ކަޅު ބާޒާރުގައި ޑޮލަރު ވިއްކާ އަގު 19 ރުފިޔާއާ ގާތްކޮށްފިއެވެ.
ރާއްޖެއެމްވީން ގުޅާލުމުން ޑޮލަރު ވިއްކާ ގިނަ ތަންތަނުން ބުނީ، މިވަގުތު ޑޮލަރު ވިއްކޭވަރަށް އެތަންތަނުގައި ޑޮލަރު ނެތްކަމަށެވެ.
އަދި ޑޮލަރު ގަންނަ ރޭޓުތައްވެސް އުޅެނީ 18:25ން ފެށިގެން 19 ރުފިޔާއާ ހިސާބަށްކަމަށް އެމީހުން ކިޔާދިނެވެ.
ޑޮލަރުގެ ތާށިކަން ކުރިމަތިވެފައިވާއިރު، ބީއެމްއެލްގެ ރުފިޔާ ކާޑުން ކުރެވޭ ޑޮލަރު މުއާމާލާތްތައް އޮގަސްޓު މަހުގެ 25 ވަނަ ދުވަހުން ފެށިގެން ވަނީ ސަސްޕެންޑުކޮށްފައެވެ. އެކަމާ އެތައް ބަޔަކު ގެންދަނީ ނުރުހުންވެ ސަރުކާރަށް ފާޑު ކިޔަމުންނެވެ.
ވަކިން ޚާއްސަކޮށް ޑޮލަރުގެ މައްސަލަ ހައްލުވަމުންދާކަމަށް ރައީސާއި ސަރުކާރުގެ އިސްވެރިން މިހާތަނަށްވެސް ބުނަމުން ގޮސްފަައިވާތީ، ޤައުމުގެ ހާލަތު އޮޅުވާލަމުން ގޮސްފައިވާކަމަށް އެތައް ބަޔަކު ދަނީ ބުނަމުންނެވެ.
