ގާޒާގެ ހަނގުރާމަ މިހާރުން މިހާރަށް ހުއްޓާލުމަށް އދ ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް ގޮވާލައްވައިފިއެވެ.
ހޯމަ ދުވަހު ގުޓަރޭސް ސޯޝަލް މީޑިއާ ގައި ކުރެއްވި ޕޯސްޓެއްގައި ވިދާޅުވީ، ހައްދެއް ނެތި ގާޒާ އަށް ދީފައިވާ ހަމަލާ ތަކާއި އެއާއެކު ގާޒާ ސުންނާފަތި ވެގެން ދިޔަ ދިޔުމާއި، ގެއްލިގެން ދިޔަހާ ފުރާނަ އަކީ ވިސްނުމަށްވެސް ނުގެނެވޭ ފަދަ ކަމެއް ކަމެއް ކަމަށާއި އެއީ މާފު ކުރެވޭނެ ކަމެއް ނޫން ކަމަށެވެ.
އެއްވެސް ތަނެއް ރައްކާތެރި އެއް ނޫން، ކޮންމެ ތަނަކީ ވެސް މީހުން މަރާ ތަނެއްއދ ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް
ހޯމަ ދުވަހު އެހެން މެސެއްޖެއްގައި ޚާން ޔޫނިސްގެ އަލް-މަވާސީ ރެފިއުޖީ ކޭމްޕަށް އިޒްރޭލް ސިފައިން ހޮނިހިރު ދުވަހު ދިން ހަމަލާވެސް އދ. ގެ ސެކްރެޓަރީ ޖެނެރަލް ވަނީ ކުށްވެރި ކުރައްވާފައެވެ.
ރައްކާތެރި ސަރަހައްދެއްގެ ގޮތުގައި އިޒްރޭލު ސިފައިން ކަނޑައަޅާފައިވާ ގެދޮރު ގެއްލިފައިވާ މީހުންނަށް ޚާއްސަ ކޮށްފައިވާ އަލް-މަވާސީ ސަރަހައްދަށް ދިން ހަމަލާ އިން ގާޒާ ސްޓްރިޕް ގައި ރައްކާތެރި އެއްވެސް ތަނެއް ނެތްކަން ހާމަ ވެއްޖެ ކަމަށް ސެކްރެޓަރީ ޖެނެރަލް ވިދާޅުވިއެވެ.
ގާޒާގެ ހެލްތް މިނިސްޓްރީން ބުނެފައިވާ ގޮތުގައި އަލް-މަވާސީ ރެފިއުޖީ ކޭމްޕަށް ދިން ހަމަލާގައި މަދުވެގެން 90 ފަލަސްތީން މީހުން މަރުވިއެވެ. އަދި 300 ށް ވުރެ ގިނަ މީހުން ވަނީ ޒަޚަމްވެފައެވެ. މަރުވި މީހުންނާ ޒަޚަމްވި މީހުންގެ ތެރޭގައި ގިނަ އަދަދެއްގެ ކުޑަކުދިންނާ އަންހެނުން ހިމެނޭ ކަމަށްވެސް ގާޒާގެ ހެލްތް މިނިސްޓްރީން ބުނެފައިވެއެވެ.
