ސުޕްރީމް ކޯޓަށް އެމްޑީޕީން ހުށަހަޅާފައިވާ މައްސަލައަކީ ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދަން އޮތް ހުރަހެއް ނޫންކަމަށް ރައްޔިތުންގެ މަޖިލީހުން ބުނެއެވެ.

ގާނޫނުއަސާސީގެ 82 ވަނަ މާއްދާގެ (ޅ) ގައި ވަނީ މަޖިލީހުގެ ރައީސް މަގާމުން ވަކިކުރުމުގެ ބަހުސެއް ހިނގާ ޖަލްސާއެއްގެ ރިޔާސަތުގައި މަޖިލީހުގެ ރައީސް ބަލަހައްޓައިގެން ނުވާނެ ކަމަށް ބުނެފައެވެ.

އަދި މަޖިލީހުގެ ގަވާއިދުގެ 205 ވަނަ މާއްދާގެ (ބ) ގައި އެ ފަދަ ޖަލްސާއެއްގެ ރިޔާސަތު ބަލަހައްޓަވާނީ މަޖިލީހުގެ ނާއިބު ރައީސް ކަމަށް ބަޔާންކޮށްފައި އޮވެއެވެ.

ވުމާއެކު، ނާއިބް ރައީސް އީވާ ނޫން ފަރާތަކަށް އެފަދަ މައްސަލައެއްގެ ރިޔާސަތާ ޙަވާލު ނުވެވޭނެކަމަށް މަޖިލީހުން މާނަ ކުރުމާއެކު، އެމްޑީޕީން ވަނީ މަޖިލިސް ގޮވައިގެން ސުޕްރީމް ކޯޓަށް ގޮސްފައެވެ.

އެމްޑީޕީން ސުޕްރީމް ކޯޓަށް މައްސަލަ ހުށަހަޅާފައިވަނީ ޤާނޫނުއަސާސީގެ 82 ވަނަ މާއްދާގެ ދަށުން މަޖިލީހުގެ ރައީސް މަޤާމުން ވަކި ކުރުމުގެ ޤަރާރު ކުރިއަށް ގެންދިއުމަށް މަޖިލީހުގެ ޤަވާއިދުގައިވާ ގޮތުގެ މަތިން މަޖިލީހުގެ ނާއިބްރައީސް ހާޒިރުނުވާ ޙާލަތުގައި ރައްޔިތުންގެ މަޖިލީހުގެ ޤަވާއިދުގެ 44 ވަނަ މާއްދާގައިވާ ގޮތުގެ މަތިން ރިޔާސަތު ބަލަހައްޓަވާނެ ފަރާތެއް ކަނޑައަޅައި، މަޖިލީހުގެ ރައީސް މަޤާމުން ވަކި ކުރުމުގެ ޖަލްސާ ކުރިއަށް ގެންދަންޖެހޭނެކަމަށް ކަނޑައަޅުއްވައިދެއްވުމަށާއި، މަޖިލީހުގެ ރައީސް މަޤާމުން ވަކި ކުރުމުގެ ޤަރާރާމެދު ގޮތެއް ނިންމުމަށްފަހުގައި ނޫނީ މަޖިލީހުގެ އެއްވެސް ޖަލްސާއެއް ކުރިއަށް ނުގެންދެވޭނެކަމަށް ކަނޑައަޅުއްވައި ދެއްވުމަށެވެ.

އެމްޑީޕީން ސުޕްރީމް ކޯޓަށް ހުށައަޅާފައިވާ މައްސަލަ ތާވަލުކޮށްފައިވަނީ 6 ނޮވެމްބަރު ވާ ހޯމަ ދުވަހުގެ ހެނދުނު 10:00 އަށެވެ.  

ރައްޔިތުންގެ މަޖިލީހުގެ ރައީސްގެ އިތުބާރު ނެތް ކަމުގެ މައްސަލައެއް މަޖިލީހަށް ހުށަހަޅާފައިވަނިކޮށް، އެ މައްސަލަ ކުރިއަށް ނުގެންގޮސް އެހެން އެއްވެސް މަސައްކަތެއް ކުރިއަށް ނުގެންދެވޭނެކަން މަޖިލީހުގެ ގަވާއިދުގެ 205 މާއްދާގެ (ރ)ގައި ވަނީ ބުނެފައެވެ.

އެމްޑީޕީން މައްސަލަ ހުށަހެޅުމުން އީވާ ވަނީ އެ މައްސަލައިގައި ގޮތެއް ނުނިމެނީސް ޖަލްސާ ކުރިއަށް ގެންދަން ފެނިވަޑައިނުގަންނަވާކަމަށް ބަޔާން ކުރައްވައި މަޖިލީހަށް ސިޓީއެއް ފޮނުއްވާފައެވެ. އެކަމާ ގުޅިގެން މަޖިލިސް އިދާރާއިން ވަނީ ސުޕްރީމް ކޯޓަށް ހުށަހަޅާފައިވާ މައްސަލައާއި، މަޖިލީހުގެ ރައީސް މަޤާމުން ވަކި ކުރުމުގެ ޤަރާރުގެ މަސައްކަތް މަޖިލީހުގެ ޤަވާއިދުގެ 205 ވަނަ މާއްދާގައިވާ ގޮތުގެ މަތިން މަޖިލީހުގެ ޖަލްސާގައި ކުރިއަށް ގެންދިއުމަކީ ތަފާތު ދެ ކަމެއްކަމަށް ފެންނަކަމަށް ޖަވާބު ދީފައެވެ.

