ރާއްޖެއާއި އިންޑިޔާގެ މުޅި މައްސަލައިގެ ފުރިހަމަ ޒިންމާ ނަންގަވަންޖެހޭނީ ރައީސް މުއިއްޒު: ފައްޔާޒު
10 ޖެނުއަރީ 2024 | ބުދަ 02:36ގައުމު ދެކެ ލޯބިވާ ނަމަ އެއްވެސް ގައުމަކާ ތާކުން ތާކުން ނުޖެހޭ ގޮތަށް ޒާތީ ނުވާނެ ކަމަށް ފައްޔާޒު ވިދާޅުވި
އެމްޑީޕީގެ ޗެއާޕާސަން އަދި ކުރީގެ ސަރުކާރުގެ އިގްތިސާދާ ބެހޭ ވަޒީރު ފައްޔާޒު އިސްމައީލް
މިއަދު އިންޑިޔާގެ ފަރާތުން ރާއްޖެއަށް ކުރިމަތިކުރުވަމުންދާ ނުތަނަސްވަސްކަމާއި، ރާއްޖެ ބޮއިކޮޓް ކުރުމަށް އެދި ގޮވަމުންދާ މުޅި މައްސަލައިގެ ފުރިހަމަ ޒިންމާ ނަންގަވަންޖެހިވަޑައިގަންނަވާނީ ރައީސް ޑރ. މުޙައްމަދު މުއިއްޒު ކަމަށް، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޗެއާޕާސަން އަދި ކުރީ ސަރުކާރުގެ އިކޮނޮމިކް މިނިސްޓަރު ފައްޔާޒު އިސްމައީލް ވިދާޅުވެއްޖެއެވެ.
މި ސަރުކާރަކީ "އިންޑިޔާ އައުޓް" އަށް ގޮވަމުން އައި ސަރުކާރެއްގެ ގޮތުގައި ފާހަގަ ކުރައްވަމުން، ރާއްޖެ ޓީވީގެ ފަލަ ސުރުޚީ ޕްރޮގްރާމުގައި ފައްޔާޒު ވިދާޅުވީ، މި ސަރުކާރުގެ ތިން ނައިބު ވަޒީރަކާއި، ވެރިކަން ކުރާ ޕާޓީގެ ސެނެޓު މެންބަރުންގެ އިތުރުން، ސަރުކާރުގެ ކުންފުނިތަކުގެ ވެރިން އިންޑިޔާއާ މެދު އެހާ ބޮޑު ނުތަނަވަސްކަމެއްގެ ޚިޔާލު އެކްސްގައި ފާޅުކުރާނީ، އެ މާހައުލު ރައީސް މުއިއްޒު އުފައްދަވާފައި އޮތުމުން ކަމަށެވެ.
އެގޮތުން ސަރުކާރެއްގެ އިސް މަގާމެއް ފުރާ އެންމެ މީހަކު އެމީހެއްގެ ޚިޔާލު ފާޅުކުރުމާއި، ގިނަ ބަޔަކު އެއްފަދަ ޚިޔާލެއް ފާޅުކުރެވޭނީ އެފަދަ "ޖައްސާލުމުގެ" މާހައުލެއް ސަރުކާރުގެ ތެރޭގައި އުފެދިފައި އޮތުމުން ކަމަށް ފައްޔާޒް ވިދާޅުވިއެވެ. އަދި އެފަދަ މާހައުލެއް އުފެދޭނީ ރައީސަކަށް ހުންނަވާ ބޭފުޅަކު ވެސް އެފަދަ ނިންމެވުމެއްގެ މަތީގައި ހުންނެވުމުން ކަމަށް ފައްޔާޒް ވިދާޅުވިއެވެ.
ފައްޔާޒު އިތުރަށް ވިދާޅުވީ، އިންޑިޔާ ސިފައިންގެ މައްސަލައިގެ ކަންބޮޑުވުން ހުރި ކަމަށްވާނަމަވެސް، އެކަމަށް ހައްލުގެނައުމުގެ ތެރެއިން ދެގައުމުގެ ގުޅުމަށް ބުރޫއަރާ ފަދަ މާހައުލެއް އުފެދުމަކީ ރައީސް މުއިއްޒު އެކަމަށް ޖާގަ ދެއްވުމުގެ ސަބަބުން ހިނގާނެ ކަމެއް ކަމަށެވެ. އަދި އެއީ ސަރުކާރުގެ ޕޮލިސީ ކަމުގައި ފައްޔާޒު ތުހުމަތުކުރެއްވިއެވެ.
