ޖަމީލް ނިޔާވެފައި މައްސަލައިގައި ޝައްކުއުފެދޭ ކަންކަން ހުރުމުން އެކަން ބަލައިދިނުމަށް ޑިމޮކްރެޓްސްގެ ފަރާތުން އެޗްއާރުސީއެމްއަށް ހުށަހަޅައިފި
ޖަމީލުގެ ހަށިގަނޑުގައި ނޫފައިގެންފައިވާ ތަންތަނާއި އަނިޔާގެ ނިޝާންތައް ކަމަށް ބެލެވޭ ގިނަ ތަންތަން ހުރި
މާފުށި ޖަލުގައި ޝަރީއަތް ނިމެންދެން ބަންދުކޮށްފައި ހުއްޓާ ނިޔާވި ޖަމީލުގެ މައްސަލަ ދަނީ ތަހުގީގުކުރަމުން
ދައުލަތުގެ ބެލުމުގެ ދަށުގައި ބަންދުކޮށްފައި ހުރި ށ. ފުނަދޫ، ޒަމާނީވިލާ, މުހައްމަދު ޖަމީލް ނިޔާވެފައި އޮއްވާ ފެނުނު މައްސަލައިގައި ކަންބޮޑުވުމާއި ޝައްކުއުފެދޭ ކަންކަން ހުރުމުން އެ މައްސަލަ ތަހުގީގު ކޮށްދިނުން އެދި ދަ ޑިމޮކްރެޓްސްގެ ފަރާތުން ހިއުމަން ރައިޓްސް ކޮމިޝަނަށް ހުށަހަޅައިފިއެވެ.
ދަ ޑިމޮކްރެޓްސްގެ ފަރާތުން ހިއުމަން ރައިޓްސް ކޮމިޝަނަށް ހުށަހަޅާފައިވާ މައްސަލައިގައި ބުނެފައިވަނީ ޝަރީއަތް ނިމެންދެން ދައުލަތުގެ ބެލުމުގެ ދަށުގައި މާފުށީ ޖަލުގައި ބަންދުކޮށްފައި ހުއްޓާ 28 ޖޫންގައި ނިޔާވެފައި އޮއްވާ ފެނުނު މުހައްމަދު ޖަމީލުގެ ހަށިގަނޑުގައި ނޫފައިގެންފައިވާ ތަންތަނާއި އަނިޔާގެ ނިޝާންތައް ކަމަށް ބެލެވޭ ގިނަ ތަންތަން ހުރި ކަމަށެވެ.
އަދި ޖަމީލް ނިޔާވީ ޖަލު ބަލަހައްޓާ މޯލްޑިވްސް ކަރެކްޝަނަލް ސަރވިސްގެ އޮފިސަރުން އަނިޔާކޮށް، ފަރުވާދިނުމުގައި އިހުމާލުވުމުގެ ސަބަބުންކަމަށް ގިނަ ބަޔަކު ކަންބޮޑުވުން ފާޅުކުރަމުންދާ އިރު، މި މަރުގައި ޝައްކު އުފެދޭ ކަންކަން ހުރުމާއެކު އެ މަރުގެ މައްސަލައިގައި އެއްވެސް ފަރާތެއްގެ އިހުމާލުވޭތޯ ބަލައިދިނުމަށް ވަނީ އެދިފައެވެ.
މީގެ އިތުރުން ޖަލު ބަލަހައްޓާ އޮފިސަރުންގެ ފަރާތުން އަނިޔާކޮށްފައިވޭތޯއާއި އަދި ބޭސްފަރުވާ ހިމެނޭހެން ގާނޫނުތަކާއި ގަވާއިދުތަކުން ކަށަވަރުކޮށްދޭ އެންމެހައި ހައްގުތައް ބަންދުކޮށްފައި ހުރި މުއްދަތުގައި ޖަމީލަށް ފުރިހަމައަށް ލިބިދެވިފައިވޭތޯ ބަލާ މި މައްސަލަ ތަހުގީގުކޮށްދިނުމަށް ވަނީ އެދިފައެވެ.
މި މައްސަލައިގައި ކަރެކްޝަންސް އިން ބުނީ މުޙައްމަދު ޖަމީލް ގޮޅިން ބޭރަށް ނުނިކުމެ، ހަރަކާތް ނުކޮތް ގިނައިރު އޮތްކަން ފާހަގަ ކުރެވިގެން މާފުށީ ޖަލުގެ މެޑިކަލް ސެންޓަރަށް ގެންގޮސް ސީޕީއާރްދީފައިވާ ކަަމަށެވެ. އަދި އެއްވެސް ބަދަލެއް ނައުމާ ގުޅިގެން، 12:13 ހާއިރު މާފުށީ ސިއްޙީ މަރުކަޒަށް ގެންގޮސް އޭނާއަށް ފަރުވާ ދީފައިވާ ކަމަށާއި 12:45 ގައި ޑޮކްޓަރު ވަނީ މުޙައްމަދު ޖަމީލްގެ ހިތް ހުއްޓިގެން ނިޔާވިކަމަށް ކަނޑައަޅާފަ ކަމަށް ކަރެކްޝަންސް އިން ބުނެއެވެ.
ޖަމީލް ނިޔާވެފައިވާއިރު އޭނާ އަށް އަނިޔާކުރިކަމަށް ބައެއް ގައިދީންނާއި ހަވާލާދީ އާއްމުން ދަނީ ތުހުމަތުކުރަމުންނެވެ. ނަމަވެސް މިކަން ފުލުހުންނާއި ކަރެކްޝަނުން ދޮގުކުރެއެވެ.
