ދެ އިންތިހާބު އެއްކޮށްލުމުން ހަރަދު ކުޑަވެ ވޯޓުލާ މީހުންގެ ނިސްބަތް އިތުރުވާނެ - ފުއާދު

ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމުން ހަރަދު ކުޑަވެ ވޯޓުލާ މީހުންގެ ނިސްބަތް އިތުރުވާނެ ކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިނިވަން މުވައްސަސާތަކުގެ ކޮމިޓީގައި ވާހަކަދައްކަވަމުން ފުއާދު ވިދާޅުވީ ދެ އިންތިހާބު އެއްކޮށްފިނަމަ 130 މިލިއަން ރުފިޔާ ސަލާމަތްކުރެވޭނެ ކަމަށެވެ.

ފުއާދު ވިދާޅުވީ ދެ އިންތިހާބު އެއްކޮށްލުމުން ކޮމިޝަންގެ މަސައްކަތަށް އުނދަގޫވުމަށްވުރެ ބޮޑަށް ވާނީ ފަސޭހަ ކަމަށެވެ. އެގޮތުން ރައްޔިތުންނަށްވެސް އެކަމުގެ ފަސޭހަތައް ވާނެކަމަށާއި، އިލެކްޝަންސް ކޮމިޝަނަށް ވެސް އެކަމުގެ ފަސޭހަތައް ވާނެކަމަށެވެ.

ފުއާދު ވިދާޅުވީ އުނދަގުލަކަށް ވާނަމަ ވާނީ ވޯޓުލާ ދުވަހު ދެ ކަރުދާސްކޮޅު ދިނުން ކަމަށެވެ. ނަމަވެސް ލޯކަލް ކައުންސިލް އިންތިހާބުގައި ކޮމިޝަނުން އެ ތަޖުރިބާކޮށްފައިވާ ކަމަށާއި، އެކަމަކީ އުނދަގޫ ކަމަކަށް ނުވާ ކަމަށެވެ.

ފުއާދު ވިދާޅުވީ ރައްޔިތުންގެ މަޖިލީހުގެ އިންތިހާބުގައި ވޯޓުލަނީ 80 އިންސައްތަ މީހުންކަމަށާއި، ރިޔާސީ އިންތިހާބުގައި ވޯޓުލަނީ 90 އިންސައްތަ މީހުންކަމުގައިވާނަމަ، ދެ އިންތިހާބު އެއްކޮށްލުމުން ވޯޓުލާ މީހުންގެ ނިސްބަތް 90 އިންސައްތައަށްވުރެ މައްޗަށް ދިއުން އެކަށީގެންވާ ކަމަށެވެ.

ހަރަދު ކުޑަކުރުމުގެ ގޮތުން ބޮޑު ދެ އިންތިހާބު އެއްކޮށްލުމުގެ ވާހަކަ ދެކެވެމުންދާ އިރު، ނިމިގެން ދިޔަ ރައްޔިތުންގެ މަޖިލީހުގެ އިންތިހާބަށް 120 މިލިއަން ރުފިޔާ ހަރަދުވިއެވެ. އަދި ރިޔާސީ އިންތިހާބަށް 180 މިލިއަން ރުފިޔާ ވަނީ ހަރަދުވެފައެވެ.