ޕްރޮސެކިއުޓަރ ޖެނެރަލް ހުސައިން ޝަމީމަށް ހަމަލާދިން މައްސަލައިގައި ދައުވާ އުފުލައިފިއެވެ.

ޕީޖީ ހުސައިން ޝަމީމަށް ހަމަލާދިން މައްސަލައާއި ގުޅިގެން ހައްޔަރުކުރި 7 މީހުންގެ މައްސަލަ ތަހުގީގު ނިމި ދައުވާކޮށްދިނުމަށް އެދި ޕީޖީ އޮފީހަށް ފޮނުވީ އޮގަސްޓު މަހުގެ 18 ވަނަ ދުވަހުއެވެ. ޕީޖީ އޮފީހުން މައުލޫމާތު ދޭ ގޮތުގައި އޮގަސްޓު 22 ވަނަ ދުވަހު ދައުވާތައް ވަނީ ކޯޓަށް ހުށަހަޅާފައެވެ.

އޭގެ ތެރެއިން ރ. އަލިފުށި، ރިވެލި، މިދުޙަތު އާދަމްގެ މައްޗަށް އުފުލާފައިވަނީ ނުރައްކާތެރި ހަތިޔާރެއް ބޭނުންކޮށްގެން ޤަޞްދުގައި މީހަކު މަރާލަން އުޅުމުގެ ކުށުގެ ދައުވާއެވެ. އެ ދައުވާ އުފުލާފައިވާ ސަބަބަކީ މިދުޙަތު އާދަމް އިތުރު ބަޔަކާއެކު، ޝަމީމަށް ހަމަލާދިނުމަށް ރާވައި، 31 ޖަނަވަރީ 2024 ދުވަހުގެ 07:42 އެހައިކަށްހައިއިރު، ކ. މާލެ، ނޫރު މިސްކިތް ކައިރީ މަގުމަތީގައި ޙުސައިން ޝަމީމު ހުއްޓައި، ޙުސައިން ޝަމީމުގެ ބޮލަށް ހަމަލާދިނުމަށް މަސައްކަތްކޮށް، ޙުސައިން ޝަމީމުއާ މެދު މާރާމާރީ ހިންގައި، ޙުސައިން ޝަމީމުގެ އަތުގެ މުލައްދަނޑި ޒަހަމްކޮށްލާފައިވާތީކަމަށް ޕީޖީ އޮފީހުން ބުނއެވެ.

ނުރައްކާތެރި ހަތިޔާރެއް ބޭނުންކޮށްގެން ޤަޞްދުގައި މީހަކު މަރާލަން އުޅުމުގެ ކުށުގެ ދައުވާ ލ. ގަން، ތުނޑި، ޖަވާހިރުވިލާ، މުޙައްމަދު ޖަޒްލާންގެ މައްޗަށްވެސް އުފުލާފައިވެއެވެ. އެއީ މުޙައްމަދު ޖަޒްލާން އިތުރު ބަޔަކާއެކު، ޝަމީމަށް ހަމަލާދިނުމަށް ރާވައި، 31 ޖަނަވަރީ 2024 ދުވަހުގެ ހެދުނު 07:42 އެހައިކަށްހައިއިރު، މީނާއާއެކު މިކަމުގެ ބައިވެރިވި މީހުންގެ ތެރެއިން މިދުޙަތު އާދަމް ގޮވައިގެން ސަކަލެއްގައި ކ. މާލެ، ނޫރު މިސްކިތް ކައިރިއަށް ގެންދިޔުމުން، އެވަގުތު އެތާ ކައިރީ މަގުމަތީގައި ޙުސައިން ޝަމީމު ހުއްޓައި،  މިދުޙަތު އާދަމް ސައިކަލުން ފައިބައިގެން ގޮސް ނުރައްކާތެރި ހަތިޔާރެއް ބޭނުންކޮށްގެން ޙުސައިން ޝަމީމުގެ ބޮލަށް ހަމަލާދިނުމަށް މަސައްކަތްކޮށް، ޙުސައިން ޝަމީމުއާ މެދު މާރާމާރީ ހިންގައި، ޙުސައިން ޝަމީމުގެ އަތުގެ މުލައްދަނޑު ޒަހަމްކޮށްލުމަށްފަހު އައިސް ސައިކަލަށް އެރުމުން، މިދުޙަތު އާދަމް ގޮވައިގެން އެތަނުން ގޮސްފައިވާތީކަމަށް ޕީޖީ އޮފީހުން ބުނެއެވެ.

