ފުނައްޑޫ އޮޕަރޭޝަނަށް ގެނެވޭނެ ސީދާ ތާރީޚެއް ސަރުކާރަށް ނުދެވުނު، ސަބަބެއްގެ ގޮތުގައި ދެއްކީ "ބަޖެޓު" އޮތް ގޮތް

ތަކުރާރުކޮށް ސުވާލުކުރުމުން ވެސް ތ. ފުނައްޑޫގެ މަސް ފެސިލިޓީ އޮޕަރޭޝަނަށް ގެނެވޭނެ ތާރީޚެއް ނުދެވި، ސަބަބަކީ އެކަމަށް ބަޖެޓު ކަނޑައެޅިފައިނެތުން ކަމަށް ސަރުކާރުން ބުނެފިއެވެ.

މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަހުމަދު ޝިޔާމާ ސުވާލުކުރެއްވުމަށް އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާއަށް ހާޒިރުކުރައްވާފައިވަނީ، ތިމަރަފުށީ ދާއިރާގެ މެންބަރު އަބްދުﷲ ރިޔާޒް ހުށަހަޅުއްވާފައިވާ ސުވާލަށް ޖަވާބު ހޯދުމަށެވެ. މިދިޔަ އަހަރުގެ ޑިސެމްބަރު މަހުގެ 16 ވަނަ ދުވަހު ފޮނުއްވި އެ ސުވާލަކީ މަސްވެރިކަމުގެ ސިނާއަތަށް ދޫކޮށްފައިވާ ތ.ފުނައްޑޫއިން މަސް ގަންނަން ފަށާނެ ތާރީޚަކީ ކޮބައިތޯ ސާފުކުރުމަށް ކުރައްވާފައިވާ ސުވާލެކެވެ.

އެ ސުވާލަށް ޖަވާބު ދެއްވަމުން މިނިސްޓަރު ޝިޔާމް ވިދާޅުވީ ބަޖެޓުގައި އެ މަސައްކަތް ޕީއެސްއައިޕީ މަޝްރޫއެއްގެ ގޮތުގައި ހިމެނުމަށް މަސައްކަތްކުރައްވާފައިވާ ކަމަށެވެ. ނަމަވެސް ޕީއެސްއައިޕީގައި މި ސަރުކާރުން ހިމަނަން މަސައްކަތް ކުރި ގިނަ މަޝްރޫޢުތައް ނުހިމެނުނު ކަމަށާއި އެ މަސައްކަތް ކާމިޔާބުނުވުމުން ބައެއް ބޭންކުތަކާ އެކު މަޝްވަރާކުރައްވައިގެން އެ މަޝްރޫޢުތައް ކުރިއަށް ގެންދެވޭނެ ގޮތެއް ހޯއްދެވުމަށް މަސައްކަތްކުރައްވަމުން ގެންދަވާ ކަަމަށް ޝިޔާމް ވިދާޅުވިއެވެ. އަދި ޕީއެސްއައިޕީގައި ހިމަނަން މަސައްކަތްކުރައްވާ ނުހިމެނުނު މަޝްރޫޢުތައް ކުރިއަަށް ގެންދިއުމަށްޓަކައި، ފުނައްޑޫ ހިމެނޭހެން އައިޑީބީ އާ އެކު މަޝްވަރާތަކެއް ކުރެއްވި ކަމަށާއި މިހާރުވެސް އެފަދަ މަޝްވަރާތަކެއް ކުރެވެމުންދާ ކަަމަށް މިނިސްޓަރު ޝިޔާމް ވިދާޅުވިއެވެ.

ޝިޔާމް މިހެން ވިދާޅުވުމުން ހުޅުދޫ ދާއިރާގެ މެންބަރު އިލްޔާސް ލަބީބު ވަނީ މިނިސްޓަރުގެ އެ ވާހަކަތަކަކީ އިތުރުފުޅެއްކަމަށް ތުހުމަތުކުރައްވާފައެވެ. އެގޮތުން ފުށިދިއްގަރު ފަޅުގެ މަޝްރޫޢު ފިޔަވައި ހުރިހާ މަޝްރޫޢު އެއް ސަރުކާރުން އެދުނު ގޮތަށް ބަޖެޓުގައި ހިމަނާދީފައިވާނެ ކަމަށް އޭނާ ވިދާޅުވިއެވެ. އެހެންކަމުން އެއީ މިނިސްޓަރު ޝިޔާމް ކަނޑައެޅިގެން ހެއްދެވި އިތުރުފުޅެއްކަމަށް އިލްޔާސް ވިދާޅުވިއެވެ.

