ޕޯޗުގަލް ގައި އޮތީ ތަފާތު ހިތްވަރެއް: މާޓިނޭޒް

ޕޯޗުގަލް ގައި މިހާރު އޮތީ ތަފާތު ހިތްވަރެއް ކަމަށް އެ ޓީމުގެ ކޯޗު ރޮބާޓޯ މާޓިނޭޒް ބުނެފި އެވެ.

އޭނާ މިހެން ބުނީ، ޖަރުމަނުގައި ކުރިއަށްދާ ޔުރޯ ފުޓުބޯޅަ މުބާރާތުގެ ގަދަ 16 ވަނަ ބުރުގައި ޕޯޗުގަލް އިން ސްލޮވޭނިއާއާ ދެކޮޅަށް ކުޅުނު މެޗަށްފަހު ވާހަކަ ދައްކަމުންނެވެ. ސްލޮވޭނިއާއާ ދެކޮޅަށް ކުޅުނު މެޗު ޕޯޗުގަލް އިން ކާމިޔާބު ކުރީ ޕެނަލްޓީ ގައި ކުރި ހޯދައިގެންނެވެ.

މާޓިނޭޒް ބުނީ މެޗުގައި ފެނުނީ ސްލޮވޭނިއާ އިން އެމީހުން ރާވާފައި އޮތް ގޮތަށް ކުޅުނު މަންޒަރު ކަމަށެވެ. އެގޮތުން އެޓޭކު ކުރުމުގެ ބަދަލުގައި، ސްލޮވޭކިއާ އިން ދިޔައީ ޑިފެންސް އަށް ވިސްނައިގެން ކުޅެމުން ކަމަށް ވެސް އޭނާ ބުންޏެވެ. އޭގެ ބަދަލުގައި ޕޯޗުގަލް އިން ކުޅެމުން ދިޔައީ އެޓޭކަށް ޖެހިގެން ކަމަށާއި، މެޗުގައި ލަނޑު ޖަހާނެ ފުރުސަތުތަކެއް ލިބުނު ކަމަށް ވެސް އޭނާ ބުންޏެވެ.

ޕޯޗުގަލްގެ ހުރިހާ ކުޅުންތެރިންގެ ފަރާތުން ވެސް ފެނުނީ ވަރަށް ބޮޑަށް ތައްޔާރުވެގެން ތިބެ ކުޅެމުން ދިޔަ މަންޒަރު ކަމަށާއި، ކޮންމެ ކުޅުންތެރިޔަކު ވެސް ބުރަ މަސައްކަތް ކުރިކަން އޭނާ ފާހަގަ ކުރި އެވެ. މެޗުގެ ނަންބަރުތަކަށް ބެލި ނަމަވެސް، ޕޯޗުގަލް އޮތީ ކުރީގައި ކަމަށާއި، ކުޅުންތެރިން ކުރި މަސައްކަތަށް ތައުރީފު ހައްގު ކަމަށް ވެސް އޭނާ ވަނީ ބުނެފަ އެވެ.

މީގެ އިތުރުން މާޓިނޭޒް ބުނީ މުބާރާތުގެ ކުއާޓާ ފައިނަލްގައި ޕޯޗުގަލް އިން ފްރާންސްއާ ދެކޮޅަށް ނިކުންނަން ޖެހޭއިރު، އެ މެޗަށް ކުޅުންތެރިން ތިބޭނީ ފުރިހަމަ އަށް ތައްޔާރަށް ކަމަށް ވެސް އޭނާ ބުންޏެވެ. އެގޮތުން ޖިސްމާނީ ގޮތުންނާއި، ނަފްސާނީ ގޮތުން ވެސް، ޕޯޗުގަލްގެ ކުޅުންތެރިން ތިބޭނީ އެންމެ ފުރިހަމަ އަށް ތައްޔާރަށް ކަމަށް އޭނާ ބުންޏެވެ.

މާޓިނޭޒް ބުނީ، މިވަގުތަށް ބަލާއިރު ޕޯޗުގަލް ގައި އޮތީ ވަރަށް ތަފާތު ރޫޙެއް އަދި ހިތްވަރެއް ކަމަށެވެ. އެހެންކަމުން ފްރާންސް މެޗަށް ނިކުންނައިރު، ޓީމު އޮތް ޙާލަތާމެދު އޭނާ ކަންބޮޑުވާން ޖެހޭ އެއްވެސް ކަމެއް އޮތް ކަމަށް ނުދެކޭ ކަމަށް މާޓިނޭޒް ބުންޏެވެ. ފްރާންސް މެޗަށް ނިކުންނާނީ، ރަނގަޅު ކުރަން ހުރި ކަންކަން ރަނގަޅުކޮށް، އިތުރު ހިތްވަރަކާއެކު ކަމަށް ވެސް މާޓިނޭޒް ބުންޏެވެ.

މުބާރާތުގެ ކުއާޓާ ފައިނަލްގައި ޕޯޗުގަލް އިން ފްރާންސްއާ ދެކޮޅަށް ނިކުންނާނީ ހުކުރު ދުވަހުގެ ރޭ ދަންވަރު، ރާއްޖެ ގަޑިން 12 ޖަހާއިރު އެވެ.