ފައްޔާޒު ވިދާޅުވީ ސަރުކާރުގެ ތިން ނައިބު ވަޒީރުން އިންޑިޔާގެ ބޮޑުވަޒީރަށް ފުރައްސާރަކޮށް މަލާމާތް ރައްދުކުރި މައްސަލަ ފެންމަތިވިތާ އެތައް އިރެއް ފަހުން ސަރުކާރުން އެކަމަށް އިޝާރަތްކޮށް ބަޔާނެއް ނެރުނުއިރު، އެކަމަކީ އެ މައްސަލަ ފެންމަތިވިހާ އަވަހަކަށް އެކަމަށް ބަޔާންތައް ނެރެ، ސަރުކާރުން މައާފަށް ވެސް އެދެން ޖެހޭނެ ކަމެއް ކަމަށެވެ.
އަދި ވިދާޅުވީ ސަރުކާރުން ގައުމު ދެކެ ލޯބިވާނަމަ، "ތާކުން ތާކުން ނުޖެހޭ ގޮތަށް" އެއްވެސް ގައުމަކާ ޖެހިގަތުމަކީ ކުރާނެ ކަމެއް ނޫން ކަމަށެވެ.
އިންޑިޔާގެ ރައްޔިތުންގެ ރާއްޖެ ބޮއިކަޓްކޮށް، އިންޑިޔާގެ ލަކްޝަދީބުގެ ރަށްތަކުގެ ފަތުރުވެރިކަން ޕްރޮމޯޓުކުރަން ފެށީ، އިންޑިޔާގެ ބޮޑުވަޒީރު ނަރެންދުރަ މޯދީ އެ ރަށްތަކަށް ކުރެއްވި ދަތުރުފުޅެއްގެ ތެރޭގައި، އެ ރަށްތަކުގެ ރީތިކަން ޕްރޮމޯޓުކުރުމާ ގުޅިގެން އިންޑިޔާގެ ސޯޝަލް މީޑިޔާ އެކްޓިވިސްޓުން ރާއްޖެ އަކީ "ޕްރޯ ޗައިނާ" ގައުމެއް ކަމުގައި ބުނެ، ރާއްޖެ ބޮއިކޮޓް ކުރުމަށް ގޮވާލަން ފަށުމާއެކު އެވެ.
އެއާއެކު، ސަރުކާރުގެ އެކި މަގާމުތަކުގައި ތިއްބެވި ބޭފުޅުން ރާއްޖެ ދިފާއުކުރެއްވުމުގެ މަސައްކަތް ފެށިއިރު، ބައެއް ނައިބު ވަޒީރުން ފެށީ އިންޑިޔާގެ މީހުންނާ ޒާތީ ގޮތުން ދިމާކުރުމުގެ މަސައްކަތެވެ.
އެގޮތުން އިންޑިޔާގެ ބޮޑުވަޒީރަށް ސިދާ އަމާޒުކުރައްވާ، އިސްރާއީލުގެ ޕަޕެޓު، ޖޯކު އަދި އިންޑިޔާ އަކީ ހަޑި ގައުމެއްގެ ގޮތުގައި ސިފަކުރައްވާ ވާހަކަތަކެއް ދެއްކެވުމާ ގުޅިގެން ތިން ނައިބު ވަޒީރަކު ސަރުކާރުން ވަނީ ސަސްޕެންޑްކޮށްފައެވެ.
ސަސްޕެންޑުކުރި ވަޒީރުންނަކީ ޒުވާނުންނާ ގުޅޭ ވުޒާރާގެ ނައިބު ވަޒީރުން ކަމުގައިވާ މަރިޔަމް ޝިއުނާ އާއި މަލްޝާ ޝަރީފް އަދި މަހުޒޫމް މާޖިދު އެވެ.
