މިދިޔަ އަހަރު ފަރުވާގެ އަމުރާ ހިލާފުވި 173 މީހުން ހުކުމް ތަންފީޒު ކުރުމަށް އަމުރުކޮށްފައިވޭ: ޑްރަގް ކޯޓު
18 އޯގަސްޓު 2024 | އާދީއްތަ 13:19ފަރުވާ ނިޒާމް ހަރުދަނާ ކުރުމަށް ސަރުކާރުން ކުރާ ހޭދަ އިތުރުކުރާނެ
ޑްރަގް ކޯޓު
ފަރުވާގެ އަމުރާ ހިލާފުވެގެން މިދިޔަ އަހަރުގެ ތެރޭގައި 173 މީހެއް ވަނީ ފަރުވާއިން ވަކިކޮށް، ފުރަތަމަ ހުކުމް ތަންފީޒު ކުރުމަށް އަމުރުކޮށްފައިވާ ކަމަށް ޑްރަގް ކޯޓުން ބުނެފިއެވެ.
2023 ވަނަ އަހަރު ޑްރަގް ކޯޓުން ކޮށްފައިވާ ރީހެބިލިޓޭޝަން އަމުރުގެ ދަށުން ކާމިޔާބު ކަމާއެކު ފަރުވާގެ ޕްރޮގްރާމް ފުރިހަމަކޮށްފައިވާ ފަރާތްތަކުގެ އަގުވަޒަންކޮށް ހިތްވަރު ދިނުމަށްޓަކައި ކޯޓުން ޚާއްސަ ހަފްލާއެއް ވަނީ ބާއްވާފައެވެ.
މި ހަފްލާ ޝަރަފުވެރިކޮށްދެއްވާ ހޯމް މިނިސްޓްރީގެ ސްޓޭޓް މިނިސްޓަރު އަލްއުސްތާޒާ ލުބްނާ މުހައްމަދު ޒާހިރު ހުސެއިން ވިދާޅުވީ މަސްތުވާތަކެތީގެ ވަބާއިން ސަލާމަތްވުމަށްފަހު ހިންގޭ ފަރުވާ ޕްރޮގްރާމްތައް ނިންމައި މުޖުތަމައުއަށް ނުކުންނަ މީހުންނަށް ވަޒީފާ ހޯދަން ސަރުކާރު ހިއްސާވާ ކުންފުނިތަކުން އެހީތެރިކަން ފޯރުކޮށްދޭންޖެހޭ ކަމަށެވެ. އަދި ވިދާޅުވީ ފަރުވާ ހޯދާ ފަރާތްތަކަށް މުޖުތަމައުގެ އެހީތެރިކަން ބޭނުންވާ ކަމަށެވެ.
ލުބުނާ ވިދާޅުވީ ފަރުވާ ނިޒާމް ހަރުދަނާ ކުރުމަށް ސަރުކާރުން ކުރާ ހޭދަ އިތުރުކޮށް، އަންނަ އަހަރަށް ލަފާ ކުރާ ބަޖެޓުގައި މިކަމަށް އިތުރު 30 މިލިއަން ރުފިޔާ ހިމަނަން ނިންމާފައިވާ ކަމަށެވެ.
މީގެ އިތުރުން ޑްރަގް ކޯޓުގެ އިސްގާޒީ އަލްއުސްތާޒު އަބްދުއްސައްތާރު އަބްދުލްހަމީދު ވިދާޅުވީ މަސްތުވާތަކެއްޗަށް ދެވިހިފާފައިވާ ފަރާތްތަކުން އެކަމުން ސަލާމަތްވުމަށް ކުރާ މަސައްކަތަކީ އެހީ ފަސޭހަ ކަމެއް ނޫން ކަމަށާއި، އެކަމުގައި ކުރިމަތިލާން ޖެހޭ ގޮންޖެހުންތައް ހުރަސްކޮށް އަލުން މުޖުތަމައުއަށް ޒިންމާދާރު ގޮތެއްގައި ނުކުތުމަށް ގަދައަޅައި މަސައްކަތް ކުރުމަށް ހިތްވަރު ދޭންޖެހޭ ކަމަށެވެ. އަދި ޑްރަގް ކޯޓުން ފަރުވާއަށް އަމުރުކުރި ނަމަވެސް ފަރުވާ ދޭން ތިބި ކައުންސިލަރުންނާ އެކަމަށް ބޭނުންވާ ވަސީލަތްތައް މަދުވުމުން ބައެއް ފަހަރު ފަރުވާ ނުފެށި ލަސްވަމުންދާކަން ފާހަގަކުރެވޭ ކަމަށާއި، އެފަދަ ކަންކަމަށް ހައްލު ލިބި ފަރުވާގެ ކަންކަން އަވަހަށް ފެށި ޕްރޮގްރާމްތައް ނިމިގެން ދިޔުމަކީ މުހިންމު ކަމެއްކަން ފާހަގަކުރެއްވިއެވެ.
ޑްރަގް ކޯޓުން ބުނީ ވޭތުވެދިޔަ އަހަރު، އެކޯޓުން 586 މީހެއްގެ މައްޗަށް ފަރުވާއަށް އަމުރުކޮށްފައިވާ ކަމަށެވެ. އަދި 419 މީހެއް އެ އަހަރުގެ ތެރޭގައި ފަރުވާ ފުރިހަމަކޮށްފައިވާ ކަމަށެވެ.
އެކޯޓުން ބުނީ ފަރުވާގެ އަމުރާ ހިލާފުވެގެން މިދިޔަ އަހަރުގެ ތެރޭގައި 173 މީހެއް ވަނީ ފަރުވާއިން ވަކިކޮށް، ފުރަތަމަ ހުކުމް ތަންފީޒު ކުރުމަށް އަމުރުކޮށްފައިވާ ކަމަށެވެ.
