ހިމަބިއްސާއި ރުބެއްލާ އެތެރެވިޔަ ނުދިނުމަށް ބިދޭސީން އެމްއާރް ވެކްސިންގެ ދެ ޑޯޒު ޖަހާފައިވާކަން ކަށަވަރުކުރަންޖެހޭ: ޑރ.ފައިސަލް
މީސްލްސް ވެކްސިން ދިނުމުގެ ގައުމީ ކެމްޕޭނެއް 1 ޑިސެންބަރު 2023 ގައި ވަނީ ފަށާފައި
ކުޑަކުދިންގެ ޚާއްސަ ޑރ. އަހުމަދު ފައިސަލް
ހިމަބިއްސާއި ރުބެއްލާ އެތެރެވިޔަ ނުދިނުމަށް ރާއްޖެއަށް އެތެރެވާ ބިދޭސީ މަސައްކަތްތެރިން އެމްއާރް ވެކްސިންގެ ދެ ޑޯޒު ޖަހާފައިވާކަން ކަށަވަރުކުރަންޖެހޭ ކަމަށް ކުޑަކުދިންގެ ޚާއްސަ ޑރ. އަހުމަދު ފައިސަލް ވިދާޅުވެއްޖެއެވެ.
ޑރ.ފައިސަލް ވިދާޅުވީ ރާއްޖެއިން ނައްތާލެވިފައިވާ ހިމަބިއްސާއި ރުބެއްލާ ރާއްޖެއަށް އެތެރެވިޔަ ނުދިނުމަށް ކުރަންޖެހޭ މައިގަނޑު އެއް މަސައްކަތަކީ ރާއްޖެއަށް ގެންނަ ބިދޭސީ މަސައްކަތްތެރިން އެމްއާރް ވެކްސިންގެ ދެ ޑޯޒް ހަމަކުރިކަން ކަށަވަރުކުރުން ކަމަށެވެ. އަދި މިކަމަށްވެސް ސަރުކާރުން މަސައްކަތް ފަށަންޖެހޭ ކަމަށް ޑރ.ފައިސަލް ވިދާޅުވިއެވެ.
ޑރ.ފައިސަލް މިހެން ވިދާޅުވެފައިމިވަނީ ރާއްޖެއިން ނައްތާލެވިފައިވާ ފައިލޭރިއާ ފެނިފައިވާ ދަނޑިވަޅެއްގައެވެ. ބިދޭސީ މަސައްކަތްތެރިން އެމްއާރް ވެކްސިންގެ ދެ ޑޯޒު ޖަހާފައިވާކަން ކަށަވަރު ކުރުމަށް އެޗްޕީއޭއިން ކުރަމުންދާ މަސައްކަތުގެ މައުލޫމާތު ހޯދުމަށް ކުރި މަސައްކަތް ވަނީ ކާމިޔާބުވާ ގޮތް ނުވެފައެވެ.
2023 ވަނަ އަހަރުގެ މެދުތެރޭގައި ރާއްޖެއިން ހިމަބިހި (މީސްލްސް) ފެނުމާއި ގުޅިގެން އިތުރަށް މިބަލި ފަތުރުނަ ނުދިނުމަށް ކުރެވެމުންދާ މުހިއްމު މަސައްކަތުގެ ތެރެއިން މީސްލްސް ވެކްސިން ދިނުމުގެ ގައުމީ ކެމްޕޭނެއް 1 ޑިސެންބަރު 2023 ގައި ވަނީ ފަށާފައެވެ.
މީގެ އިތުރުން 10 ސެޕްޓެންބަރު 2020 ގައި ރާއްޖެއަކީ ރުބެއްލާ މުޅިން ނައްތާލެވިފައިވާ ގައުމެއްކަމުގައި ކަނޑައަޅައި ދުނިޔޭގެ ސިއްހަތު ޖަމިއްޔާ (ޑަބްލިވްއެޗްއޯ)އިން ސެޓްފިކެޓް ހަވާލުކޮށްފައެވެ.