އޭގެ އިތުރުން، ދަފްތަރު ނަންބަރު ދރ 2247، އަޙްމަދު މައިސާން ހާޝިމްގެ މައްޗަށްވެސް ނުރައްކާތެރި ހަތިޔާރެއް ބޭނުންކޮށްގެން ޤަޞްދުގައި މީހަކު މަރާލަން އުޅުމުގެ ދައުވާ އުފުލާފައިވެއެވެ. އެއީ އަހްމަދު މައިސާން ހާޝިމް އިތުރު ބަޔަކާއެކު، ޝަމީމަށް ހަމަލާދިނުމަށް ރާވައި، 31 ޖަނަވަރީ 2024 ދުވަހުގެ 07:42 އެހައިކަށްހައިއިރު، މީނާއާއެކު ބައިވެރިވި މީހުންގެ ތެރެއިން މިދުޙަތު އާދަމް ސައިކަލެއްގައި ކ. މާލެ، ނޫރު މިސްކިތް ކައިރިއަށް ގޮސް އެވަގުތު އެތާ ކައިރީ މަގުމަތީގައި ޙުސައިން ޝަމީމު ހުއްޓައި، މިދުޙަތު އާދަމް، ޙުސައިން ޝަމީމުގެ ބޮލަށް ހަމަލާދިނުމަށް މަސައްކަތްކޮށް، ޙުސައިން ޝަމީމުއާ މެދު މާރާމާރީ ހިންގައި، ޙުސައިން ޝަމީމުގެ އަތުގެ މުލައްދަނޑި ޒަހަމްކޮށްލާފައިވާތީއާއި، ހަމަލާދިނުމަށް ބޭނުންކުރި ސައިކަލު ހޯދައިދީ އެކަމަށް މީނާ މަގުފަހިކޮށްދީފައިވާތީކަމަށް ޕީޖީ އޮފީހުން ބުނެއެވެ.

މީގެ އިތުރުން ލ. މާމެންދޫ، މުރިނގު، ރަޖުވާން ލަޠީފްއާއި، ތ. ގާދިއްފުށި، މުސްތަރީގެ، ޝަމާލް ޙުސައިންއާއި، ތ. ދިޔަމިގިލި، ރުވާ، އަބާން ޢަބްދުލްހަންނާނުއާއި އދ. މާމިގިލި، ކެމީހިޔާ، ޒަޔާން ނަޞީރުގެ މައްޗަށް ނުރައްކާތެރި ހަތިޔާރެއް ބޭނުންކޮށްގެން ޤަޞްދުގައި މީހަކު މަރާލަން އުޅުމުގެ ދައުވާ އުފުލާފައިވެއެވެ. އެއީ އެމީހުން ޝަމީމަށް ހަމަލާދިނުމަށް ރާވައި، 31 ޖަނަވަރީ 2024 ދުވަހުގެ ހެދުނު 7:42 އެހައިކަށްހައިއިރު، މިކަމުގެ ބައިވެރިވި މިދުޙަތު އާދަމް ސައިކަލެއްގައި ގޮސް ކ. މާލެ، ނޫރު މިސްކިތް ކައިރީ މަގުމަތީގައި ޙުސައިން ޝަމީމު ހުއްޓައި، ނުރައްކާތެރި ހަތިޔާރެއް ބޭނުންކޮށްގެން ޙުސައިން ޝަމީމުގެ ބޮލަށް ހަމަލާދިނުމަށް މަސައްކަތްކޮށް، ޙުސައިން ޝަމީމުއާ މެދު މާރާމާރީ ހިންގައި، ޙުސައިން ޝަމީމުގެ އަތުގެ މުލައްދަނޑި ޒަހަމްކޮށްލާފައިވާތީއާއި، މި ހަމާދިން އިރު، ހަމަލާދީ ނިމެންދެން އެމީހުން ކާރެއްގައި އެތަނުގައި މަޑުކޮށްގެން އިނދެފައިވާތީއާއި، ހަމަލާދީ ނިމުމުން، ހަމަލާދިން މީހުންނާއެކު އެސަރަހައްދުން ގޮސްފައިވާތީއެވެ.