އެންމެ މޮޅު އަންހެން ކުޅުންތެރިއަކަށް ބޮންމާޓީ

ފީފާއިން ހޮވާ ދުނިޔޭގެ އެންމެ މޮޅު އަންހެން ފުޓްބޯޅަ ކުޅުންތެރިއަކަށް ސްޕޭނާއި ބާސެލޯނާގެ މިޑްފީލްޑަރު އައިޓާނާ ބޮންމާޓީ ހޮވައިފި އެވެ.

އައިޓާނާ އަކީ މިދިޔަ އަހަރުގެ ފީފާ ވޯލްޑްކަޕުގެ މޮޅު ކުޅުންތެރިޔާ އެވެ. އަދި ގައުމީ ޓީމާއި ބާސެލޯނާގައި ދެއްކި މޮޅު ކުޅުމާއެކު އޭނާ ވަނީ ބެލޮންޑީއޯ އެވޯޑް ވެސް ހާސިލްކޮށްފަ އެވެ.

އުމުރުން އެންމެ 25 އަހަރުގައި ދުނިޔޭގެ ޗެމްޕިއަންކަމާއި ވޯލްޑްކަޕުގެ މޮޅު ކުޅުންތެރިޔާގެ މަގާމު ލިބުމުން ބޮންމާޓީ ހުރީ އުފަލުންނެވެ. ހަގީގަތުގައި ބާސެލޯނާގެ ކެޕްޓަން އަދި ފާއިތުވެދިޔަ ދެ އަހަރުގެ ދުނިޔޭގެ މޮޅު ކުޅުންތެރިޔާ އެލެކްސިއާ ޕުޓެޔާސް އަށް ލިބުނު ސީރިއަސް އަނިޔާއިން އޭނާ މުޅިން ފިޓްނުވާތީވެ، ވޯލްޑްކަޕަށް ދިޔައިރު ސްޕޭނުގެ މައި ތަނބަކަށްވީ ބޮންމާޓީ އެވެ. މުޅި ޓީމު އަތުރާފައި އޮތީ އިސްމީހަކީ އޭނާ ކަމަށް ބަލައި ބޮންމާޓީ ވަށައިގެންނެވެ. މުބާރާތުގެ ހުރިހާ މެޗެއް ކުޅެ އޭނާ މުހިންމު ތިން ގޯލު ޖަހައިދިނެވެ. އަދި ބާސެލޯނާއާއެކު ސްޕެނިޝް ލީގާއި ޗެމްޕިއަންސް ލީގު ހޯދިއިރު ޗެމްޕިއަންސް ލީގުގެ މޮޅު ކުޅުންތެރިއަކީ ވެސް އޭނާ އެވެ.

މެންޗެސްޓާ ސިޓީ އަށް ކޯޗުކޮށްދޭ ބާސެލޯނާގެ ކުރީގެ ކޯޗު ޕެޕް ގާޑިއޯލާ ސިފަކުރާ ގޮތުގައި ބޮންމާޓީ އަކީ ބާސެލޯނާ އާއި ސްޕޭންގެ ކުރީގެ މިޑްފީލްޑަރު އަންދްރޭސް އިނިއެސްޓާ ފަދަ އަންހެން ކުޅުންތެރިޔާ އެވެ.

ބޮންމާޓީއާ އެންމެ ގާތުން ވާދަކުރީ ސްޕޭނުގެ ޖިނީ ހާމޯސޯ އާއި އިނގިރޭސި ކުޅުންތެރިޔާ ލިންޑާ ސެއިސާޑޯ އެވެ. އޭނާ އަކީ މި އެވޯޑް ހާސިލްކުރި ސްޕޭނާއި ބާސެލޯނާގެ ވެސް ދެ ވަނަ ކުޅުންތެރިޔާ އެވެ.

ފީފާ ބެސްޓް އެވޯޑަކީ ގައުމީ ޓީމުތަކުގެ ކެޕްޓަނުންނާއި ކޯޗުންނާއި ހޮވާލެވޭ ނޫސްވެރިން ވޯޓުލައިގެން ހޮވާ މަގާމެކެވެ.