އަދުލު އިންސާފު ނެތް ތަނެއްގައި ޤައުމިއްޔަތެއްވެސް ނޯންނާނެ: އަލީ ޝަމީމް
ޤައުމިއްޔަތުގެ ބަހާތަކުގެ ތެރޭގައި މިނިވަންކަމާއި، އިސްލާމް ދީނާއި، ދިވެހި ބަސް އަދި އަކުރުގެ އިތުރުން ދިވެހި ސަޤާފަތް ހިމެނޭ
ޤައުމީ ޔުނިވަރސިޓީގެ އެސިސްޓެންޓް ޕްރޮފެސަރ އަލީ ޝަމީމް
އަދުލު އިންސާފު ނެތް ތަނެއްގައި ޤައުމިއްޔަތެއްވެސް ނޯންނާނެކަމަށް ދިވެހިރާއްޖޭގެ ޤައުމީ ޔުނިވަރސިޓީގެ އެސިސްޓެންޓް ޕްރޮފެސަރ އަލީ ޝަމީމް ވިދާޅުވެއްޖެއެވެ.
އޭނާ އެހެން ވިދާޅުވީ ރާއްޖެޓީވީގެ ޓީވީޓޯކް ޕްރޮގްރާމްގައި ވާހަކަ ދައްކަވަމުންނެވެ.
އޭނާ ވިދާޅުވީ، ޤައުމިއްޔަތުގެ ބަހާތަކުގެ ތެރޭގައި މިނިވަންކަމާއި، އިސްލާމް ދީނާއި، ދިވެހި ބަސް އަދި އަކުރުގެ އިތުރުން ދިވެހި ސަޤާފަތް ހިމެނޭ ކަމަށެވެ.
އޭގެ އިތުރުން، އާ ގައުމިއްޔަތެއްގެ ވާހަކަ ދެކެވޭއިރު ޤާނޫނުއަސާސީއާއި އެ ޤާނޫނުން ލިބިދޭ ޙައްޤުތަކުގެ އިތުރުން ޑިމޮކްރަސީވެސް ހިމެނޭކަން އޭނާ ފާހަގަ ކުރެއްވިއެވެ.
ހަމައެއާއެކު އަދުލު އިންސާފުވެސް މުހިއްމުކަން ފާހަގަ ކުރައްވައި އޭނާ ވިދާޅުވީ، އަދުލު އިންސާފު ނެތް ތަނެއްގައި ޤައުމިއްޔަތެއްވެސް ނޯންނާނެ ކަމަށެވެ.
އޭނާ އިތުރަށް ވިދާޅުވީ، ޕާޓީ ސިސްޓަމްތަކުގެ ވާދަވެރިކަން އޮންނަންވާނީ ޤައުމަށް ހެޔޮ ގޮތްތައް ހެދުމާއި، ރައްޔިތުންނަށް ރަނގަޅު ވެރިކަމެއް ކޮށްދިނުން ފަަދަ ކަންކަމުގައި ކަމަށެވެ.
ހަމައެއާއެކު، ތަރައްޤީ ގެނެސްދޭނެ އަމާޒުތަކާއި، ސިޔާސަތުތައް ފަދަ ކަންކަމަކީ ހަގީގަތުގައި ސިޔާސީ ގޮތުން ވާދަވެރިކަން އޮންނަންޖެހޭ ދާއިރާތައްކަންވެސް އޭނާ ފާހަގަ ކުރެއްވިއެވެ.
