ރާއްޖެއިން ބޭރުގައި ކިޔެވުމަކީ ކުރިއެރުުމާ ހޯދުމުގެ ދަތުރެއް: މިނިސްޓަރު މާރިޔާ
ކޮންމެ ގައުމަކުން ކިޔެވިކަމުގައި ވިޔަސް ކޮންމެ ކުއްޖަކީ ވެސް ފުރިހަމަ މުސްލިމުން ކަމުގައި ތިބި ދިވެހިންކަން ހަނދާން ކުރަންޖެހޭ
ރައީސް ދެއްވާ ޚާއްސަ ސްކޮލަރޝިޕާއި، ހައި އެޗީވަރސް ސްކޮލަރޝިޕްގެ ލިޔުން ހަވާލުކޮށްދެއްވުމުގެ ރަސްމިއްޔާތުގައި މިނިސްޓަރު މާރިޔާ ވާހަކަފުޅު ދައްކަވަނީ
ރާއްޖެއިން ބޭރުގައި ކިޔެވުމަކީ ހަމައެކަނި އިލްމު ހޯދުމަށް ލިބޭ ފުރުސަތަކަށްވުރެ މާ ބޮޑު ކަމެއް ކަމަށާއި، ގައުމަށް އެންމެ ފައިދާ ހުރި ދާއިރާތަކުން ކުރިއަށްދާ ޖެހޭ ކަމަށް ހަޔަރ އެޑިޔުކޭޝަން މިނިސްޓަރު ޑރ. މަރިޔަމް މާރިޔާ ވިދާޅުވެއްޖެއެވެ.
ރައީސް ދެއްވާ ޚާއްސަ ސްކޮލަރޝިޕާއި، ހައި އެޗީވަރސް ސްކޮލަރޝިޕް ލިބުނު ފަރާތްތަކަށް އެކަމުގެ ލިޔުން ހަވާލުކުރުމަށް ބުރާސްފަތި ދުވަހުގެ ރޭ ބޭއްވި ރަސްމިއްޔާތުގައި މިނިސްޓަރު މާރިޔާ ވިދާޅުވީ ދިރިއުޅޭ ދުނިޔެ މިދަނީ ބަދަލުވަމުން ކަމަށާޢި، ވަރަށް ބާރު ދުވެލީގައި ކުރިއަރައި ތަރައްގީވަމުން ކަމަށެވެ. ބަވަނަވުމުގެ ސަބަބުން ދިރިއުޅޭ ވެށީގެ ވެލިއުސް ފަނޑުވަމުންދާތަން ފެންނަ ކަމަށް މިނިސްޓަރު މާރިޔާ ވިދާޅުވިއެވެ. އަދި ވިދާޅުވީ ކޮންމެ ގައުމަކުން ކިޔެވިކަމުގައި ވިޔަސް ކޮންމެ ކުއްޖަކީ ވެސް ފުރިހަމަ މުސްލިމުން ކަމުގައި ތިބި ދިވެހިންކަން ހަނދާން ކުރަންޖެހޭ ކަމަށެވެ.
ރާއްޖެއިން ބޭރުގައި ކިޔެވުމަކީ ހަމައެކަނި އިލްމު ހޯދުމަށް ލިބޭ ފުރުސަތަކަށްވުރެ މާ ބޮޑު ކަމެއްކަން ފާހަގަކުރައްވައި މިނިސްޓަރު މާރިޔާ ވިދާޅުވީ އެއީ ކުރިއެރުމާއި ހޯދުމުގެ ދަތުރެއް ކަމަށާއި، އެއީ ތަފާތު ސަގާފަތްތަކުގެ ތެރެއަށް ވަދެ އުނގެނުމަށް އޮތް މަގެއް ކަމަށެވެ. ތަފާތު ދާއިރާތަކުން ކުރިއަރާފައިވާ މުފައްކިރުންނާ ގުޅިގެން ކަންކަން ދަސްކުރުމަށް އޮތް ސުޕަރ ހައިވޭއެއް ކަމަށް މިނިސްޓަރު މާރިޔާ ވިދާޅުވިއެވެ.
މީގެ އިތުރުން މިނިސްޓަރު މާރިޔާ ވިދާޅުވީ ކިޔެވުމަށް ބޭރު ގައުމެއްގައި އުޅޭއިރު ތިޔަ ކޮންމެ ކުއްޖަކީ ވެސް މިގައުމުގެ އެމްބަސަޑަރެއްކަން ދަނެގެން އުޅެންޖެހޭ ކަމަށާއި، ތަމްސީލު ކުރުމުގައި ރަނގަޅު ނަމޫނާއަކަށް ވުމަކީ ވަރަށް މުހިންމު ކަމެއް ކަމަށެވެ.
މިނިސްޓަރު މާރިޔާ ވިދާޅުވީ، ތައުލީމީ ދާއިރާއަށް ވަރަށް ބޮޑަށް އިސްކަން ދޭ ކަމަށާއި، ކުރިމަގުގައި ފެންނާނީ ފުދުންތެރި އިލްމީ ގާބިލް ޖީލެއް ކަމަށެވެ. އަދި ގައުމުގެ ތަރައްގީއާއި ކުރިއެރުމުގައި ކިޔަވައިގެން ނިކުންނަށް ކުދިންގެ ދައުރު ވަރަށް މުހިންމު ކަމަށް މިނިސްޓަރު މާރިޔާ ވިދާޅުވިއެވެ.