ވުމާއެކު، 1 ނޮވެމްބަރުގައި ތާވަލުކޮށްފައިވާ ޖަލްސާގެ ރިޔާސަތު ބެލެހެއްޓެވުމަށް ވަޑައިގެންނެވުމަށް މަޖިލީހުން ވަނީ އީވާ ގާތުގައި އެދިފައެވެ. އެއީ 31 އޮކްޓޯބަރު 2023 ގައެވެ.

ސުޕްރީމް ކޯޓަށް މައްސަލަ ހުށަހަޅާފައިވީނަމަވެސް ޖަލްސާ ކުރިއަށް ގެންދެވޭނެކަމަށް މަޖިލީހުން ބުނުމާއެކު، އޭގެ ފަހުން އީވާ ވަނީ ހުރިހާ ޖަލްސާއަކަށްވެސް ސަލާމް ފޮނުއްވާފައެވެ. ސަބަބެއްކަމަށްވީ ޑެންގޫ ހުން ޖެހިވަޑައިގަތުމެވެ.

އެންމެ ފަހުން 5 ނޮވެމްބަރުވީ އާދިއްތަ ދުވަހުވެސް އިވާ ސަލާމް ފޮނުއްވުމުން މިއީ މަޖިލީހުގެ ޖަލްސާތައް ކެންސަލްވި 5 ވަނަ ފަހަރެވެ.

ނަޝީދުގެ އިތުބާރު ނެތްކަމުގެ މައްސަލަ މިދިޔަ މަހުގެ 29، 30 އަދި މި މަހުގެ 1 ވަނަ ދުވަހާއި 5 ވަނަ ދުވަހު ވެސް ތާވަލު ކުރިއެވެ. ނަމަވެސް އެ ޖަލްސާތަކަށް އީވާ އަބްދުﷲ ސަލާމް ފޮނުއްވުމުން ޖަލްސާތައް ވަނީ ކެންސަލް ކޮށްފައެވެ.

ގިނަ ސަލާންތަކަކަށްފަހު 4 ނޮވެމްބަރުގައި އީވާ ވަނީ އަނެއްކާވެސް މަޖިލީހަށް ސިޓީއެއް ފޮނުއްވާފައެވެ.

އެ ސިޓީގައި އީވާ ވަނީ ސުޕްރީމް ކޯޓަށް ހުށަހަޅާފައިވާ މައްސަލައިގައި ގޮތެއް ނުނިމެނީސް ޖަލްސާގެ ރިޔާސަތާ ޙަވާލުވެވަޑައިގެންނެވުމަށް އުޒުރުވެރިވެވަޑައިގެންފައެވެ.

ސަަބަބެއްކަމަށް ބަޔާން ކުރެއްވީ އަދުލު އިންސާފުގެ ބާރަށް އޮންނަންޖެހޭ އިހުތިރާމް ކުޑަ ނުކުރެއްވުމަށާއި، ބާރުތައް ވަކި ކުރުމުގެ ތަސައްވުރަށް ހިޔަނި ނޭޅުއްވުމަށް ކަމަށެވެ.

ވުމާއެކު، ސުޕްރީމް ކޯޓަށް ހުށަހަޅާފައިވާ މައްސަލައިގައި ވަކި ގޮތެއް ކަނޑައެޅެންދެން ޖަލްސާގެ ރިޔާސަތާ ޙަވާލުވާން އުޒުރުވެރިވެވަޑައިގެން އީވާ ވަނީ މަޖިލީހަށް އެކަން އަންގަވާފައެވެ.

އެހެންނަމަވެސް މަޖިލީހުގެ ސްޓޭންޑު މިކަމުގައި އޮތީ ކުރިންވެސް އީވާއަށް ދީފައިވާ ޖަވާބާ އެއްގޮތަށެވެ. އެގޮތުން ސުޕްރީމް ކޯޓަށް މައްސަލަ ހުށަހެޅިފައި އޮތުމަކީ އިތުބާރު ނެތްކަމުގެ މައްސަލަ ކުރިއަށް ގެންދިއުމަށް އޮތް ހުރަހެއް ނޫންކަމަށް މަޖިލީހުން ބުނެފައިވެއެވެ.

ކަންމިހެން އޮތްކަމުގައިވީނަމަވެސް، އީވާ އުޒުރުވެރިވެވަޑައިގަތުމާއެކު ދެން ޖަލްސާއަކަށް އެ މައްސަލައެއް އެޖެންޑާއެއް ނުކުރާނެކަމަށް މަޖިލީހުން ބުނެއެވެ.

ކޮންމެއަކަސް، ބާރުތަކަށް އިހުތިރާމް ކުރުމުގެ ގޮތުންކަމަށް ވިދާޅުވެ އީވާ ދެއްކެވި އުޒުރާއެކު، ދައުލަތުގެ އެއްބާރުގެ މަސައްކަތް މިވަނީ ހުއްޓުމަކަށް އައިސްފައެވެ.

އައު ރައީސް ހުވާ ކުރެއްވުމުގެ ޖަލްސާއާއި، ބަޖެޓުގެ މަސައްކަތްފަދަ މުހިއްމު އެތައް ކަމެއް މަޖިލީހުން ކުރަން ހުރި މަސައްކަތްތަކުގެ ތެރޭގައި ހިމެނެއެވެ. ނަމަވެސް މަޖިލިސް މިވަގުތު އޮތީ ހުއްޓުމަކަށް އައިސްފައެވެ. ދައުލަތުގެ އެއް ބާރު މިއަދު ފެންނަމުންދަނީ އާރެއް ބާރެއް ނެތް ތަނެއްގެ ގޮތުގައެވެ.