ކުރީ ސަރުކާރޭ ގޮވޭކަށް ނެތް!
27 ޖޫން 2024 | ބުރާސްފަތި 15:37ސަރުކާރަށް ހަތް މަސް ދުވަަހަށްވުރެ ގިނަ ދުވަސްވީއިރު، ޚަރަދު ކުޑަ ކުރަން މިހާތަނަށް ފިޔަވަޅައެއް އަޅާފައެއް ނެތެވެ.
ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އާއި މާލީ ވަޒީރު ޑޮކްޓަރު މުޙައްމަދު ޝަފީޤު
ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވެރިކަމަށް ވަޑައިގެންނެވީ، ޚަރަދު ކުޑަ ސަރުކާރެއް އެކުލަވާލުމަށެވެ. ކުރީ ސަރުކާރުގައި ބޭކާރު ކަންކަމަށް ފައިސާ ޚަރަދު ކުރާ ކަމުގެ ވާހަކަ އިންތިހާ އަށް ދައްކަވަމުންނެވެ. ޤައުމު ބަނގުރޫޓުވުމާ ދިމާލަށް މިސްރާބު ޖަހާފައިވާކަން ރައްޔިތުންނަށް ދައްކައިގެންނެވެ. އެ ވާހަކަ އިން ރައްޔިތުންގެ ހިތަށް ބިރުވެރިކަން ވައްދަމުން ވިދާޅުވީ، އެ ޙާލަތު ތިމަން މަނިކުފާނު ބަދަލު ކުރައްވާނެ ކަމަށެވެ.
ރައީސް މުޢިއްޒުގެ ސަރުކާރަށް ހަތް މަސް ދުވަހަށް ވުރެ ގިނަ ދުވަސް ވެގެން ދިޔައިރު، ދައުލަތުގެ ޚަރަދު އިންތިހާ އަށް މައްޗަށް ގޮސްފި އެވެ. ދައުލަތް ހިންގުމުގެ ޚަރަދު އިންތިހާ އަށް ބޮޑުވެފައިވާކަން ފެންނަނީ މާލީ ވުޒާރާގެ ތަފާސް ހިސާބުތަކުންނެވެ. އިންތިހާ އަށް ސިޔާސީ މަޤާމުތަކަށް މީހުން ގިނަވެފައިވާއިރު، ދައުލަތުން ބޮޑު ހޭދައެއް ކުރަން ޖެހޭނީ އެމީހުންނަށް މުސާރަ ދިނުމަށެވެ. ރައީސުލްޖުމްހޫރިއްޔާގެ ދަތުރުފުޅުތަކަށް ވެސް ދައުލަތުން ކުރަމުން އަންނަ ޚަރަދު ވަކި ކުޑައެއް ނޫނެވެ.
އެހެން ނަމަވެސް، ރަށް ރަށުގެ ތަރައްޤީ އަށް ދައުލަތުން ކުރ ހޭދަ ބޮޑު ތަނުން ދަށްވެއްޖެ އެވެ. ކުރީގެ ސަރުކާރުން ރަށް ރަށުގައި ފަށާފައިވާ ތަރައްޤީގެ މަޝްރޫއުތައް ވެސް މިހާރު މަޑު ޖެހިއްޖެ އެވެ. މި ސަރުކާރުގެ ވައުދެއް ވެސް ރަށް ރަށުގައި ކުރިއަކަށް ނުދެ އެވެ. ޖުމުލަ ގޮތެއްގައި ރައްޔިތަކަށް ފެން ހިފޭނެ ކަމެއް މިހާތަނަށް އައި އިރު، މި ސަރުކާރަށް ކުރެވިފައެއް ނެތެވެ.
އަނެއްކޮޅުން، ޤައުމުގެ އެންމެ މުހިންމު އެއް ސިނާއަތް ކަމަށްވާ، މަސްވެރި ސިނާއަތުގައި މަސައްކަތް ކުރާ ދިވެހި ރައްޔިތުން ބަނޑަށް ޖެހެނީ އެވެ. އެމީހުން ދަރަނިވެރި ވަނީ އެވެ. ރެޔާއި ދުވާލު، ދޭހާ އަތްވެއްގަޔާއި، ވެހޭހާ ވާރޭއެއްގައި ލޯބޯ ފިއްސައިގެން އެ މީހުން ބާނާ މަސް ކޮޅަށް ފައިސާ ނުދެވޭތާ ދެ މަސް ދުވަސްވެ، މިހާރު ތިން މަސް ދުވަސް ވާން ކައިރިވެއްޖެ އެވެ. އަތް މަތި ދަތިވެ، ދަރަނިވެރިވާ ހިސާބަށް ދިޔުމުން، މަސްވެރިން އިޙުތިޖާޖަށް ވެސް ނިކުމެއްޖެ އެވެ. ރާއްޖެ އެކި ކަންކޮޅުތަކުގައި މަސްވެރިންގެ ސުލްހަވެރި އިހުތިޖާޖުތައް ކުރިއަށް އެބަ ދެއެވެ.
