޯންޗުން އޭނާ އެމްބިއުލާންސަށް އެރުވުމުގެ ތެރޭގައެވެ. ރާއްޖެއެމްވީ އަށް މިކަމާއި ގުޅޭ ގޮތުން މައުލޫމާތުދެމުން އޭނާގެ އާއިލާ މީހެއްކަމަށްވާ އަހުމަދު ޝަރީފް ބުނީ މި މައްސަލައިގައި ބަލި މީހާ އާއި މެދު ހޮސްޕިޓަލުން ވަރަށް ބޮޑަށް އިހުމާލުވެފައިވާ ކަމަށެވެ. އައިމިނަތު ސްޓްރޯކެއް ޖެހުނުކަން އެނގިފައި ވަނީ ހޮނިހިރުގަ ދުވަހު ރޭ 08:00ގައި ކަމަށް ޝަރީފް ވަނީ ބުނެފައެވެ. އަދި އޭނާ މަޑަވެލިން ތިނަދުއަށް ލޯންޗްގައި ގެންދިޔައީ އެ ރޭ 10:00 ހާއިރުކަމަށް އޭނާ ވަނީ ފާހަގަކޮށްފައެވެ. 61 އަހަރުގެ އައިމިނަތު އަށް އިތުރަށް އަނިޔާވެފައި ވަނީ އޭނާ އެމްބިއުލާންސަށް އަރުވަން މަސައްކަތް ކުރުމުގެ ތެރޭގައި އޭނާ ވެއްޓި، ބޯފަޅައިގެން ދިއުމުން ކަމަށް ރާއްޖެ އެމްވީ އަށް ވަނީ މައުލޫމާތު ލިބިފައެވެ.

ޝަރީފް ބުނެފައި ވަނީ ޑރ.އަބްދުއްސަމަދު މެމޯރިއަލް ހޮސްޕިޓަލުން އައިމިނަތު އެމްބިއުލާންސަށް އަރުވަން މަސައްކަތް ކުރީ ފިލައެއް ކަހަލަ އެއްޗެއްގައި ކަމަށާއި، އޭނާ ވެއްޓުމުގެ ސަބަބުން ބޯފަޅައިގެން ގޮސް ގެއްލުންވެފައިވާ ކަމަށެވެ.

މިކަން ހިނގާ ދިޔަ ގޮތް ބެލުމަށް އެ ހޮސްޕިޓަލްގެ މެނޭޖަރަށް ގުޅުމުން ވިދާޅުވީ އެ މައުލޫމާތު ހިއްސާކުރެވޭނީ އިންފޮމޭޝަން އޮފިސަރަށް ކަމަށެވެ. ނަމަވެސް ފަހުން ރާއްޖެއެމްވީން އިސް ފަރާތްތަކާއި އިންފޮމޭޝަން އޮފިސަރަށް ތަކުރާރުކޮށް ގުޅާ، މެސެޖުކުރި ނަމަވެސް ފޯނަށް ޖަވާބުދެއްވާފައި ނުވާތީ ހޮސްޕިޓަލްގެ ބަހެއް ވަނީ ލިބޭ ގޮތް ނުވެފައެވެ. އަދި މި މައްސަލަ ސިއްހީ ވުޒާރާ އަށް ހުށަހެޅިކަން ސާފުކުރުމަށް ކުރި މަސައްކަތް ވެސް ވަނީ ކާމިޔާބުވާ ގޮތް ނުވެފައެވެ.

ރާއްޖެއެމްވީ އަށް ވަނީ މި މައްސަލަ އާއި ގުޅުން ހުރި ބައެއް ލިޔުންތައް ލިބިފައެވެ. އެ މެޑިކަލް ލިޔުންތަކުން ބަލިމީހާ އަށް ލިބިފައިވާ ގެއްލުންތައް ސާފުވެއެވެ. ނަމަވެސް އޭނާ ވެއްޓުމުގެ ސަބަބުން ލިބުނު އަނިޔާތަކާއި މެދު ހޮސްޕިޓަލްގެ ބަހެއް ލިބިފައި ނުވާތީ އެކަން ހިނގާ ދިޔަ ގޮތް ސާފެއް ނޫނެވެ.

އާއިލާގެ ފަރާތުން ވަނީ ބަލި މީހާ މާލެ ގެނައުމުގަ ވެސް ވަރަށް ގިނަ ދަތިތަކާއި ދިމާވި ކަމަށާއި ހޮސްޕިޓަލްގެ އެއްބާރުލުން އެންމެ ހިތްހަމަޖެހޭ މިންވަރަށް ނުލިބޭ ކަމަށް ފާހަގަކޮށްފައެވެ. ތަފާތު އެކި ގޮތްގޮތުން ކުރި މަސައްކަތުން އާދިއްތަ ދުވަހު މެންދުރު އައިމިނަތު މާލެ ގެނެސް މިހާރު އޭނާ އަށް ދަނީ އައިސީޔޫގައި ފަރުވާދެމުން ކަމަށް އާއިލާގެ ފަރާތުން ރާއްޖެ އެމްވީ އަށް މައުލޫމާތު ދިން މީހާ ވަނީ ބުނެފައެވެ.