އުމުރުން ދުވަސްވީ މީހެއްގެ އަތުން ފޭރުނު މައްސަލައެއް ތަހުގީގު ކުރަނީ
ފޭރިފައިވަނީ 62 އަހަރުގެ މީހެއްގެ އަތުން
ފުލުހުންގެ މައި އިދާރާ
މާލޭގެ ކުލީ ކޮޓަރިއެއްގައި ހުރި އުމުރުން ދުވަސްވީ މީހެއްގެ އަތުން ފޭރުނު މައްސަލައެއް ތަހުގީގު ކުރަމުންދާ ކަމަށް ފުލުހުން ބުނެފިއެވެ.
ބުދަ ދުވަހު ފުލުހުން ބުނީ މާލެއަށް ބޭސް ފަރުވާ ކުރަން އައިސް ހުރި 62 އަހަރުގެ މީހަކު ކުއްޔަށް ހުރި ކޮޓަރިއަށް ދެމީހަކު ވަދެ ބިރު ދައްކައި އެމީހާގެ ފޯނާ ފައިސާ ފޭރުނު މައްސަލަ އަންގާރަ ދުވަހުގެ ވަގުތެއްގައި ރިޕޯޓުކޮށްފައިވާ ކަމަށެވެ.
މިމައްސަލައާ ގުޅިގެން މިހާތަނަށް މީހަކު ހައްޔަރުކޮށްފައިނުވާ ކަމަށް ފުލުހުން ބުނެއެވެ.
ސޯޝަލް މީޑިއާގައި އާއްމުވެފައިވާ ފޮޓޯތަކުން ފެންނަ ގޮތުގައި އުމުރުން ދުވަސްވީ މީހާގެ އަތަށް ވަނީ އަނިޔާވެފައެވެ. އެމީހާގެ އަތް ނޫފާގަނެފައިވާއިރު، ހޮސްޕިޓަލުން ފަރުވާ ހޯދާފައިވާ ކަމަށް މައުލޫމާތު ލިބެއެވެ.
މިމައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
މާލެސިޓީގައި ފޭރުމާއި ވައްކަމުގެ މައްސަލަތައް ދަނީ އިތުރުވަމުންނެވެ. އަދި ކުއްޔަށް ދޫކުރާ ކޮޓަރިތަކުގައި އުޅޭ އިތުރަށް ސަމާލުވެ އުޅުމަށް މީގެ ކުރިން ފުލުހުން އިލްތިމާސްކޮށްފައިވެއެވެ.
