ފުލުހުންނާ ކުރިމަތިލި ކަމަށް ބުނެ ފުލުހުން ތަހުގީގް ކުރުމުން ސުވާލު އުފެދޭ: އިބޫ
އަޅުގަނޑު ބަންދު ކުރިއަސް މިކަމެއް ނުހުއްޓޭނެ
ފުލުސް އޮފީހުން ނުކުމެވަޑައިގެން އިބޫ ނޫސްވެރިންނަށް މައުލޫމާތު ދެއްވަނީ
ގުޅިފައިވާ ޕާޓީތަކަށް ނިސްބަތްވާ ރައްޔިތުންގެ މަޖިލީހުގެ މެންބަރުން ހާޒިރުކޮށް ތަހުގީގް ކުރަނީ ފުލުހުންނާ ކުރިމަތިލި ކަމަށް ބުނެ ކަމަށާއި އެތަހުގީގް ފުލުހުން ކުރުމުން އިންސާފްވެރިވެދާނެ ކަމާ މެދު ސުވާލު އުފެދޭ ކަމަށް ރައްޔިތުންގެ މަޖިލީހުގެ ހިންނަވަރު ދާއިރާގެ މެންބަރު އަދި ޕާލަމެންޓްރީ ގުރޫޕްގެ ލީޑަރ އިބްރާހީމް މުހައްމަދު ސޯލިހް އިބޫ ވިދާޅުވެއްޖެއެވެ.
އިބޫ މިހެން ވިދާޅުވީ ބުރާސްފަތި ދުވަހު ފުލުސް އޮފީހަށް ހާޒިރުވެ ނުކުމެވަޑައިގެން ނޫސްވެރިނަނަށް މައުލޫމާތު ދެއްވަމުންނެވެ.
އިބު ވިދާޅުވީ މަޖިލީހަކީ ދައުލަތުގެ ވަކި ބާރެއް ކަމަށާއި އެބާރަށް އެހެން ބާރަކުން އަރައި ނުގަނެވޭނެ ކަމަށެވެ. އަދި އެމަޖިލީހަށް މެންބަރުން ވަޑައިގަތުމުން ވަޑައިގެންނެވި މެންބަރުން ހާޒިރުކޮށް ސުވާލު ކުރަނީ އެކަމަށް ހުރަސްއެޅި ފުލުހުން ކަމަށާއި އެފުލުހުން އެފުލުހުންނާ ގުޅޭ ކަމަކާ ގުޅޭ ތަހުގީގެއް ކުރުމާ މެދު ސުވާލު އުފެދޭ ކަމަށެވެ.
އިބޫ ވިދާޅުވީ ބުރާސްފަތި ދުވަހު ހާޒިރުކޮށް ސުވާލު ކުރުމުން ތަހުގީގް ކުރިއަށް ގެންދަން ބޭނުން ވަނީ ވަކީލަކާ އެކުގައި ކަމަށް ވިދާޅުވިން ކަމަށާއި އެއާ އެކު ހުކުރު ދުވަހުގެރޭ 8 ޖަހާއިރު ވަކީލަކާ އެކު ހާޒިރު ވުމަށް އަންގާފައިވާ ކަމަށެވެ.
އިބޫ ވިދާޅުވީ ހޮނިހިރު ދުވަހަށް ފަސް ނުކުރެވޭނެތޯ ދެންނެވިން ކަމަށާއި ނަމަވެސް ވަކި ވަގުތަކަށް ނިންމަންޖެހޭ ތަހުގީގަކަށް ވާތީ އެގޮތައް ހެދެން ނެތް ކަމަށް ފުލުހުން ބުނެފައިވާ ކަމަށް އިބޫ ވިދާޅުވިއެވެ.
"ކުރިއަށް މިއޮތީ ބަންދު ދެދުވަސް. އޮއްވައި ހުކުރު ދުވަހުގެ ރެއަށް އަނެއްކާ ވެސް ތަހުގީގަށް މިކީ. އަޅުގަނޑު އެދުނިން ހޮނިހިރަށް ނޫނީ އާދީއްތައަށް ފުރުސަތު ދެއްވާށޭ. ވިދާޅުވީ ނުވާނެޔޭ ވަވަގުތަކަށް ނިންމަން ޖެހޭ ކަމަށް. އަޅުގަނޑުމެން އެދެން ވަކިފަރާތަކަށް ނުޖެހި މިތަހުގީގް ކުރިއަށް ގެންދަން. އެއްފަރާތުގައި އެތިބީ ކަންކުރި ފުލުހުން. ފުލުހުން މި ތަހުގީގް ކުރަނީ. ދެން ތިޔަބޭފުޅުން ވިދާޅުވޭ އަކަން ކުރިއަށް ދާނެ ގޮތް،" އިބޫ ވިދާޅުވިއެވެ.
އިބޫ ވިދާޅުވީ މިކަމަކީ މެންބަރުންނަށް ބިރުދައްކާ އިދިކޮޅު ފަރާތްތައް ހައްޔަރު ކުރުމުގެ ބޭނުމުގައި ކުރާ ކަންތައްތަކެއް ކަމަށާއި ނަމަވެސް އިސްލާހަށް މަސައްކަތް ކުރައްވާ ފަރާތްތަކުން ތިބީ ދޫދީ ފަހަށް ޖެހޭ ގޮތަށް ނޫން ކަމަށެވެ.
"މިމަސައްކަތް ކުރިއަށްދާނެ. މއީ އަޅުގަނޑަކާ ނޫނީ ޢަބްދުﷲ ރިޔާޒަކާ ނޫނީ ފަލާހަކާ ގުޅިފައިވާ ކަމެއް ނޫން.މިއީ ރައްޔިތުންގެ މަސައްކަތެއް. އަޅުގަނޑު ގެންގޮސްބަންދުކުރިއަސް މިކަން ކުރިއަށް ދާނެ. މިއީ ވަކިފަރާތަކާ ގުޅިފައިވާ ކަމެއް ނޫން. އެހެން ރައީސް ޔާމީނަށްހީފުޅުވަންޏާ އެއީ ވަރަށް ބޮޑު ކުށް ހީއެއް. މިހަރަކާތް ކުރިއަށް ދާނެ،" އިބޫ ވިދާޅުވިއެވެ.
