ކުއްޖާއަކީ ކަނާތް ތެރިއެއްތޯ ނުވަތަ ވައަތްތެރިއެއްތޯ އެނގެނީ އުމުރުން 12 މަސްވުމުން ކަމަށާއި، އޭގެ ކުރިން ވަކިއަތެއް ޚިޔާރުކުރާނަމަ އިތުރަށް ބަލަންޖެހޭ ކަމަށް އައިޖީއެމްއެޗްގެ ކުޑަކުދިންގެ ޚާއްސަ ޑރ. އަހުމަދު ފައިސަލް ވިދާޅުވެއްޖެއެވެ.
ބެލެނިވެރިންނަށް ޚާއްސަ އިލްތިމާސެއްކުރައްވައި ޑރ.ފައިސަލް ވިދާޅުވީ ދެއަހަރުވާއިރު، އަތާއިފައިގެ ހަރަކާތްތަކުން ކުރާކަންތައްތައް ކުރުމުގައި ލަސްތަކެއް ހުރިކަން ގިނަފަހަރު އެނގޭ ކަމަށެވެ.
ނަމަވެސް ދަސްކުރުމާއި މުއާމަލާތްކުރުމުގައި އުނދަގޫތަކެއް ހުރިކަން ނޭނގިދާނެ ކަމަށް ޑރ. ފައިސަލް ވިދާޅުވިއެވެ. އަދި ވިދާޅުވީ ކުއްޖާގެ 5 އަހަރުވަންދެން ވެސް އުމުރާ އެއްވަރަށް ކަންތައްތައް ކުރެވޭތޯ ބަލަންވާނެ ކަމަށެވެ.
މީގެ އިތުރުން ޑރ.ފައިސަލް ވިދާޅުވީ ކުއްޖަކީ ކަނާތް ތެރިއެއްތޯ ނުވަތަ ވައަތްތެރިއެއްތޯ އެނގެނީ އުމުރުން 12 މަސްވުމުން ކަމަށެވެ. އޭގެ ކުރިން ވަކިއަތެއް ޚިޔާރުކުރާނަމަ ގޯހެއް އުޅޭތޯ އިތުރަށް ބަލަންވާނެ ކަމަށާއި، ޑޮކްޓަރަށް ދައްކަންޖެހޭ ކަމަށް ޑރ.ފައިސަލް ވިދާޅުވިއެވެ.
ސިއްހީ މާހިރުން ވިދާޅުވާ ގޮތުގައި ކުޑަކުދިން އެކުދިންގެ އުމުރާ އެއްވަރަށް ހަރަކާތްތެރިވެ އުޅެންޖެހެއެވެ. ނަމަވެސް ބައެއް ހާލަތްތަކުގައި ބެލެނިވެރިން އެކަންކަމަށް ސަމާލުކަން ނުދޭކަން ފާހަގަކުރެވޭ ކަމަށެވެ.
