މީހަކު ރަހީނުކޮށް އޭނާލައްވާ މަސްތުވާތަކެތި ވިއްކާ އިނގިލި ބުރިކޮށްލި މައްސަލައިގައި އެމްއެންޑީއެފްގެ ދެ އޮފިސަރުންނާއި 3 ކުޑަކުދިން ހިމެނޭ
ޖިސްމާނީގޮތުން ބޮޑެތި އަނިޔާތައްދީ އޭނާގެ ވާތު ކުޑަވައި ބުރިކޮށްލާފައިވޭ
މީހަކު ރަހީނުކޮށް މަސްތުވާތަކެތީގެ ވިޔަފާރި އޭނާ ލައްވާ ކުރުވި މައްސަލައިގައި ހައްޔަރުކުރި 5 މީހުން
މީހަކު ރަހީނުކޮށް އޭނާލައްވާ މަސްތުވާތަކެތި ވިއްކާ އިނގިލި ބުރިކޮށްލި މައްސަލައިގައި އެމްއެންޑީއެފްގެ ދެ އޮފިސަރުންނާއި 3 ކުޑަކުދިން ހިމެނޭ ކަމަށް ފުލުހުން ބުނެފިއެވެ.
މޭޖަރ ކްރައިމް އިންވެސްޓިގޭޝަންގެ ހެޑް، ޗީފް ސުޕްރިންޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ 2024 މެއި 25 ވަނަ ދުވަހުން ފެށިގެން 2024 ޖޫން 25 ވަނަ ދުވަހާއި ހަމައަށް މަލޭގެ ގެއެއްގެ ތެރޭގައި ހުއްދަ ނޫން ގޮތުގައި މީހަކު ހިފަހައްޓައި، އޭނާއަށް ބިރުދައްކައި އޭނާއަށް މަޖުބޫރުކުރުވައިގެން އޭނާލައްވާ މަސްތުވާތަކެތީގެ ވިޔަފާރި ކުރުވައި، އޭނާއާއި މެދު މާރާމާރީ ހިންގައި، އޭނާއަށް ޖިސްމާނީގޮތުން ބޮޑެތި އަނިޔާތައްދީ އޭނާގެ ވާތު ކުޑަވައި ބުރިކޮށްލާފައިވާ ކަމަށެވެ.
މި މައްސަލައިގެ ތަފްސީލު ދެއްވަމުން ޝިފާއު ވިދާޅުވީ މި މައްސަލަ ހުށަހެޅުނީ ޖޫން 25 ވަނަ ދުވަހުގެ މެންދުރު، ޖިސްމާނީ ގޮތުން ބޮޑެތި އަނިޔާތަކެއް ލިބިފައިވާ މީހަކު ހުޅުމާލޭ ހޮސްޕިޓަލަށް ގެންދިއުމުން އެވަގުތު ހުޅުމާލޭ ހޮސްޕިޓަލުގައި ޑިއުޓީ ކުރަމުންގެންދިޔަ ފުލުހުންގެ ސަމާލުކަމަށް އެކަން އައި ހިސާބުން ކަމަށެވެ. އަދި މި މައްސަލައިގައި އަނިޔާ ލިބިފައިވަނީ 30 އަހަރުގެ ދިވެހި ފިރިހެނަކަށް ކަމަށާއި، އޭނާއަށް ޖިސްމާނީ ގޮތުން ބޮޑެތި އަނިޔާތަކެއް ދީފައިވާކަމަށް އޭނާގެ ހަށިގަނޑު ބެލިބެލުމުން ފާހަގަކުރެވިފައިވާ ކަމަށެވެ.
ޝިފާއު ވިދާޅުވީ މި މައްސަލައިގެ ތުހުމަތުގައި 5 މީހަކު ހައްޔަރުކޮށްފައިވާ ކަމަށެވެ.
ޝިފާއު ވިދާޅުވީ މި 5 މީހުންގެ ތެރެއިން 4 މީހަކު ޝަރީއަތް ނިމެންދެން ބަންދުގައި ބޭތިއްބުމަށް ކްރިމިނަލް ކޯޓުން އަމުރުކޮށްފައިވާއިރު އެކަކު ތަހުގީގު ނިމެންދެން ބަންދުކުރުމަށް އަމުރުކޮށްފައިވާ ކަމަށެވެ. ތަހުގީގު ނިމެންދެން ބަންދުކުރީ ނަފާހުއެވެ.
މި މައްސަލައިގައި އުމުރުން 18 އަހަރު ނުފުރޭ ކުޑަ 3 ކުދިން ބައިވެރިވެފައިވާ ކަމަށް ފުލުހުން ބުނެއެވެ. އަދި މި މައްސަލައިގައި ހިމެނޭ މުހައްމަދު ނަފާހުއާއި ޒަޔާން އަކީ އެމްއެންޑީއެފްގެ ވަޒީފާ އަދާކުރަމުންދާ ދެމީހުން ކަމަށް ޝިފާއު ވިދާޅުވިއެވެ.
މައްސަލައިގައި ތުހުމަތުގައި ހިމެނޭ ސާމީ، ސައިފް އަދި ނައުޝާން އަކީ މަސްތުވާތަކެތި ގެންގުޅެ ބޭނުންކުރާ މީހުން ކަމަށާއި، އަނެއް ދެމީހުންނަކީ ކުށުގެ ވެށީގައި އުޅޭ މީހުން ކަމަށް ޝިފާއު ވިދާޅުވިއެވެ.
ޝިފާއު ވިދާޅުވީ މިހާތަނަށް ބެލިބެލުމުން ފާހަގަކުރެވިފައިވަނީ މި މައްސަލައަކީ މަސްތުވާތަކެތީގެ މުއާމަލާތްތަކާއި ގުޅިގެން ހިންގާފައިވާ ކަމެއް ކަމާއި، އަދި އަނިޔާ ލިބުނު ފަރާތް މެދުވެރިކޮށް މަސްތުވާތަކެތީގެ ވިޔަފާރިކުރުވާ ކަމަށް ފާހަގަކުރެވިފައިވާ ކަމަށެވެ. އަދި އެޕާޓްމަންޓުން މަސްތުވާތަކެތީގެ ވިޔަފާރިކުރުމަށް ބޭނުންކުރާ ސާމާނު ފެނިފައިވާ ކަމަށް ޝިފާއު ވިދާޅުވިއެވެ.