ނަމަވެސް މި ކަމާ ގުޅޭގޮތުން އިތުރަށް ވާހަކަދައްކަވަމުން މިނިސްޓަރު ޝިޔާމް ވިދާޅުވީ އަވަސް ގޮތެއްގައި ފުނައްޑޫ އޮޕަރޭޝަނަށް ގެނައުމަށް މަަސައްކަތް ކުރައްވަމުން ގެންދަވާކަމަށެވެ. އެގޮތުން މި އަހަރު މަސްވެރިކަމުގެ ސިނާއަތުގައި އޮޕަރޭޝަނަށް ގެނެވެން ހުރި ޕްރައިވެޓް ސެކްޓަރުގެ ތަންތަނާއި ސަރުކާރު ހިއްސާވާ ކުންފުނިތަކުގައި ހުރި ފެސިލިޓީތައް އޮޕަރޭޝަނަށް ގެނައުމަށް މަސައްކަތް ކުރައްވަމުން ގެންދަވާ ކަމަށް ޝިޔާމް ވިދާޅުވިއެވެ. އަދި މިކަމުގައި ޕްރައިވެޓް ސެކްޓަރަށް އޮތް އެންމެ ބޮޑު ގޮންޖެހުމަކީ އަގުގެ ގޮންޖެހުން ކަމަށް ވެސް މިނިސްޓަރު ވިދާޅުވިއެވެ.

މިވަގުތު ހުރި އަގަކީ ވެސް ބޮޑު އަގެއް ކަމަށާއި މީގެ ކުރިން ހުރީ އަދި މާ ބޮޑު އަގެއް ކަމަށް ވެސް މިނިސްޓަރު ވިދާޅުވިއެވެ. އަދި އެކަމުގެ ސަބަބުން ޕްރައިވެޓް ސެކްޓަރުގެ ބައެއް ކުންފުނިތަކުން އޮޕަރޭޝަން ހުއްޓާލާފައިވާ ކަމަށާއި އޭގެ ތެރެއިން ބައެއް ކުންފުނިތައް އޮޕަރޭޝަނަށް ގެނައުމަށް އެ ފަރާތްތަކުން މަަސައްކަތް ކުރަމުންދާ ކަމަށް މިނިސްޓަރު ވިދާޅުވިއެވެ.

ފުނައްޑޫ އަކީ ތ.އަތޮޅުގެ މަސްވެރިންނަށް ވަރަށް ބޮޑު ލުޔެއް ލިބޭނެ އޮޕަރޭޝަނެއް ކަމަށް ފާހަގަކުރައްވާ މިނިސްޓަރު ވިދާޅުވީ މީގެ ކުރިން 2022 ވަނަ އަހަރު ވެސް އެ މަސައްކަތް ބަޖެޓުކުރަން މަސައްކަތްކޮށްފައިވާ ކަމަށެވެ. އެގޮތުން ކުރީގެ ސަރުކާރުން ވެސް އެތަނަށް ބޭނުންވާ ފައިސާ އެހެން ގޮތްގޮތުން ހޯދުމަށް މަސައްކަތް ކުރި ކަމަށާއި އެކަން ކާމިޔާބުވެފައި ނުވާކަމަށް އޭނާ ވިދާޅުވިއެވެ. ފުނައްޑޫގެ ބަނދަރު ހަދަން 157.3 މިލިއަނަށް ވުރެ ގިނަ ރުފިޔާ ޚަރަދު ވާނެ ކަމަށް އެ މަސައްކަތް ފެށުމަށްޓަކައި ކުރީ ސަރުކާރުން ހެދި އެސެސްމެންޓުން ދައްކާ ކަމަށް ޝިޔާމް ވިދާޅުވިއެވެ. އަދި މިނިސްޓަރުކަމާ ހަވާލުވެވަޑައިގަތުމަށް ފަހު އެތަނުގެ ހާލަތު ބެލުމަށް ބަޔަކު ފޮނުއްވާ ބެލި ބެލުމުން އެއަށް ވުރެ ޚަރަދު ކުޑަކޮށް، ފަސޭހަކޮށް ފުނައްޑޫ އޮޕަރޭޝަނަށް ގެނެވޭނެ ކަމަށް ޤަބޫލުކުރެވުނު ކަމަށް މިނިސްޓަރު ވިދާޅުވިއެވެ. އެހެންކަމުން މިހާރު އެ ވުޒާރާ އިން އިންޓަރނަލީ އެ މަސައްކަތް ކުރަމުންދާ ކަމަށާއި ފުނައްޑޫ އޮޕަރޭޝަނަށް ގެނައުމުގެ ފީސިބިލިޓީ ސްޓަޑީސް ހަދަމުންދާ ކަމަށް މިނިސްޓަރު ޝިޔާމް ވިދާޅުވިއެވެ.

ފިޝަރީޒް މިނިސްޓަރު އިތުރަށް ވިދާޅުވީ އުންމީދަކީ ރާއްޖޭގެ ސަރަހައްދުތަކުގައި ސްޓޯރޭޖް ކެޕޭސިޓިގެ މައްސަލަ އަށް އަަވަސް ހައްލެއް ގެނެސްދިނުން ކަަމަށެވެ. ފުނައްޑޫ އަކީ އެ ހައްލު އެންމެ ރަނގަޅަށް ގެނެވޭނެ އެއް ތަން ކަމަށް ވެސް މިނިސްޓަރު ވިދާޅުވިއެވެ.