ހުޅުމާލެ ފޭސް-1ގައި ޒުވާނަކަށް ހަމަލާދީ ހިންގި މާރާމާރީއާ ގުޅިގެން ހައްޔަރުކުރި 23 އަހަރުގެ މީހާ ތަހުގީގު ނިމެންދެން ބަންދު ކުރަން ކޯޓުން އަމުރުކޮށްފިއެވެ.

ޖުލައި 8 ވަނަ ދުވަހު ގްރޫޕަކުން ހަމަލާ ދީފައި ވަނީ މ. ރަތްމަންދޫއަށް ނިސްބަތްވާ އުމުރުން 26 އަހަރުގެ އަހުމަދު ނަޒީފަށެވެ. ހުޅުމާލޭގައި ހުންނަ އެސްޓީއޯ ފިހާރައެއްގައި މަސައްކަތް ކުރާ ނަޒީފަށް ހަމަލާދީފައިވަނީ ކީއްވެގެން ކަމެއް ނޭނގެއެވެ. މައުލޫމާތު ލިބިފައިވާ ގޮތުގައި ނަޒީފަށް ހަމަލާދީފައިވަނީ ސައިކަލު ޕާކު ކުރިތަނުންނެވެ. މި މަރާމާރީގައި ނަޒީފުގެ ބޯ ފަޅާލާފައިވާއިރު، އޭނާއަށް ވަނީ ބޮޑެތި އަނިޔާތަކެއް ލިބިފައެވެ.

މިމައްސަލައާ ގުޅިގެން ފުލުހުން ބުނީ ހުޅުމާލެ ފޭސް-1 ގައި ޖުލައި 8 ވަނަ ދުވަހު ހިންގި މާރާމާރީއާ ގުޅިގެން ޖުލައި 18 ވީ ބުރާސްފަތި ދުވަހު 22 އަހަރުގެ ފިރިހެނަކު ހައްޔަރުކޮށްފައިވާ ކަމަށާއި، އޭނާ ހައްޔަރުކޮށްފައިވަނީ ކޯޓު އަމުރެއްގެ ދަށުން ކަމަށެވެ. އޭނާގެ ބަންދަށް 30 ދުވަސް ވަނީ ޖަހާފައެވެ.

މީގެ އިތުރުން 23 ޖުލައި ވީ އަންގާރަ ދުވަހުގެ ރޭގެ ވަގުތެއްގައި 23 އަހަރުގެ ދިވެހި ފިރިހެނެއް ވަނީ ހައްޔަރުކޮށްފައެވެ. ފުލުހުން ބުނީ އެމީހާގެ ބަންދާމެދު ގޮތެއް ނިންމުމަށް ހުޅުމާލެ މެޖިސްޓްރޭޓް ކޯޓަށް ހާޒިރު ކުރުމުން ތަހުގީގު ނިމެންދެން ބަންދުގައި ބެހެއްޓުމަށް އަމަރުކޮށްފައިވާ ކަމަށެވެ.

ފުލުހުން ދަނީ އިތުރަށް މިމައްސަލަ ތަހުގީގު ކުރަމުންނެވެ.