23 ސްކޫލެއްގެ ގްރޭޑް 10 ނިންމާ ހުރިހާ ދަރިވަރުންނަށް މަތީ ސާނަވީގެ ފުރުސަތު ދެނީ
23 ޖުލައި 2024 | އަންގާރަ 14:25މަތީ ފެންވަރުގެ ޔުނިވަރސިޓީތަކަށް ވަދެވޭ މިންވަރަށް 2500 އެއްހާ ދަރިވަރުން ފާސްނުކުރެވޭ
ސީއެޗްއެސްއީގެ އިނާމު ދިނުމުގެ ހަފްލާގައި އެޑިއުކޭޝަން މިނިސްޓަރު ދަރިވަރަކަށް ޓްރޮފީއެއް ހަވާލުކޮށްދެއްވަނީ
މުޅިން އަލަށް 23 ސްކޫލެއްގެ ގްރޭޑް 10 ގައި ކިޔަވަމުންދާ ހުރިހާ ދަރިވަރުންނަށް އޭލެވެލް އަށް ކިޔެވެމުގެ ފުރުސަތު ފަހިކޮށްދިނުމަށް ނިންމާފައިވާ ކަމަށް މިނިސްޓަރ ޑރ. އިސްމާއިލް ޝަފީއު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ސެންޓަރ ފޮރ ހަޔަރ ސެކަންޑަރީ އެޑިޔުކޭޝަން (ސީ.އެޗް.އެސް.އީ) ގެ އަހަރީ އިނާމު ދިނުމުގެ ޖަލްސާ ޝަރަފުވެރިކޮށްދެއްވާ، ދެއްކެވި ވާހަކަފުޅުގައެވެ. މި ޖަލްސާގެ ހާއްސަ މެހެމާނެއްގެ ގޮތުގައި ރައީސުލްޖުމްހުރިއްޔާގެ އަނބިކަނބަލުން މެޑަމް ސާޖިދާ މުހައްމަދު ބައިވެރިވެ ވަޑައިގެންނެވިއެވެ.
ޖަލްސާގައި ވާހަކަފުޅު ދައްކަވަމުން މިނިސްޓަރ ވިދާޅުވީ ކޮންމެ އަހަރަކުވެސް އެތަށް ހާސް ދަރިވަރުން ތައުލީމު ހާސިލުކުރާއިރު، މަތީ ފެންވަރުގެ ޔުނިވަރސިޓީތަކަށް ވަދެވޭ މިންވަރަށް 2500 އެއްހާ ދަރިވަރުން ފާސްނުކުރެވޭ ކަމަށެވެ. މިކަން ބަދަލުކޮށް، ވީހާވެސް ގިނަ ދަރިވަރުންނަށް މަތީ ތައުލީމުގެ ފުރުސަތު ފަހިކޮށް، އޭލެވެލް ނިންމާ ދަރިވަރުންގެ އަދަދު އިތުރުކުރުމަކީ ސަރުކާރުން އެންމެ ބޮޑު އިސްކަމެއް ދޭނެ އެއް ކަމުގެ ގޮތުގައި މިނިސްޓަރ ފާހަގަކުރެއްވިއެވެ.
މީގެ އިތުރުން މިނިސްޓަރ ވިދާޅުވި ގޮތުގައި މަތީ ސާނަވީ ތައުލީމު ހާސިލުކުރަން ބޭނުންވާ ދަރިވަރުންނަށް ދިމާވާ އެންމެ ބޮޑު ގޮންޖެހުމަކީ އޭލެވެލް އަށް ވަދެވޭ ކްރައިޓީރިއާގައިވާ 5 މާއްދާ ނުވަތަ 3 މާއްދާއިން ފާސްނުވުމެވެ.
އަންނަ ސެޕްޓެންބަރު މަހުގެތެރޭގައި އަލަށް އޭލެވެލް އަށް ކިޔަވައިދޭން މިފަށާ 23 ސްކޫލުން ލިބޭ ނަތީޖާގެ މައްޗަށް ބުރަވެ، އިތުރު ސްކޫލުތަކުގައި މި ޕްރޮޖެކްޓް ފުޅާކުރައްވާނެ ކަމަށް މިނިސްޓަރ ވިދާޅުވިއެވެ.