މިހުރިހާ ކަމަކަށް ސަރުކާރުން ދައްކަނީ އެންމެ ބަހަނާ އެކެވެ. ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އާއި، މާލީ ވަޒީރު ޑޮކްޓަރު މުޙައްމަދު ޝަފީގު އަދި މަސްވެރިކަމާ ބެހޭ ވަޒީރު އަޙުމަދު ޝިޔާމްގެ ދުލުން ވެސް ބޭރުވަނީ އެންމެ ދެ ލަފްޒެވެ. އެއީ، "ކުރީ ސަރުކާރު!" އެވެ. ކުރީ ސަރުކާރުގެ ފަހަތަކުން، މި ސަރުކާރަށް ނެއްޓޭކަށް ނޭންގުނެވެ. ކޮންމެ މައްސަލައެއްގައި ވެސް ދައްކަވަނީ އެ ވާހަކަ އެވެ. ކުރީ ސަރުކާރާ ހެދި މާލީ ޙާލަތު ދަށްވެފައިވާ ވާހަކަ އެވެ. މީހަކު އަޅެ އަޖައިބު ނުވާންވީ ކީއްވެ ހެއްޔެވެ؟
ސަރުކާރުގެ މި ވާހަކަތައް ދެކޮޅު ނުޖެހޭ ސަބަބުތަކެއް އެބަ ހުއްޓެވެ. ދައުލަތުގައި ފައިސާ ނެތް ކަމަށާއި، މާލީ ޙާލަތު ދަށްވެފައިވާ ކަމަށް ސަރުކާރުން ބުނާއިރު، ސަރުކާރުގެ ޢަމަލުތަކުން ފެންނަނީ އެހެން މަންޒަރެކެވެ. ސަރުކާރުން ބޭނުންވާހާ ކަމެއްގައި އިންތިހާ އަށް އެބަ ޚަރަދު ކުރެ އެވެ. އެކަންކަން ކުރުމަށް ފައިސާ ވެސް ހުރެ އެވެ. ކުޑަ މިސާލެއް ދަންނަވާނަމަ، ރައީސުލްޖުމްހޫރިއްޔާގެ ދަތުުރުފުޅުތަކަށް ބޮލަކަށް 72،000 (ހަތް ދިހަ ދެ ހާސް) ޚަރަދު ކުރަންވީމަ ވެސް، ދައުލަތުގައި ފައިސާ ހުރެ އެވެ. ދަތުރުފުޅުތަކުގެ ޖުމުލަ ޚަރަދު މިލިއަނަކަށް ވުރެ ކުޑަ ތަން ކޮޅެއް ވެސް ކުޑަ ނުވެ އެވެ.
ސަރުކާރަށް ހަތް މަސް ދުވަަހަށްވުރެ ގިނަ ދުވަސްވީއިރު، ޚަރަދު ކުޑަ ކުރަން މިހާތަނަށް ފިޔަވަޅައެއް އަޅާފައެއް ނެތެވެ. އޭގެ ބަދަލުގައި ފެންނަނީ ސަރުކާރުން އިންތިހާ އަށް ބޭކާރު ޚަރަދު ކުރަމުންދާ މަންޒަރެވެ. ދައުލަތަށް އިތުރަށް އެންމެ ފައިސާ ފޮއްޗެއް ވެސް ހޯދާނެ ގޮތެއް އަދި މަގެއް ސަރުކާރަށް ނޭންގެ އެވެ. ސަރުކާރުގެ ޚަރަދު ބޮޑުވެ، މާލީ ގޮތުން ދަތިކަމާ ކުރިމަތިލާން ޖެހުމުން، ގޮވަނީ "ކުރީ ސަރުކާރު" އެވެ. ދަންނަވަންތޯ އެވެ! މިހެން ކިޔޭކަށް ނެތެވެ! ދެން ވެސް އަވަހަށް ކުރަންވީ ކަމަކީ، މަތި ބަރު މި ސަރުކާރުގެ، މަތި ލުއި ކުރުމެވެ. ޚަރަދުތައް ކުޑަ ކުރުމެވެ.
ރައްޔިތުން ވެރިކަން ހަވާލުކުރީ، "ކުރީ ސަރުކާރު" މިހެން ގޮވާލަ ގޮވާލާ ތިބޭކަށް ނޫނެވެ. ރައްޔިތުންގެ ޓެކްސް ފައިސާ އިން މުސާރަ ނަންގަވައިގެން ތިއްބަވައި، އެހެން ވިދާޅުވުމަކީ ވެސް ހަޤީގަތުގައި ވަރަށް ލަދުވެތި ކަމެކެވެ. އޭގެ ބަދަލުގައި ސަރުކާރުން އަވަސް ފިޔަވަޅުތަކެއް އަޅަން ޖެހެ އެވެ. ރައްޔިތަކަށް ލިބެން އޮތް އެއްޗެއް ކުޑަ ކުރުން ނުވަތަ މަދު ކުރުމަކީ ވެސް މޮޅު ގޮތެއް ނޫނެވެ. ސަރުކާރުގެ ޚަރަދުތައް ކުޑަ ކުރާށެވެ. ސަރުކާރުގެ ޚަރަދުތައް މަތިވެ، އެކަން ފޫބެއްދުމުގެ ތަޅުދަނޑިއަކަށް ރައްޔިތުން ހެއްދެވީމަ ވެސް ކަމަކު ނުދެ އެވެ.
