ކްރިމިނަލް ކޯޓުގައި ކުރިއަށްދާ މަފާޒުގެ މައްސަލައިގެ ބަންދު ދަމަހައްޓައިފި
މަގުބޫލު ސަބަބެއް ނެތި އާންމުތަނެއްގައި ތޫނު އެއްޗެއް ގެންގުޅުމުގެ ކުށުގެ ދައުވާ މަފާޒުގެ މައްޗަށް އުފުލާފައިވޭ
ނަދީމްގެ މަރުގެ މައްސަލައިގައި ތުހުމަތުވާ މީހުންގެ ތެރޭގައި މަފާޒް (ކ)
މަގުބޫލު ސަބަބެއް ނެތި އާންމުތަނެއްގައި ތޫނު އެއްޗެއް ގެންގުޅުމުގެ ކުށުގެ ދައުވާ އުފުލާފައިވާ މުހައްމަދު މަފާޒް ހުސައިންގެ ބަންދު ދަމަހައްޓައިފިއެވެ.
އޭނާގެ ބަންދުގެ މުއްދަތު ކްރިމިނަލް ކޯޓުން ދަމަހައްޓާފައިވާއިރު މަފާޒަކީ ހއ. ތަކަންދޫ އިބްރާހީމީ ހިޔާ، ނަދީމު ޢަބްދުއްރަޙީމް އަށް ތޫނު އެއްޗަކުން ހަމަލާދީ މަރާލި މައްސަލައިގައި ކުށް ސާބިތުނުވާ ކަމަށް ނިންމާ ދޫކޮށްލާފައިވާ ފަރާތެކެވެ. އަދި މި މައްސަަލައިގެ އިސްތިއުނާފު މިހާރުވެސް ހައިކޯޓުގައި ކުރިއަށް އެބަދެއެވެ.
މަފާޒް ގެ ކުށުގެ ރިކޯޑަށް ބަލާއިރު، މަފާޒަކީ އެކި މައްސަލަތަކުގައި ހައްޔަރު ކުރެވިފައިވާ ފަރާތެކެވެ. ހައިކޯޓުގައި މިހާރު ކުރިއަށްދިޔަ ބަންދާ ގުޅޭ އަޑުއެހުމުގައި ދައުލަތުން ބުނެފައިވަނީ ދާދި ފަހުން އޭނާ ހައްޔަރުކުރި މައްސަލަތަކުގެ ތެރެއިން 3 މައްސަލައެއްގައި، ބަންދުގެ މުއްދަތުވެސް ޖަހާފައިވާކަމަށެވެ. އޭގެ ތެރެއިން 2 މައްސަލައެއްގައި ދައުލަތުން ދައުވާވެސް ކޮށްފައިވާކަމަށް ދައުލަތުގެ ވަކީލު ވިދާޅުވިއެވެ.
ހައިކޯޓުގެ ބަންދާ ގުޅޭ އަޑުއެހުމުގައި ދައުލަތުގެ ވަކީލު ވިދާޅުވީ، އޭނާގެ މައްޗަށް ކޮށްފައިވާ 2 ދައުވާގެ ތެރޭގައި، ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ ދައުވާއެއްވެސް ހިމެނޭކަމަށެވެ. ނަދީމަކީ މަފާޒް ސީދާގޮތުން ދިން ހަމަލާއެއްގެ ސަބަބުން އަނިޔާވެ ދުނިޔެ ދޫކޮށްފައިވާ ފަރާތެއްކަން، ދައުލަތުން ހުށަހަޅާފައިވާ ހެކިންގެ ހެކިތަކުންވެސް އެނގޭކަމަށް ދައުލަތުގެ ވަކީލު ވިދާޅުވިއެވެ.
ވީއިރު، މަފާޒު ބަންދުގައި ބަހައްޓަންޖެހޭ ސަބަބުތައް ހުރިކަމަށާއި، އޭނާގެ ފަރާތުން މުުޖުތަމައަށް ފެންނަން އޮތް ނުރައްކާ ފާޅުކަން ބޮޑު ގޮތެއްގައި ފެންނަން އޮތްކަމަށް ވަކީލު ވިދާޅުވިއެވެ.
އެހެންނަމަވެސް މަފާޒް މިހާރުވެސް ހުރީ ކަރެކްޝަންސްގެ ބެލުމުގެ ދަށުގައި ބަންދުގައި ކަމަށާއި، އޭނާއަކީ މުޖުތަމައުގައި ހުރި މީހަކަށް ނުފޫޒެއް ފޯރުވުމުގެ ބާރެއް އޮތް މީހެއް ނޫންކަމަށްވެސް އޭނާގެ ވަކީލު ވިދާޅުވެފައިވެއެވެ.
ނަދީމުގެ މަރުގެ މައްސަލައިގައި ހައިކޯޓުގައި ކުރިއަށްދިޔަ ބަންދާ ގުޅޭ އަޑުއެހުމުގައި، މަފާޒަކީ މިހާރުވެސް ކްރިމިނަލް ކޯޓުގައި ކުރިއަށްދާ މި މައްސަލައަކާ ގުޅިގެން ޝަރީއަތް ނިމެންދެން ބަންދުކޮށްފައިވާ ފަރާތެއް ކަމަށްވާތީ، ހައިކޯޓުގެ މައްސަލަ ނިމެންދެން އޭނާ ބަންދުކުރަންޖެހޭ ފަދަ ސަބަބެއް ނެތްކަމަށެވެ. ނަމަވެސް އެ މައްސަލައިގައި މަފާޒު ދޫކޮށްލާ ހާލަތެއްގައި ދައުލަތުން އޭނާ ބަންދުކޮށްދިނުން އެދި ހުށަހެޅުމަށް ހުރަހެއް ނެތްކަން ފަނޑިޔާރުން ފާހަގަ ކުރެއްވިއެވެ.