ރުބެއްލާއަކީ ގައިން ގަޔަށް އަރާ ބައްޔެކެވެ. ރުބެއްލާގެ އަލާމާތްތަކުގެ ތެރޭގައި ހުން އައުމާއި ގައިގައި ކުދި ބިހިތަކެއް ނެގުން ހިމެނެއެވެ. ފުރަތަމަ ބިހިތައް ނަގަން ފަށަނީ މޫނާއި ކަރުދަށުގައެވެ. އެއަށްފަހު މުޅި ގަޔަށް ބިހިތައް ފެތުރިގެންދެއެވެ. ރުބެއްލާއަކީ އާންމުކޮށް ތުއްތު ކުދިންނަށް ޖެހޭ ބައްޔެކެވެ. މާބަނޑުއިރު މައިމީހާގެ ގައިން ބަނޑުގައި އޮންނަ ދަރިފުޅަށް ވެސް އަރައެވެ.
ރާއްޖެއިން ނައްތާލެވިފައިވާ ބައެއް ބަލިތައް ރާއްޖެއިން ފެނުމަކީ ކަންބޮޑުވުމެއް ސިއްހީ ދާއިރާގައި މަސައްކަތް ކުރާ ބައެއް ޑޮކްޓަރުން ވިދާޅުވެފައިވެއެވެ. ނައްތާލެވިފައިވާ ފައިލޭރިއާ ފެނިފައިވަނީ ޑިސެންބަރު މަހުގެ 1 އަދި 2 ވަނަ ދުވަހު ކުޅުދުއްފުށީގައި ހިންގި ބިދޭސީ މަސައްކަތްތެރިންގެ ސްކްރީނިން ކޭމްޕުގެ ތެރޭގައި ޓެސްޓް ކުރެވުނު ބައެއް ބިދޭސީންގެ ފަރާތުން ކަމަށްވާތީ އިތުރަށް މިފަދަ ސްކްރީނިންގ ކޭމްޕްތައް ކުރިއަށް ގެންދަންޖެހޭ ކަމަށް ސިއްހީ ޚިދުމަތްތެރިން ވިދާޅުވެފައިވެއެވެ. ޓެސްޓު ކުރުމުގެ މަސައްކަތް އިތުރަށްފުޅާކޮށް، މާލެ ސަރަހައްދުގައި ވެސް ޓެސްޓު ކުރުމުގެ މަސައްކަތް އެޗްޕީއޭއިން ވަނީ ކުރިއަށް ގެންގޮސްފައެވެ. މިހާތަނަށް ބެލިބެލުން 32 މީހުން ބައްޔަށް ވަނީ ޕޮޒިޓިވްވެފައެވެ.
މި ކަމާއި ގުޅިގެން ހެލްތު މިނިސްޓަރު ޑރ. އަބްދުﷲ ހަލީލު ވިދާޅުވީ ފައިލޭރިއާއަށް ދިވެއްސަކު ޕޮޒިޓިވް ނުވާ ކަމަށާއި، ބަލި ފެތުރިދާނެތީ ކަންބޮޑުވާކަށް ނުޖެހޭ ކަމަށެވެ. މި ބައްޔަކީ ރާއްޖޭގައި ފެތުރޭ ބައްޔެއް ނޫން ކަމަށާއި، މިއީ ރާއްޖެއިން ބޭރުން އައިސްފައިވާ ބައްޔެއް ކަމަށް މިނިސްޓަރު ވިދާޅުވިއެވެ.
ނަމަވެސް ބިދޭސީން ރާއްޖެ އެތެރެވާއިރު ހަދަންޖެހޭ ވޯކްޕަރމިޓް މެޑިކަލްގައި ފައިލޭރިއާ ހިމަނާފައިނުވެއެވެ. އަދި ލިސްޓަށް ފައިލޭރިއާ އިތުރުކުރުމަށްޓަކައި މަޝްވަރާކުރަމުންދާ ކަމަށް އެޗްޕީއޭއިން ބުނެފައިވެއެވެ.
